Te Aro Ae Raoiroi E Karikirakei Kaetieti Ibukin te Aroaro ni Maiu ae Rangi n Tamaroa
E REIREINIRA te Aro ae raoiroi arora ni kona n iaiangoi baika a raoiroi ao aika a buakaka, ao e kaotaira naba arora ni karikirakei aroaro aika raraoi. E boutokaira n taai ake ti kabokorakora iai ni karaoa ae raoiroi ao e kairira naba bwa ti na karaoa ara kabanea ni kona. Ti kanga n ataia bwa anne te bwai ae karaoia te Aro ae raoiroi?
Nora te bwai are e koreia te abotoro Bauro nakoia Kristian ake n te moan tienture ake i Korinto i aoni Kuriiti. E rangi n ataaki te kaawa anne ngkoa n aroaroia kaaina aika kammaira. E kauring ni kangai Bauro: “E aki reke uean te Atua irouia taani wene ni bure, ma taan taromauri boua, ma taani kimoa bun te aomata, ma mwaane aika baka ni kan aine, ao mwaane aika bo ma mwaane, ao taan ira, ma akana mataai ni kanibwaibwai, ma taan nim kamanging, ma taan taetaebuaka, ma taani babakanikawai.” E a manga reitianako riki Bauro ni kangai: “Ao ai aroia akanne tabemang i buakomi ngkoa: ma kam tebokaki, ao kam kaitiakaki, ao kam karaoiroaki n aran te Uea are Iesu, ao iroun naba Tamnein Atuara.” (1 I-Korinto 6:9-11) Iangoia, te Aro ae raoiroi e buokiia tabeman ake akea ngkoa irouia te kaetieti ibukin te aroaro ni maiu ae raoiroi, bwa a na riki bwa ana toro te Atua aika itiaki ao n raoiroi!
Ni kaitaraan anne, e kauring ni kangai te Baibara: “Ane e na roko te tai ae a na rawa aomata iai n ongo te reirei ni koaua, ao a na iri nanoia ni kaibwabwaru, ma ni karekeia aia tia reirei ni kabatiaia aika a na tuangaki irouia baika a ingainga nanoia iai ni kan ongoraa.”—2 Timoteo 4:3, Te Nu Tetemanti n te Taetae ni Kiribati ae Ngkai, NTK.
Tera ae a karaoia Aaro aika ko atai ni kaineti ma aei? A kakairi ni baika a taekinaki n te Baibara ni kaineti ma aroaroni maiuia aika raraoi? Ke tao a kamangora te kaetieti ae ota raoi ae n Ana Taeka te Atua, n aroia n tuangia aomata bwa a na tii ‘ongora ni baike a boni kan ongoraei’?
Ngkana ko kani buokaki ni kakaaea raoi te Aro ae kariki uaa aika raraoi, e aera bwa ko aki karekea teutana am tai ni kaekai titiraki aika i nano aikai?
ATUN TE MARORO: Te mare.
ANA REIREI TE BAIBARA:
“E na karineaki te mare irouia aomata ni kabaneia, ao a na aki urua aroia ni maiu n taanga te mwaane ma buuna; bwa te Atua E na motiki-taekaia ni kabuaakakaia taani wene ni bure ma ainenumwa ke mwaanenumwa ao taani wene ni bure ma ake akea buia.”—Ebera 13:4, NTK.
TE TITIRAKI:
E kainnanoaki n tuan te Aro anne bwa a riai ni mare i aan te Tua taanga aika uaia ni maeka?
ATUN TE MARORO: Te buuraure.
ANA REIREI TE BAIBARA:
Ngke e titirakinaki Iesu bwa iai bukini kariaiakan te buuraure, ao e kaeka ni kangai: “Ane kaki buna ngkana e tuai ni wene ni bure, ao e a manga buna te aine temanna, ao e wene ni bure iai: ao ane buna nei ere kakiaki, ao e wene ni bure naba.”—Mataio 19:9.
TE TITIRAKI:
E koaua bwa te Aro aei e karinea ana kairiri Iesu anne ao e kariaia te buuraure ao te manga mare tii ngkana e karaoaki te wene ni bure?
ATUN TE MARORO: Te aroaro ae riai ibukin te wene n taanga.
ANA REIREI TE BAIBARA:
“Kam na biri nako man te wene ni bure. Buure aika e karaoi te aomata a bane ni mena i tinanikun te rabata; ma ane wene ni bure ao e bure nakon oin rabatana.”—1 I-Korinto 6:18.
“Ba aia aine, a baina te aro ni iein ae e kabitaraa ma ae bon arona ni koaua. Aroia naba mane, a kaki te aro ae e riai ae te botaki ma te aine, ao a taaniia raoia ni mane. A karaoi baika a kamama i boni irouia, ao e reke iai kaia ae e riai i bukin aia bure.”—I-Rom 1:26, 27, BK.
TE TITIRAKI:
E koaua bwa e reirei te Aro aei bwa e bure karaoan te wene ni bure i marenan te mwaane ao te aine ke taanga aika titeboo aroia bwa mwaane ma mwaane ke aine ma aine?
ATUN TE MARORO: A ninikoria kaaina n tei ibukin ana kaetieti te Baibara.
ANA REIREI TE BAIBARA:
“Kam na aki raonia te koraki ake a atongaki bwa taari, ngkana bon taani wene ni bure, ke a mataai ni kanibwaibwai, ke taan taromauri boua, ke taan taetaebuaka, ke taan nim kamanging, ke taani babakanikawai; kam na tai amwarake ma ngaiia.” (1 I-Korinto 5:11, New Century Version) Tera ae e riai n riki nakoia ake a taku bwa Kristian ngaiia ma bon taani bure aika a aki raraoma ao n rairaki man aia bure? E taekinaki ae kangai n Ana Taeka te Atua: “Kam na tewea nako teuare buakaka mai buakomi.”—1 I-Korinto 5:13.
TE TITIRAKI:
E koaua bwa te Aro aei, e kabaneia kaaina ake a rawa n raraoma ao n rairaki man aroia n tinanikua ana reirei ni kaetieti te Baibara?