Titiraki Mairouia Taani Wareware

N ningai ae a na katanoataa iai te natannaomata bwa “iai te rau ao iai te mweraoi”?

N aron ae ti noria n “Titiraki Mairouia Taani Wareware” are e boreetiaki n Te Taua-n-Tantania ae e a tibwa nako, ao e taekinaki iai bwa e na waekoa Iehova ni kaaki i nanoia “kooro ake tengaun” (ae taekaia taian tautaeka) “ana iango” are a na aanga mwaakaia ao te kairiri nakon “te man are tiritiri are uraroo” ae taekan Aia Botaki te Natannaomata. E aranaki naba te man aio bwa “katotongan te man are tiritiri.” (TeKao. 13:14, 15; 17:3, 16, 17) Imwina a nang kamaunai Aaro aika kewe n te aonnaba ni kabutaa, “kooro ake tengaun” ao te man ae tiritiri are e a tibwa anganaki mwaakana. A na katanoataa te natannaomata bwa “iai te rau ao iai te mweraoi”b imwain ke imwini kamaunaaia Aaro aika kewe?—1Tet. 5:3

Ti aki ataa raoi te tai are e na katanoataaki iai ae “iai te rau ao iai te mweraoi.” Ngke arona bwa ti ataa raoi rongorongona ni kabane, ti nang aki ngkanne kainnanoia bwa ti na taratara raoi ao n tantani. Ma e okioki Iesu ni kauringia taan rimwina bwa a na “teimatoa n tantani.” (Mat. 24:42; 25:13; 26:41) Ti na karaua n nenera ngkai te taetae ni burabeti ae kairaki koreana rinanon te taamnei ae raoiroi, are e koreia te abotoro Bauro n ana reta nakoia I-Tetaronike.

E korea aei Bauro: “Bwa n te tai are a kangai iai, ‘Iai te rau ao iai te mweraoi!’ ao e na rina ni bwakariia te kamaunanakoaki.” (1Tet. 5:2, 3) A aki toki ni kabwarabwaraaki ana taeka Bauro aikai n ara boki ni kangai: Katanoataakin ae “iai te rau ao iai te mweraoi” e na karaoaki imwain raoi moanakin te rawawata ae korakora, ae moanaki ni kamaunaakini Baburon ae Kakannato ae te botaki n Aro ae kewe ae katobibia te aonnaba. Te katanoata nakon taai aika a na roko aei e aki toki ni kabwarabwaraaki bwa te kabanea ni kanikina imwain raoi te rawawata ae korakora.

Ma imwini manga rinanoakina riki ao e taraa n ae iai riki kabwarabwaraana ae ti aki kona n tarariaoia. Tao e na katanoataaki ae “iai te rau ao iai te mweraoi” imwini kamaunaakia Aaro aika kewe. Bukin tera ngkai e kona n riki aei? Ti na maroroakin titiraki aikai.

Tera aron irekerekeia Aaro aika kewe ma aia buaka natannaomata? E kabwarabwaraa ni kangai te Baibara: “E kuneaki i nanon neiei [“te kabekaau are kakannato,” Baburon ae kakannato] raraaia te koraki nako ake a a tia ni kamateaki i aon te aba.” (TeKao. 17:1, 5; 18:24) N rongorongon rimoa, ao e a tia te kabekaau ae kakannato ni kauekei buaka i marenaia natannaomata ao ni kakorakoraa boutokaani mwakuri ni iowawa. Ngaia are e riki neiei bwa te tia karika te buaka ma te iowawa, ao tiaki te rau ao te mweraoi. Anne are e a katea te titiraki aei: A na katanoataa te natannaomata bwa “iai te rau ao iai te mweraoi” imwin raoi kamaunaani Baburon ae Kakannato? E kona n riki anne, ma ti aki kona ni koaua raoi iai.

Tera ae e na riki imwini katanoataan ae e na “iai te rau ao iai te mweraoi”? E taku Bauro: “Ao e na rina ni bwakariia te kamaunanakoaki.” (1Tet. 5:3) E kangai te study note ibukin te kibu aei: “E katerea ikai Bauro bwa ngkana e a tia ni katanoataaki ae ‘iai te rau iai ao te mweraoi’ ao e na aki maan imwina ke boni ngkekei naba ao e a roko naba kamaunaakia naake a katanoataa taekan anne. E na rina n roko ao a na aki kona ni kamanoia mai iai.” Ngkana a a katanoataa ae “iai te rau ao iai te mweraoi” tautaeka aika mwaaka n te aonnaba, imwini kamaunaaia Aaro aika kewe, a nang rina ngkanne ni kamaunaaki natannaomata ni kabane.

Tera aroia ana aomata Iehova ni bwaai aika a na riki aika a kaman taekinaki? E taku Bauro: “Ngkami taari kam aki mena n te rotongitong, n te aro are kam na kauiaaki n te bong arei n aroia taan iraa.” (1Tet. 5:4) Iangoa aei: Ngkana e a katanoataaki ae “iai te rau ao iai te mweraoi” imwini kamaunaaia Aaro aika kewe, a na ataia ngkanne ana aomata Iehova ae e a kaani kamaunaaia te natannaomata. Ma ane a na iangoia te natannaomata ae e na roko kamaunaakia n aron te tia iraa, n te tai ae waekoa ao n akea te kauring.

Tera ngkanne ae ti kona ni kantaningaia? N te tai ae e a kaan, ao e nang kamaunaaki te Aro ae kewe irouia “kooro ake tengaun” ao te man ae tiritiri ae korakora mwaakana. Aei boni moanakin te rawawata ae korakora. Ti ataia naba ae iai te tai ae e na katanoataa iai te natannaomata ae “iai te rau ao iai te mweraoi.” E na riki n ningai anne? Ti a tia ni maroroakini baika uoua aika kona n riki. Te moan: E na katanoataaki anne imwaini kamaunaaia Aaro aika kewe. Te kauoua: E na nako te katanoata anne ngkana a a tia tautaeka ni kamaunai raoi Aaro aika kewe. Ti riai n tataninga ao n nora te bwai ae e na riki. A mataata raoi taetae ni burabeti aika n te Baibara ngkana a a tabe ni kakororaoaki ke ngkana a tia ni koro nanoia.—Kabotaua ma Ioane 12:16.

Mangkai moa, e kakawaki riki ara kakaonimaki i matan te Atua ao tiaki te tai ae imwaira are e na katanoataaki iai ae “iai te rau ao iai te mweraoi.” Ti riai n “taratara ao ni kawanawanaira,” bwa ti aonga n tauraoi raoi n aki ongei baika a na riki.—1Tet. 5:6.