“Bon te Tibwanga Mairoun Iehova Naati”

TERA ae tei n am iango ngkana ko ongo te taeka ae “te tibwanga”? Ko bae n iangoa te mwane, te mwakoro n aba teuana, ke tao bwain te utu teuana ae kakawaki ae bwaatinaki nakoim mairoun temanna kaain am utu ae tangiraki iroum. N aki ongeia bwa tera ma te tibwanga bon te bwai ae kakawaki ao ko na boni bae ni kawakinna raoi.

N te Baibara ao a aranaki naati bwa “te tibwanga mairoun Iehova.” (TaiAre. 127:3) A kakoauaa kaaro aika Kristian ae boni bwaai n tituaraoi aika rangi ni kakawaki natiia mairoun Tamaia are i karawa, ao a kani kabanea aia konaa ni kamanoia ao n tararuaia n te itera n rabwata, n aia namakin, ao n aia onimaki naba.

Ma e kananokawaki bwa tabeman kaaro ni boong aikai a aki iangoiia natiia bwa tibwangaia mairoun te Atua. (Ita. 49:15; 2Tim. 3:1-3) Iai naba aika a rangi ni kan tararuaia raoi natiia ma a kabokorakora ni karaoa anne i aani kangaanga aika kakaokoro. Baikara tabeua kangaanga aikai aika e kona n aki bebete iai irouia kaaro bwa a na tararuaia natiia? Tera ae e tangiria Iehova mairouia kaaro? Ao a na kangaa kaaro aika Kristian n tokanikai ni kaikawaiia natiia?

KANGAANGA

• Aia kairoro kaain te utu ao tabemwaang. N taabo tabeua n te aonnaba ao a rangi ni karineaki kaaro aika mwaiti natiia. Ai ngaia are a kona ni kairoroaki taanga irouia aia utu ke kaain rarikia bwa a na kamwaitiia natiia, ae tao te mwaiti ae riaon naba ae a kona n tararuaiia taanga.

• Te raraoma ibukin taai aika a na roko. N aaba tabeua ake e korakora iai mateia ataei n te bakitaia, n te aoraki, ao ni memeeren te mwakuri ni kuakua, a a kona taanga tabeman ni kamwaitiia natiia bwa e aonga ni kona reke naba tabeman i buakoia aika a na maiu n uaa a ikawai. Ao taanga tabeman a kamwaitiia natiia bwa a aonga n aki raraoma bwa a na bon tararuaaki ngkana a kara. E noraki riki koauan anne n aaba aika akea iai ana ibuobuoki te tautaeka nakoia kaara.

• Babairean te utu. N taabo tabeua, ao e kona ni kangaanga irouia taanga karekean te bwainnaoraki ibukini babairean te utu. Tabeman e boraoi nakoia bwainnaoraki aikai ma a maaka rotakin rabwataia iai. Ma bon iai naba aika a a bon aki kona ni kabooi bwainnaoraki aikai bwa a rangi ni bobuaka.a

TERA AE TANGIRIA IEHOVA MAIROUIA KAARO?

Katauraoi kainnanoia natimi. E mwiokoiia kaaro Iehova bwa a na katauraoi kainnanoia natiia aika uarereke n te aro n rabwata. E kantaningaiia kaaro bwa a na tauraoi ni mwakuri korakora ibukini karekeani kanaia natiia n tatabemania nako, oneaia, ao mwengaia. E tangiriia naba kaaro Iehova bwa a na karinia natiia n te reirei. Ngaia are kaaro aika Kristian a aki kanakoia natiia nakon reirei aika kamaekaia iai ataei n ana kaembwa. Ma a taraia raoi bwa a na maeka ma natiia n uaa a ikawai bwa a aonga n reke aia reirei ae raoiroi ao ni kona n tararuaiia raoi, n te aro ae a na namakinna bwa a kawakinaki raoi, a mano ao n tangiraki. Ma e ota naba Iehova n taiani kangaanga, ao e aki kantaningaia bwa a na kaubwai kaaro. Ni koauana, ao Iehova e rineiia kaaro aika maiu ni kainnano ma a mwakuri korakora bwa a na kaikawaa Natina ae tangiria.—Mat. 13:55, 56; Ruka 2:24.

Ana boto n reirei te Baibara: “Ma ngkana iai temanna ae aki karekei kainnanoia ana koraki ake e bon riai n tabeakinia, ai moarara riki ake boni kaaini batana, ao e kakeaa te onimaki ao e buakaka riki nakon te aomata ae aki onimaki.”—1Tim. 5:8.

E ataia Iehova ae a na bae ni kainnanoa buokaia kaaro ngkana a a kara riki. Te anga teuana ae a kona iai naati ni kaota karineaia aia karo, n aroia ni bairea aron tararuaaia aia karo ngkana a kara riki. (TeOti. 20:12; 1Tim. 5:4) Ma e kukurei Iehova irouia kaaro aika a iaiangoia moa bwa a na kangaa n tararuaiia natiia, n oneani mwin ae a na iaiangoa riki aron tararuaakia irouia natiia.—2Kor. 12:14.

Katauraoi kainnanoia n te onimaki. Iai riki tabeia kaaro aika Kristian ae kataneiaakia natiia bwa a na tangira Iehova ao n taromauria. E taraa Iehova kataneiaakia n te onimaki naati bwa te bwai ae rangi ni kakawaki ni kaikawaia.—TuaKau. 6:6, 7.

Ana boto n reirei te Baibara: “Kam na kaikawaiia [natimi] i nanon ana reirei ni kaetieti ao ana kaungaunga Iehova.—IEbe. 6:4.

E TANGIRIA IEHOVA BWA KAM NA TOKANIKAI

Moantaai ni babaire. Ngkana kam iangoia bwa kam na kariki, taraia ma aromi naba. N te katoto, ko na kona ni katauraoa kanaia, kunnikaia, ao ni karinia n te reirei natim aika mwaiti? Ngkana kam aki kona, maroroakinna ma raom bwa kam na kauarerekea ami utu bwa kam aonga ni kona n tararuaiia raoi natimi ake kam na karikiia n aron ae tangiria Iehova. E ataia naba Iehova ae a aki kona n nakoraoi n taai nako taiani babaire. (TeMin. 9:11) Ma e na kakabwaiaa ami kakorakora ngkai kam kataia ni karaoa are e tangiria.

Ana boto n reirei te Baibara: “A na bon nakoraoi ana babaire te aomata ae mwakuri korakora, ma a na boni karako aia bwai aomata ni kabane aika taenoa.”—TaeRab. 21:5.

“Antai iroumi ae kani katea te taua, ae e na aki tekateka moa ni warebwaia te kabanemwane n noria bwa iai katiaana irouna ke akea?”—Ruka 14:28.

Moanibwaia Iehova n am utu. Moanibwaia taromaurian Iehova n ami utu. Ngkana iai natimi, kakorakoraingkami ni karina tangiran Iehova irouia n tatabemania nako. Buokiia bwa a na kakauongo raoi n te taromauri ao ni karekei reireiaia. Kateimatoa te Taromauri n Utu ni katoa wiki. Kataneiaia natimi n te mwakuri ni minita. Tai anga mwiokoami ni karo nakoia natimi akana ikawai riki ke ami koraki. E boni kainnanoa te tai ao te kakorakora kaikawaaia naati bwa a na tangira Iehova, ma bon te kakabwaia ae bati mwina.

Ana boto n reirei te Baibara: “Ao akea riki te bwai ae N na rangi ni kimwareirei iai nakon aei: ae te ongo taekaia natiu bwa a teimatoa n nakonako i nanon te koaua.”—3Ioa. 4.b

Onimakina Iehova. Ngkana tao kam iangoa ngkai ami kariki ke tao a a kaman reke natimi, kakoauaa raoi ae a kakawaki riki ana kaetieti Iehova nakoni katein abami ke te aroaro iai.

Ngkana kam rineia bwa kam na kauarerekea mwaitiia natimi, onimakinna ae e na boni katauraoi Iehova kainnanomi ngkana kam a a kara. Rarawa nakon te iango ae ko na karikiia natim bwa taan tararuaiko ngkana ko a kara. Kam aki riai ni maaka ae e na akea ae e na tararuaingkami. E a tia ni berita Iehova bwa e na tabeakiningkami, ao e boni kakakoroi bukin ana berita n taai nako.—Iot. 23:14.

Ana boto n reirei te Baibara: “Onimakina Iehova ma nanom ni kabane, ao tai onimakina oin am ataibwai. Ko na mutiakinna i nanoni kawaim ni kabane, ao e na kanakoraoa maium.”—TaeRab. 3:5, 6.

“Te ataeinimwaane ngai ngkoa ao I a kara ngkai, ma I tuai man nora te aomata ae raoiroi ae kaakaki taekana, ke natina aika bubutii te amwarake.”—TaiAre. 37:25

“Mangaia are teimatoa n ukoukora moa ana Tautaeka n Uea te Atua ma ana raoiroi, ao a na karekeaki baikai nakoimi.”—Mat. 6:33.

Boni bwaai n tituaraoi aika rangi ni kakawaki naati mairoun Iehova ae e angania kaaro. Ai kukureira Iehova ngkana a kakororaoa raoi mwiokoaia anne! A katauraoi kainnanoia natiia n te itera n rabwata, n aia namakin, ao n aia onimaki, a babairea raoi buburan aia utu, ao a kakaonimaki ni moanibwaia moa ana kaetieti Iehova ao tiaki katein abaia ke te aroaro iai. Ni karaoan anne, a kaotia iai taanga aika Kristian bwa boni bwaai n tituaraoi aika rangi ni kakawaki irouia natiia, ao “bon te tibwanga mairoun Iehova.”