Te Aro Ae Raoiroi E Karikirakea Te Itangitangiri ae Aia Itangitangiri Taari
E TAEKINAKI ae kangai n te Baibara: “Ane akea te tangira i rouna, ao e aki ata te Atua, ba te Atua bon te tangira.” (1 Ioane 4:8) Mangaia are, e riai te Aro ae raoiroi ni karikirakea te itangitangiri ae aia itangitangiri taari.
A mwaiti Aaro aika a kakaraoi mwakuri ni mwamwannano nakoia aoraki, kaara ao aika maiu ni kainnano, aika a na kamoamoaaki iai. A kaungaia naba kaain aia Aaro bwa a na maiuakina ana reirei te abotoro Ioane are e korea ae kangai: “Ane iai ana bwai aika bwain aon te aba, ngkana e nora tarina ba e kai nanona ngkai akea ana bwai, ao ngkana e bonota nanona nako ina, ao e na iranna ni mena i nanona tangiran te Atua? Au ataei aika uarereke, ti na tai i tangitangiri n te taeka ao n te newe; ma ti na i tangiritangiri n te makuri ao n te koaua.”—1 Ioane 3:17, 18.
Tera ae riki ngkana e a boo te buaka i marenaia natannaomata? E riai ngkanne ana tua te Atua are, “Ko na tangira raom n ai aron tangiram i bon i roum” n tii maiuakinaki n tain te rau ma e na kakeaaki ngkana e baireia te tia tautaeka ke te uea bwa a na buakana te natannaomata are teuana?—Mataio 22:39.
E taku Iesu: “Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:35) N am tai ni kaekai titiraki aika i nano aikai, titirakiniko ni kangai: ‘A kaotiota te tangira kaain te Aro aei nakoia aomata nako n taai nako ao tiaki tii n aia taeka ma ni bon aia mwakuri naba?’
ATUN TE REIREI: Te buaka.
ANA REIREI TE BAIBARA:
E tua ae kangai Iesu nakoia taan rimwina: “I taku nakoimi, Kam na tangiriia ami kairiribai, ao karaoa ae raoiroi nakoia akana ribaingkami.”—Mataio 5:44, New Catholic Edition of the Holy Bible.
Ngke a roko tautia ni katika Iesu, ao e a buuta naba ana kabaang te abotoro Betero bwa e na kamanoa. Mangaia are, e kangai Iesu: “Kaoka am kabang nakoni nnena, ba a na bane ni mate n te kabang akana a baina te kabang.”—Mataio 26:52, BK.
E korea ae kangai te abotoro Ioane: “A kaotaki natin nako te Atua ma natin nako te riaboro n aei: ane aki karaoa ae raoiroi ao tiaki mairoun te Atua, ao ai uana naba ane aki tangira tarina. Ba aio te taeka are kam ongo ma ngke kam moa n reireiaki, ba ti na i tangitangiri: tiaki aroni Kain are mairoun teuare buakaka, are kamatea tarina.”—1 Ioane 3:10-12.
TE TITIRAKI:
E kaungaia kaaina te Aro aei bwa a na uataboa te buaka?
ATUN TE REIREI: Taiani waaki n tautaeka.
ANA REIREI TE BAIBARA:
Iai tabeman aomata ake a tangira Iesu bwa e na irekereke ma te waaki n tautaeka imwin noran ana konabwai ni karaoi kakai. Ma tera arona iai? “E ataia Iesu bwa a nangi roko ni kairoroa bwa a na kaueaa. Mangaia are, e kitania ao e nakon te maunga n tii ngaia.”—Ioane 6:15, New International Version.
Ngke e katikaki Iesu ao ni bukinaki n te aro ni kewe, bwa aongkoa e kairiria aomata bwa a na kaitaraa te tautaeka ao e kaeka ni kangai: “Tiaki mai aon te aba aei nakoau n uea. Ngke arona ba uean aonteaba aei ngai, ao a na boni buaka au aomata ba N na aki kabureaki nakoia I Iutaia. Ma tiaki uean aonteaba aei ngai.”—Ioane 18:36, BK.
Ngke e tataro Iesu nakon te Atua ibukia taan rimwina ao e taku: “I a tia n angania am taeka; ao e ribaiia te aba, ba tiaki ana bwai te aba ngaiia; n ai arou ngkai tiaki ana bwai te aba Ngai.”—Ioane 17:14.
TE TITIRAKI:
E toua mwin ana katoto Iesu te Aro aei n aki irekereke naba ma waaki n tautaeka, e ngae ngkana a nang ribaaki kaaina irouia taan tautaeka tabeman?
ATUN TE REIREI: Te inanonano.
ANA REIREI TE BAIBARA:
Ngke a riki aomata aika tiaki Iutaia aika aki korotobibiaki bwa Kristian, ao e kangai te abotoro Betero: “Akea okoroia aomata iroun te Atua, ma e kukurei irouia aomata nako mani botanaomata nako, ngkana a makua ma ni karaoa ae e raoiroi.”—Mwakuri 10:34, 35, BK.
E koroboki nakoia Kristian ake n te moan tienture Iakobo ni kangai: “Tariu, ngkana kam onimakina ara Uea are Iesu Kristo ae mimitong, ao kam na tai bwaina te inanonano. Bwa ngkana e rin ni mwaneabami te aomata, ae burenibaia te burenibai ae te koora, ae kunnikaia te kunnikai ae tamaroa, ao ngkana e rin naba te aomata ae aki kaubwai ma kunnikaina ae buakaka; ao ngkana kam tarataraa teuare kunnikaia te kunnikai ae tamaroa ni karinea, ao ngkana kam kangai, Ko na tekateka ikai n te tabo ae raoiroi; ao ngkana kam kangai nakon teuane aki kaubwai, Ko na tei ikanne, ke ko na tekateka i aani nneni katokaani waeu; ao kam karika te raure iroumi iai, ao kam riki bwa taani motiki-taeka aika kam babaire ma te inanonano ae buakaka.”—Iakobo 2:1-4, Contemporary English Version.
TE TITIRAKI:
E angareirei te Aro aei bwa a bane aomata n titeboo i matan te Atua ao a aki riai kaaina ni kaotiota te inanonano nakoia aomata nako n aki ongeia bwa kaain te reeti raa ke tao mwaitira kaubwaia?