Kataamnei Rongorongo Aika n te Baibara

A bati rongorongoni baika riki rimoa n te Baibara aika reke iai reirei aika kakawaki. Ngkana ti kataia ni kataamnei rongorongo aikai, ti a kona n ota riki n te bae ti warekia ao ni kakabwaiaaki riki mai iai. Iangoi tabeua bwaai n ibuobuoki aika kona ni buokiko ni kataamnei rongorongo aika n te Baibara.

• Wareware ni kabaibati bwanaam. E kona ni buokiko warekan te Baibara ni kabaibati bwanaam ni kataamnei raoi baika riki. Ngkana ko wareware n te Baibara ma am utu, ko kona ni kamaiua te rongorongo n arom ni kakatannakoa temanna ma temanna bwa a na wareki aia taeka kaain te karaki aika kakaokoro.

• Kataamnei baika riki. Kataia n ota n aia iango ao aia namakin kaain te karaki. N te katoto, titirakiniko aei: ‘E aera te aomata aei ngke e taetae ao ni karaoi bwaai n te aro aei? E na tera au iango ke au namakin ngke arona bwa I mena ikanne?’

• Korotaamnei. E kona ni buokiko korean taamneini baika riki n te Baibara bwa ko na kataamneia te rongorongo ao n ururingnga riki, e ngae naba ngkana ko aki rangi ni bwaati ni korotaamnei.