Reirei 13

Aeka n Tabunea Nako a Bane ni Bubuaka

E tangiriko Tatan bwa ko na kamanena te tabunea. A mwaiti aomata aika a anganga te mweaka nakoia aia bakatibu ke antiia ibukin kawakinaia man te kabuanibwai. A karaoa aei ibukin maakakin korakoraia te naan anti. A karini mwaae n tabunea mani kabaei waeia ke n tauanibainiia n te koratabuki. A mooi ke a kabiri rabwataia ni bwaa ni kakaraoi ake bwaa ake a kakoauaaki bwa a kakai ngkai boni bwaai nikawai. Tabeman aomata a karabai aia bwai ni kakaraoi n aia auti ke a tauni, ao a kakoauaa bwa e na boni mwakuri aia bwai arei ke e na kamanoia ni kakaina ae bati. Tabeman a kabongana te bwaa n tabunea ngkai a kakoauaa bwa e na boni kona ni kanakoraoa aia bitineti, aia ukeuke, ke aia kabae imwain te iein.

Am bwai ni kamanomano ae te kabanea n raoiroi ni kaitaraa Tatan, boni karekean Iehova bwa raoraom. Iehova ae te Atua ma ana anera a rangi ni korakora riki nakon Tatan ma ana taimonio. (Iakobo 2:19; Te Kaotioti 12:9) E a ingainga nanon Iehova ni kani kaota mwaakana ibukia raoraona​—te koraki ake a rangi ni kakaonimaki nakoina.​—2 Rongorongo 16:9.

E taku ana Taeka te Atua: “Kam na tai tatabunea.” Iehova e ribai aeka n tabunea nako ibukina bwa waaki aikai a kona ni karikiko bwa ko na toro i aan mwaakan Tatan te Riaboro.—Nakoaia Ibonga 19:26.