Te Aro Ae Raoiroi E Karikirakea Karinean Ana Taeka te Atua

E KARIKIRAKEA karinean Ana Taeka te Atua ae te Baibara Iesu. E teretere raoi te koaua aei man arona ni kaeka ni kataakina iroun te Riaboro. (Mataio 4:4-11) N te katoto, tera aron Iesu ngke e kataaki iroun Tatan bwa e na bitii atibu tabeua nakoni bwerena? E rawa Iesu nakoni kaririana anne n arona ni mwanewei taeka ake e korei Mote ake a kairaki koreaia rinanon taamnein te Atua, aika ko kona ni wareki n Te Tua-Kaua 8:3. Ao tera ana kaeka Iesu ngke e anganaki tautaeka ni kabane aika i aon te aba aei iroun te Riaboro bwa e aonga n taromauria n tii teuana te tai? E totokoa te bwai are e anganaki n arona ni mwanewea ana boto n reirei te Baibara, ae ko kona n noria n Te Tua-Kaua 6:13.

Ao bon tii iangoia ngkanne! E ngae ngke Iesu bon Natin te Atua, ma e boni mwaaka ana angareirei ibukina bwa e boto i aon te Baibara. Ao e bon tuai naba mani kakeaa Ana Taeka te Atua ibukin iran nanon aia katei aomata. (Ioane 7:16-18) Ma e ngae n anne, a bati mataniwi n te Aro ake n ana tai Iesu aika a aki karinea Ana Taeka te Atua n ai aron Iesu. Bukin tera? Ibukina bwa a a tia ni kariaia aia katei aomata bwa e na kakawaki riki nakon te Koroboki ae Tabu. E aki wimakiki Iesu n tuangia mwaane aika taua te Aro aikai ni kangai: “Kam urua ana taeka te Atua iai i bukin ami taeka nikawai. Ngkami aika taani mamana-te-aba, E eti ana taeka Itaia ngke e taekiningkami ni kangai, A karaoiroai ni matanriaia; ma a raroa nanoia mai Rou. Ma akea manen taromauriau i rouia, ngkai a reirei aia tua aomata ba aia taeka n reirei.”​—Mataio 15:6-9.

A mwaiti Aaro n te aonnaba aika Kristian ao aika tiaki Kristian ake a taku bwa a karinea te Baibara. Ma e ngae n anne, mwaitira Aaro aika ko atai aika kakeaa aia katei aomata, ngkana a bobuaka ma angareirei aika ota raoi ake n Ana Taeka te Atua? Iaiangoi katoto aika tii uoua.

ATUN TE REIREI: Taian nakoa n te Aro.

ANA REIREI TE BAIBARA:

E kabuakakaia mataniwi n te Aro Iesu ake n ana tai, ibukin tangiran taian nakoa ao kani kamoamoaaia. E taekinna bwa mwaane ngaiia aika a “tangiri nneia aika a kakanato n taiani botaki n amarake, ao tabo n tekateka aika a rine i nanon tinakoka. A kani kakamauraki i nanoni maraen te kawa, ma n atongaki ba ‘Tan Reirei’ irouia aomata.” E a manga tuangia taan rimwina Iesu ni kangai: “Ngkami, tai atongaki ba tan reirei, ba bon tari ngkami ni bane, ao bon ti temanna ami Tia Reirei. Tai atonga temanna i aon te aba [ba] tamami, ba ti temanna Tamami, are i karawa.”​—Mataio 23:1-10, BK.

TE TITIRAKI:

A tangiria mataniwi n te Aro anne bwa a na weweteaki n nakoaia aika karineaki iai ao n ukoukora kamoamoaaia i mataia aomata, ke a bon ongeaba n te baere e tua Iesu bwa e na aki karaoaki?

ATUN TE REIREI: Kamanenaan katotongani bwaai n te taromauri.

ANA REIREI TE BAIBARA:

“Ko na tai karaoa am bwai te boua ae kaaraki, ao katotongan te bwai teuana are i karawa i eta, ao ae i aon te aba ae i nano, ao are n te ran are i aan te aba: ko na tai katorobubua ni bobaraki nako ia, ao ko na tai toro i rouia.”​—Te Otinako 20:4, 5.

E koroboki nakoia Kristian te abotoro Ioane ni kangai: “Kawakiningkami mani bouananti.”​—1 Ioane 5:21, BK.

TE TITIRAKI:

E koaua bwa te Aro aei e ongeaba nakon ana tua te Baibara ae mataata raoi, are e na rawa ni kamanenai katotongani bwaai ma boua, n taromaurian te Atua?

Ko Boni Kona ni Kunea te Kawai ae Eti

Ko boni kona naba ni kunea te kawai ae kairiri nakon te maiu n aki ongea mwaitikurikurin Aaro ni boong aikai. A bati kanikina aika a kona ni kaota “te Aro ae itiaki ao ae aki kamwaraeaki i matan te Atua.” (Iakobo 1:27, New Revised Standard Version) A kona n riki kiibu aika maroroakinaki ni kaongora aikai bwa boua ni kanikina ake a na buokiko ni kairiko nakon te Aro anne.

E aera bwa ko aki titirakinia Ana Tia Kakoaua Iehova bwa a na kabwarabwarai aia kaeka nakon titiraki akana tabekaki ni kaongora aikai? Ngkai ko iaiangoi baika a taekin, kakairi n aia katoto ae raoiroi kaain te kaawa ae Beroia ake a maiu n te moan tienture. Imwin ongoraeia n ana uarongorongo te abotoro Bauro ao a “ukeuke n taiani Koroboki ba a na nora koauan ana taeka Bauro.” (Mwakuri 17:11, BK.) Ngkana ko katotongia kaaini Beroia n arom ni karinea Ana Taeka te Atua ao n taningamarau n ukeuke n reirei iai ao ane ko na kunea te kawai ae kairiri nakon te maiu. Ma e a bon tiku nakoim rineana bwa ko na toua te kawai anne ke ko na aki.