Obaria—E Karikirakea Maakakin te Atua

Obaria bon te mataniwi n ana auti te Uea ae buakaka ae Aaba ao te tia tautaeka are kariaia taromauriani Baara n te aba. Ma e karikirakea Obaria maakakin Iehova “mangke te roro n rikirake” ngaia. (1Uea 18:1-13) Ngaia are ngke e tua Ietebera kamateaia ana burabeti ni kabane Iehova, e ataia Obaria ae e riai ni kaninikoriaa ni karaoa te bwai teuana n totokoa rikin te mwakuri ae buakaka anne. E karuanikai ngkana ko karabaa tii temanna te burabeti, ma Obaria e karabaia burabeti aika 100 ao e kakarekea kanaia n tain te rongo ae korakora! Iangoa aroni kangaangan ae ko na karabako mairouia burabeti ni kewe aika irabubua mwaitiia ake a beku iroun te uea ao te ueannaine.—1Uea 18:19.

Tera reireiara mairoun te mwaane ae mamaaka te Atua aei? E ngae ngke e maaka Aaba Obaria ma e korakora riki maakakin te Atua irouna. E kairaki iai bwa e na ninikoria ni karuanikaia maiuna ibukini kamanoaia tarina. Ti kona naba ngaira ni karikirakea maakakin te Atua, ngkana e a katabuakaki te taromauri ae koaua n te tabo ae ti maeka iai. E na kakorakoraira te aeka ni maaku aei bwa ti na boutokaiia tarira ao mwaanera ake a boo ma kataaki.