Taekina te Koaua ma te Atataiaomata

1. Tera ae ti riai ni karaoia bwa ti aonga n riki bwa kaain ana utu Iehova?

NGKANA ti moani kaitiboo ma raora n taromauria Iehova temanna, ao teuana mai buakon titiraki ae ti aki toki n titirakinira iai i marenara, e kangai, “E kangaa n reke iroum te koaua?” Iai tabeman aika kaekaa te titiraki anne n taekinna ae a “kaikawaaki n te koaua.” Ake tabeman a kona n taekina ae a a tibwa “rin n te koaua.” Ti kaeka n aron anne ibukina bwa e rotaki maiura ni kabane n te koaua ae n Ana Taeka te Atua. Bukin tera? Ibukina bwa ti ataia ae ti kona n riki bwa kaain ana utu Iehova tii ngkana ti kaotia ae ti tangira te koaua ao ti maiuakinna. E nanonaki naba iai bwainan te koaua n ara taetaenikawai ao n ara mwakuri.—TaiAre. 15:1-3.

2. (a) Tera taekan Iesu ae kinaaki iai? (b) Tera aron rotakia aomata n taiani koaua ake e angareirei iai Iesu?

² E taekina te koaua n taai nako Iesu. A ataia taani kairiribai nakoina ae e na bon taekina te koaua e ngae naba ngkana a aki kukurei aomata n te baere e taekinna. (Mat. 22:16) E taekina aei Iesu n aki ongeia bwa tera aron rotakia iai aomata: “I roko bwa N na karika te iraraure. E na kaitaraa tamana te nati te mwaane, ao te nati te aine e na kaitaraa tinana, ao buun te nati te mwaane e na kaitaraa tinani buuna.” (Mat. 10:35) E aki tangiria Iesu bwa a na un aomata n te rongorongo ae tataekinna ma taan rimwina, ma e ataia ae e na bon riki anne. (Mat. 23:37) E ataia ae ana rongorongo e na karika te bwenaua n te aonnaba nakon uakoraki, ae te koraki aika a tangira te koaua man te Baibara ao te koraki aika aki.—2Tet. 2:9-11.

3. Tera ae ti na maroroakinna n te kaongora aei?

³ N aron Iesu, ti kataia ni bwaina te koaua ao n taekina te koaua n taai nako e ngae naba ngkana a aki kukurei iai aomata. Ao ti tataekina te koaua man te Baibara ao n angareirei iai e ngae ngkana iai tabeman aika kona n un n te bae ti taekinna. Nanona ngkanne bwa ti aki riai n tabe ma arora n taekina te koaua ao te tai ae ti na taekinna iai? Tiaki ngaia anne! N te kaongora aei, ti na kaekaa moa te titiraki aei: Ti na kunea ia te koaua? Imwina ti na kaekaa te titiraki ae irekereke ma aei: Bukin tera, ti na kangaa, ao n ningai ae ti riai n taekina iai te koaua? Ti na buokaki ni kaekaan titiraki akanne ni kanakoraoa arora n taekina te koaua ma te atataiaomata ae irianaki ma te iangoraoi ao n te tai ae riai.

TI NA KUNEA IA TE KOAUA?

4. Bukin tera ngkai ti kona n taekina Iehova bwa Nibwan te koaua?

⁴ Bon Nibwan te koaua Iehova. A koaua bwaai ni kabane aika e taekin. N te katoto, a koaua ana taeka ake e taekin ibukin te bwai ae eti ao ae kairua. (TaiAre. 19:9; 119:142, 151) A koro bukini bwaai ni kabane aika e taekin ibukin taai aika a na roko. (Ita. 55:10, 11) E aki kona n urua ana berita. (WarIte. 23:19) E bon aki kona ni kewe Iehova! (Ebera 6:18) Anne bukina ngkai e kinaaki Iehova bwa “te Atua ae tataekina te koaua.”—TaiAre. 31:5.

5. Bukin tera bwa e aki kangaanga kunean “te Atua ae tataekina te koaua”? Kabwarabwaraa. (Mwakuri 17:27)

⁵ N aki ongea aia taeka tabemwaang, ma e bon aki kangaanga kunean Iehova “ae te Atua ae tataekina te koaua.” Ti otabwaniniaki ni bwaai ni kakoaua ae bon iai ngaia. (IRom 1:20) Ngke e taetae te abotoro Bauro nakoia kaaini Kuriiti aika rabakau i Atenai, ao e taekinna ae e tangiria te Atua bwa ti na “kunea” ao “e bon aki raroa mairoura n tatabemanira nako.” (Wareka Mwakuri 17:27.) Ni koauana, e katikiia Iehova nakoina aomata aika nanorinano aika a ukoukora te koaua.—Ioa. 6:44.

6. Baikara koaua tabeua n te Baibara, ao bukin tera ngkai ko kakaitau n ataakini koaua akanne?

⁶ Te anga teuana ae ti kona iai ni kunea Iehova bon te reirei n te Baibara. A kairaki n taamnein te Atua ae raoiroi mwaane ake a korea te boki anne. (2Bet. 1:20, 21) Ngaia are a boni koaua kanoan te Baibara ni kabane ao ti kona n onimakinna. N te katoto, ti kona n onimakina te bae taekinaki iai ibukini moan rikin te iuniweeti ao te maiu n te aonnaba. (KBwaai 1:1, 26) Ti kona ni kakoauaa te bae taekinaki iai ae e aera ngkai ti bane ni bure ao e aera ngkai e rangi ni bati te rawawata ao te mate. (IRom 5:12; 6:23) Ti kona n onimakina raoi ae taekinaki iai ae e na kaoka Iehova mwin te urubwai ni kabane are karaoia Tatan ae “taman te kewe,” rinanon Natina. (Ioa. 8:44; IRom 16:20) Ao ti kona n onimakina ana berita te Baibara are e na kamauna te buakaka Iesu, e na kautiia maate, e na kaoka aron te aonnaba, ao e na buokira n riki ni kororaoi. (Ioa. 11:25, 26; 1Ioa. 3:8) E a tia n anganira Iehova te kakabwaia. E a tia n reireinira te koaua ao e karekea te anga ae ti na reireinia iai tabemwaang.—Mat. 28:19, 20.

BUKINA NGKAI TI TAEKINA TE KOAUA

7-8. E kakawaki bwa tera bukina ngkai ti tataekina te koaua? Aanga te katoto. (Mareko 3:11, 12) (Nori naba taamnei.)

⁷ N aron ae taekinaki mai mwaina, ti riai n tataekina te koaua ngkana ti kan riki bwa kaain ana utu Iehova. Ma e bati riki ae ti riai ni karaoia nakon tii tataekinan te koaua. E kakawaki iroun Iehova bwa tera bukina ngkai ti taekina te koaua. Iangoa te baere riki n tain ana mwakuri ni minita Iesu i aon te aba. (Wareka Mareko 3:11, 12.) Ngke e tabe n uarongorongo Iesu i rarikin Namani Kariraia, ao a ikotaki aomata aika uanao i rarikina. Tabeman i buakoia bon aomata aika taniaki irouia taimonio ake a bobaraaki i matan Iesu ao a takarua n tang nakoina ni kangai: “Bon Natin te Atua ngkoe.” Bukin tera ngke a taekina te koaua taimonio ibukin Iesu? Tiaia bwa a kani karekea onimakinaia irouia te koraki ake a ongora irouia ao ni katikiianako bwa a na aki beku iroun Iehova. A taekina te koaua taimonio ma a karaoia ibukini bangaomataia. E aki mwamwanaaki iai Iesu ao e aki kukurei iai. Bwa e tua Iesu nakoia taimonio bwa a na aki uarongorongoa taekana.

⁸ Tera reireiara man te rongorongo aei? E kakawaki iroun Iehova bwa tera bukina ngkai ti tataekina te koaua. Ai kakawakira ngkanne bwa ti na tataekina te koaua ibukina bwa ti tangira Iehova, ao ngkana ti kamoamoaaki irouia aomata, ti neboa Iehova ao ti aki kani kamoamoaaki iai!—Mat. 5:16; kabotaua ma Mwakuri 14:12-15.

9. Tera ae ti riai n rarawa nako iai ao bukin tera?

⁹ Iangoa riki te bwai teuana ae ti riai n rawa iai nakon ukerani kamoamoaara i bon iroura. Iangoia bwa aongkoa ti tuangaki iroun te tari te mwaane ae iai mwiokoana te rongorongo ae aki riai n ataaki ao ngaira ti a manga taekinna nakoia tabemwaang. Ngkana a kunea imwina naake a ongora iroura bwa e koaua te baere ti tuangia, a bae n anaaki nanoia ni baika ti atai ao n iangoia ae ti tutuangaki rongorongo aika aki riai n ataaki. Ti kona n taraa iai ni kakawaki irouia ma e na bon aki kukurei iai te Atua. (TaeRab. 11:13) Bukin tera? Ibukina bwa ti aki tii taekini bwaai aika aki riai n ataaki ma ti taekina naba te koaua i aani bukina ae aki riai.

ARORA N TAEKINA TE KOAUA

10. Ko na kangaa ni kabwarabwaraa te taetaenikawai ae “atataiaomata”? (I-Korote 4:6)

¹⁰ Wareka I-Korote 4:6. E kauringia Kristian ake a maeka i Korote te abotoro Bauro bwa e riai n raonaki aia taeka n “taai nako n te atataiaomata.” Tera nanon anne? Te taeka ae moan rairaki iai te kibuntaeka aei e kaotaki iai te iango ae a riai n ibuobuoki ara taetaenikawai nakon te tia ongora ao a na akoi naba ao n anainano.

11-12. Bukin tera bwa ti riai n taratara raoi ngkana ti reireinia aomata te koaua? Taekina te kabotau. (Nori naba taamnei.)

¹¹ Ti riai ni maiuakina ana reirei ni kairiri Bauro ae ti na atataiaomata ngkana ti reireinia tabemwaang te koaua. A kabotauaki n te Baibara koaua ake iai ma te kabaang ae kakang ae kona ni kaota kaokoron taraan te aomata ma are i nanona. Ae nanona e kona ni kaotii ara namakin ni koaua ake i nanora ao bukini karaoani bwaai iroura. (Ebera 4:12) Ma ngkana ti aki rabakau ni kabongana te Baibara, ti kona ni kaunia aomata ao ni kauekea te itabarara. E na kangaa n riki anne?

¹² Iangoa te bae riki aei. Ti kaitiboo ma te aomata ae raoiroi nanona n ara mwakuri ni minita ae katoatai n taromauri bouannanti, ao e bubukamarua te Kiritimati ao te Itita ma ana utu. Ti kona ni kaotia nakon te aomata anne ni kabonganaan te Baibara ae bon te aro n nanobaba te tataro nakoni bouannanti ao bon aia bukamaru beekan te Kiritimati ao te Itita. (Ita. 44:14-20; 2Kor. 6:14-17) Ngkana ti karaoa anne n ara moani maroro, ti taekina te koaua iai ma ti aki rabakau ni kabongana Ana Taeka te Atua.

13. Ti na kangaa n taorona ara taeka?

¹³ E taku naba Bauro bwa ti na taorona ara taeka. E aki nanonna ae ti riai ni kataia ni bita te koaua ke ni karabaa. Ma e kaumakira bwa ti riai ni kabonganai taeka aika “taoronaki” bwa ti aonga ni kona n taekina te koaua n te aro ae kaanga e na kangkang iroun te tia ongora. (Iobi 12:11) E kona ni kangaanga karaoan anne. Ni kaineti ma te amwarake ni koaua, ti kona n iangoia ae te amwarake ae kangkang iroura e a boni kangkang naba irouia aomata ni kabane. N aron anne, ti kona n iangoia ae e anainano arora n taetae irouia aomata ni kabane. Ma tiaki ngaia anne. N te katoto, iai tabeman aika kaikawaaki ni katei tabeua aika kona ni kaotii aia iango n akea te wimakiki, e ngae naba ngkana a taetae nakon ae ikawai riki nakoia. Ao tabeman ake a kaikawaaki ni katei riki ake tabeua, a iangoa te aeka n taetae anne bwa e aki raoiroi ao e kaun. E taekinna Bauro bwa ti riai n ataa arora “ni kaeka ae riai nakoia aomata n tatabemania nako.” E oti n aei bwa ti riai n taorona ara taeka, tiaki ni kaineti nakon ae raoiroi iroura ke n ara katei, ma ni kaineti nakon ae raoiroi iroun te tia ongora.

TE TAI AE TI RIAI N TAEKINA IAI TE KOAUA

14. E reireinia taan rimwina Iesu bwaai ni kabane ake e atai ngke e mena n te aonnaba? Kabwarabwaraa.

¹⁴ E aki toki n taetae Iesu ma te atataiaomata nakoia taan rimwina ao e reireinia baika bati ma te akoi. (Mareko 6:34) Ma a bati baika a riai n reiakin. E aki kataia Iesu n reireinia bwaai ni kabane ake e atai. E atai tian aia konabwai. E ataia ae tiaki anne te tai ae raoiroi ibukia bwa a na reiakini koaua tabeua. Bwa e taekinna ae a na aki kona n ota moa ni koaua akanne. (Ioa. 16:12) Tera reireiara n aei?

15. Ti riai n reireinia ara reirei n te Baibara bwaai ni kabane aika ti atai n tii teuana te tai? Kabwarabwaraa. (Taeka N Rabakau 25:11) (Nora naba te taamnei.)

¹⁵ E oti n ana katoto Iesu bwa e aki nanonaki n ataakin te koaua ae ti riai n angareirei bwaai ni kabane aika ti atai n tii teuana te tai. Ti na kangaa ni kakairi n ana katoto Iesu? Ti riai n iangoi baika a rinanoi aomata. Iangoa riki te mwaane are kukurei ni bubukamarua te Kiritimati ao te Itita ma ana utu. Ti ataia ae e moan riki mairouia beekan bukamaru aikai ao e aki kukurei iai te Atua. Ma iangoia bwa ko a moana te reirei n te Baibara ma te mwaane anne teuana ke uoua te wiki imwain te Kiritimati. Ti taetae ma te atataiaomata ngkana ti kaotia nakon teuaei te bae taekinaki n te Baibara ibukin aia bukamaru beekan ao ni kantaningaia bwa e na waekoa ni katoka bukamaruan te Kiritimati? E koaua ae iai tabeman aika reirei n te Baibara aika a bae ni waekoa ni maiuakini bwaai ni kabane aika a reiakin. Ake tabeman a kainnanoa te tai ae bati riki bwa a na bitii aia iango ao baika a kakaraoi. Ti kona ni buokiia ara reirei n te Baibara bwa a na rikirake ngkana ti tuangia te bae a riai n ataia n te tai are a kan ongora iai, ae nanona n te tai are a a kona n ota iai.—Wareka Taeka N Rabakau 25:11.

16. Ti na kangaa ni buokiia ara reirei n te Baibara bwa a na “teimatoa n nakonako i nanon te koaua”?

¹⁶ Iai tabeua baika ti rangi ni kimwareirei iai n aroni buokaia tabemwaang bwa a na ataa te koaua ibukin Iehova. Ti kona ni buokiia bwa a na “teimatoa n nakonako i nanon te koaua” ngkana ti karaoa aei: Teimatoa ni katea te katoto ae raoiroi ibukia. (3Ioa. 3, 4) Taraia raoi bwa e na oti ni maium ni kabane ae ko kakoauai berita ake n Ana Taeka te Atua. Taekina te koaua ma te nano ae raoiroi. Taetae ma te atataiaomata, ni kabonganaan taeka aika aamarau, ao aika akoi n te tai ae riai ngkana ko angareirei te koaua. Ao kamoamoaa Iehova ngkana ko kamoamoaaki. Karaoan aei, ko na kaotia iai bwa ko toro iroun Iehova ae te Atua ae tataekina te koaua.