E Kakakoroa Nanon Ana Kantaninga “te Atua ae Tataekina te Koaua”

1. Bukin tera ngkai ti kona n onimakinna ae ti kamanoaki man ana kewe Tatan? (Taian Areru 31:2-5)

TI A MAEKA n te aonnaba ae tautaekanaki iroun Tatan. E taabangaki iai te kewe, te mwamwanaa te aba, ao te kamwamwane. E kona ni kangaanga ataakin temanna ae ko na onimakinna. Iai taani bitineti aika a babakanikawaiia bitineti ake tabeua. Iai taani katanoata aika a mwamwanaiia aomata n aia kaako aika a kakatanoatai. Ao iai tabeman aika a noria ae a aikoa kona n onimakini aia taeka raoraoia ni kaan. Ma ai karaunanora ataakin ae ti kona n onimakina Iehova n taai nako! Bon “te Atua ae tataekina te koaua.” (Wareka Taian Areru 31:2-5.) E aki kona ni kewe Iehova bwa bon anuana tataekinan te koaua. A kona n onimakinaki ao ni kakoauaaki bwaai ni kabane aika e taekin Iehova ao ni karaoi.

2. Tera ae ti na maroroakinna n te kaongora aei?

² N te kaongora aei, ti na maroroakina moa bukina tabeua ngkai ti kona n onimakina Iehova ma nanora ni kabane. Imwina ti na noria bwa e na kangaa te Atua ae tataekina te koaua ni kamauna ana aonnaba ae buakaka te Riaboro ao tera te bwai ae E tabe ni karaoia ngkai te Atua ni kakororaoa iai Ana kantaninga. Ti na buokaki n te maroro aei n riki bwa Ana Tia Kakoaua Iehova aika ninikoria ao n aki mamaaku.

BUKINA NGKAI TI KONA N ONIMAKINA TE ATUA AE TATAEKINA TE KOAUA

3. Bukin tera ngkai ti kona n onimakina raoi Iehova?

³ Ti kona n onimakina Iehova ibukina bwa te tia Karikiriki. E karika karawa ma te aonnaba ao ngaia Nibwan te maiu. (KBwaai 1:1; TaiAre. 36:9; TeKao. 4:11) Boni ngaia naba te tia Kateimatoa te maiu. E karaoa naba te aonnaba ma bwaina nako aika e na teimatoa iai te maiu. Boni ngaia ae taui aroni bwaai ni kabane n te iuniweeti. Ngaia are ti kona n onimakina ara tia Karikiriki ae wanawana ao n rangi ni mwaaka bwa e na kairira maiura ao ni katauraoa te kantaninga ae tamaroa n taai aika imwaira.

4. Ti kangaa n ataia ae e tangirira Iehova?

⁴ Ti kona n onimakina Iehova ibukina bwa e tangirira. E karikiia aomata Iehova ibukina bwa e kan tibwaa te bwaintangira ae te maiu nakoia. E taekina ana kantaninga Iehova n taeka aikai: “Ti na karaoa te aomata n ai arora, ni katotongira.” (KBwaai 1:26) E anganira inaomatara n rinea ae ti na karaoia. E karika mwengara ae tamaroa ae te aonnaba. (TaiAre. 115:16) Ao e kakabwaiaia ara moani karo ni mwiokoaia ae a na bita mwengaia anne nakon te bwaretaiti. (KBwaai 1:28; 2:15) E katauraoi bwaai ni kabane n te aonnaba ibukia bwa a aonga ni maiu. E oti raoi ni baika karaoaki aikai bwa “e teimatoa n aki totoki ana tangira ae koaua Iehova.”—TaiAre. 103:17.

5. (a) E kangaa Iehova ni kakoroa bukin ana taeka n aki ongea ana kakorakora te Riaboro ni kamaunaia aomata? (b) Baikara berita tabeua ake e a tia ni kakoroi nanoia te Atua? (Nora te bwaoki ae “E Tataekina te Koaua te Atua.”)

⁵ Ti kona n onimakina Iehova ibukina bwa e kakakoroi bukin ana taeka. E aki karaoa te aonnaba Iehova bwa “e na matebuaka, ma e karaoia bwa e na maekanaki.” (Ita. 45:18, 19) Ngke a karitei Atam ao Ewa ao a bon riai ni mate. Ngaia are e taraa n aki kona ni koro nanon ana kantaninga te Atua. Ma Iehova bon te tia Kakoroi nanon ana berita nako. (Ita. 46:10, 11) E aki bitaki ana kantaninga are e na kaonaki te aonnaba irouia aomata aika raoiroi. Anne bukina ngke e kariaia Iehova bwa a na karikiia natiia Atam ao Ewa. Ao e anga Natina ae Ana rikitemanna bwa te kaboomwi ibukini kamaiuaia kanoan Atam ao ni karekea nakoia te kantaninga ae kakukurei ae te maiu n aki toki.—Ioa. 3:16.

E KAKOROA NANON ANA KANTANINGA TE ATUA AE TATAEKINA TE KOAUA

6. Tera ae e a kaman taekinna Iehova imwin te karitei i Eten?

⁶ Bon “te naeta nikawai, are arana te Riaboro ao Tatan”a are kariria Atam ao Ewa bwa a na karitei nakon te Atua. (TeKao. 12:9; KBwaai 3:4, 5; Ioa. 8:44) E taekina Iehova motikan taekan Tatan ae e na kamaunaaki. (KBwaai 3:15) A bati aika a na kakairi iroun Tatan ao ni karaoi baika bubuaka imwain rikin anne. Ma iai tabeman aika a na kakaonimaki ni koaua nakon Iehova.

7. Antai aika a raona te Riaboro ao tera tokia?

⁷ Bon anera ao aomata aika karitei ake a raona Tatan te Riaboro. Ibukina bwa a kaitaraa ke a rawa nakon ana kantaninga te Atua, a a riki iai bwa kanoan Tatan. Ma a na boni kamaunaaki Tatan ao naake a raonna n ana tai te Atua are e a tia n namatia.—Tan. 2:44; IRom 16:20.

8. Tera are e karaoia Iesu n 1914? (Nori naba taamnei.)

⁸ Tera te bwai ni kakoaua ae ti onimakinna ae e na koro nanon ana kantaninga te Atua ae e na kamauna Tatan ma raona? N 1914, ao e buaka Iesu ni kaitaraa Tatan te Riaboro ma ana taimonio, ao e karenakoia nako aon te aba. (TeKao. 12:7-9) E ngae ngke e boo te buaka i karawa ma a bon rotaki naba iai kaain te aonnaba. E taekinaki ae kangai n te Baibara, “E na reke kain aon te aba ma marawa, ibukina bwa e a tia n ruo te Riaboro nakoimi, ao e a korakora unna ngkai e ataia bwa e a kimototo ana tai.” (TeKao. 12:12) Man 1914, ao e a tia Tatan ni kaatuua ana iango i aon te aba ni katikiia bwa a na iria, ao ibukin anne e a rikirake ni buakaka riki te waaki n te aonnaba. E bon eti raoi ae “e na reke kain aon te aba”! Ma e a kaan roko te tai are e nang “tokanikai” iai Iesu ao a nang kamaunaaki Tatan ma taani boutokaia. (TeKao. 6:2) E nang kaitiaka raoi aran Iehova Iesu. (TaiAre. 45:4-6) A na bane n ataia aomata nako ae Iehova bon te Atua ae tataekina te koaua!—Etek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

E IKOTIIA NAAKE A TANGIRA TE KOAUA TE ATUA AE TATAEKINA TE KOAUA

9. Antai aika e ikotiia Iehova n ara bong aikai?

⁹ E tabe ngkai Iehova n “ikotii . . . bwaai nako i nanon te Kristo, aika bwaini karawa ao bwain aon te aba.” (IEbe. 1:10) E kaineti “bwaini karawa” nakoia taani kabiraki aika e rineiia Iehova bwa a na tautaeka ma Kristo i karawa. E kaineti “bwain aon te aba” nakoia naake a na maiu n aki toki n te Bwaretaiti n te aonnaba. A bane taan taromauria Iehova aikai ni kakorakoraia ni kaotaraei ana kewe Tatan ao ni buokiia aika a raoiroi nanoia bwa a na karekea te atatai ibukin te koaua.

10. E kangaa Iehova ni kainaomataia aomata man aia kewe Aaro aika kewe? (Te Kaotioti 14:6, 7)

¹⁰ E ikotiia Iehova naake a tangira te koaua rinanon te mwakuri n uarongorongo ae raababanako n te aonnaba. (Wareka Te Kaotioti 14:6, 7.) E ngae ngke e kabonganaia aomata Iehova ni kaongoia iai tabemwaang te rongorongo ae raoiroi, ma a ibuobuoki naba anera n ikotakia aomata aika raoiroi nanoia nakon te ekaretia ni Kristian. A kaotaraeaki n te mwakuri n uarongorongo aei ana reirei aika kewe Baburon ae Kakannato, ae te botaki n Aro ae kewe ni katobibia te aonnaba are e kabongana te Riaboro ni kabutiinako iai keewe ibukin Iehova i nanon tienture aika bati. (TeKao. 18:2, 4) E a kaan te tai are a nang kamaunaaki raoi iai Aaro aika kewe, ao naake a tangira te Atua ae tataekina te koaua a nang anganna neboakina ae bon tau n anganaki.—TeKao. 17:16.

11. Ti na kangaa ni kinaia taan taromauria Iehova ni koaua?

¹¹ A kakaokoro nako aroia naake a tangira te koaua, kaubwaia, aia katei ao a roko man natannaomata nako. (TeKao. 7:9, 10) Ngke a ongo “te rongorongo ae raoiroi,” a noria bwa bon te koaua raoi ao a kukurei n raonia ana aomata Iehova. (Mareko 13:10) Ni waakinakon te tai ao e a tabe n otara raoi bwa antai aika a taromauria te Atua n te aro ae eti ao antai aika a aki. E a kaman taekina aei te burabeti are Maraki: “Ane kam na manga ataa te kaokoro i marenan te aomata ae raoiroi ma te aomata ae buakaka, ao i marenan ane e toro iroun te Atua ma ane e aki toro irouna.” (Maraki 3:18) Man aroaroni maiuia ana toro Iehova ao aia mwakuri n uarongorongo, a kaotia iai bwa a taromauria te Atua ae tataekina te koaua.

12. E kangaa ni kakororaoaki ana kantaninga Iehova n te mwakuri n uarongorongo?

¹² Ngkana ti tataekina te “rongorongo ae raoiroi . . . ae taekan te Tautaeka n Uea,” ti ongeaba iai n ana tua Iesu ao ti kakoroa naba nanon te taetae ni burabeti. (Mat. 24:14; 28:18-20) Ao ibukin ara mwakuri aei, a a riki bwa taan rimwini Kristo aomata ni katobibia te aonnaba ao ni kantaningaa te tai are a na taromauria iai te Atua ae tataekina te koaua n aki toki. Ai tamaroara te tibwanga aei ae uataboani kakororaoan ana kantaninga Iehova!

TARAI TAAI AIKA IMWAIM MA TE AKI NANOKOKORAKI

13. Antai aika a na kakaitaraaki riki iroun Tatan, ao bukin tera?

¹³ E a rangi n un Tatan te Riaboro ibukina bwa e ataia ae “e a kimototo ana tai” imwain ae e kamaunaaki ana aonnaba. (TeKao. 12:12, 13) E kakaaitaraia riki naake a tei ibukin Ana Tautaeka n Uea te Atua n te aonnaba, ake “a kakairi n ana tua te Atua ao a mwiokoaki n te mwakuri ni kaotiota taekan Iesu.” (TeKao. 12:17; 14:12) A na boni kakaitaraaki naba iroun Tatan naake a boutokaiia naakai ao te mwakuri ae a karaoia.

14. Tera ae e na riki ngkana e buakania ana aomata Iehova Tatan? (Nora naba te ni moan te maekatin.)

¹⁴ Imwini kamaunaani Baburon ae Kakannato, ao Tatan ma naake a tei n ana itera a nang buakania ana aomata Iehova ni kabane. E a moanaki naba ngkanne te buaka are Aremaketon. (TeKao. 16:13, 14, 16) A na kamaiuaki taan taromauria Iehova iroun Iesu ma ana taanga ni buaka i karawa ao a na kamaunai raoi bwaai ni kabane aika irekereke ma ana aonnaba te Riaboro. (TeKao. 19:19-21) A nang akea taani kewe, aomata aika bubuaka ao taani mwamwanaa te aba. (TeKao. 21:8) E nang noraki raoi koauan ae Iehova bon te Atua ae tataekina te koaua ao e raoiroi.

15. Bukin tera ngkai ti kona n tarai taai aika imwaira ma te aki nanokokoraki? (Itaia 65:16, 17) (Nora naba te taamnei.)

¹⁵ Ni boong aikai ao e a korakora riki te iraraure irouia aomata n te aonnaba aei. Ma a teimatoa ni katiteuanaaki ana toro Iehova man ana ibuobuoki. E a kaman waaki ana mwakuri Iehova n ikotiia ana aomata. Akea te bwai ae e kona n tuka Iehova mani kakabwaiaaia ana aomata ao te mwakuri ae a karaoia. (Wareka Itaia 65:16, 17.) Ti tarai taai aika imwaira ma te aki nanokokoraki. A karauaki nanora n ana taeka te abotoro Bauro ake n I-Rom 8:38, 39 ake a kangai: “E aki kona te mate ke te maiu, ke anera ke taian tautaeka, ke bwaini ngkai ke baika a na roko, ke taiani mwaaka, ke baika mena i eta ke i nano, ke te bwai teuana riki ae karikaki, ni karaureira ma tangirara iroun te Atua are kaotiotaki rinanon ara Uea ae Kristo Iesu.”

16. Bukin tera bwa ko onimakina Iehova ma nanom ni kabane?

¹⁶ Ti bon riai n onimakina Iehova ae te Atua ae tataekina te koaua. Bon ara tia Karikiriki ngaia. E rangi n tangirira. E a tabe ngkai n ikoikotiia aomata man taabo nako ni katobibia te aonnaba bwa a na taromauria n te aro ae eti. (Ita. 60:22; Tek. 8:23) Ti ataia ae e kakakoroa nanon ana kantaninga n taai nako ao e na boni waekoa ni kamaunai ana mwakuri nako Tatan ni mwamwanaa te aba ma ana kewe. Ti tataro n aron Tawita ni kangai: “Ke e karaoiroaki Iehova ae te Atua, . . . ae tii ngaia ae e karaoi baika kamimi. Ke e karaoiroaki n aki toki arana ae mimitong, ao ke e on te aonnaba ni kabutaa ni mimitongina.”—TaiAre. 72:18, 19.