Tera ae E a Riki n te Karinerine Nakoia Tabemwaang?

BUKINA NGKAI E KAKAWAKI TE KARINERINE NAKOIA TABEMWAANG

Ngkana ti karineia tabemwaang, ti na bon totokoa reken te kangaanga ao e na aki rikirake ni korakora.

E taku te tia rabakau temanna n te Baibara: “E rairaanako te un ae korakora te kaeka ae nimamannei, ma e kauekea te un te taeka ae kamarakinano.” (Taeka N Rabakau 15:1) Taeka ma mwakuri aika aki kaota te karinerine, e boni kaurarakea riki te ai, ao e kona n reke mwina ae karuanikai.
E taku Iesu: “E taetae te wi man onraken te nano.” (Mataio 12:34) Taeka aika aki kaota te karinerine, a kona ni karekea te kangaanga ae korakora—e oti iai arora n iango n te aro ae aki raoiroi ibukia aomata aika kaokoro aia reeti, aia baronga, abaia, ao rikiaia ma ngaira.

N te kakaae ae e a tibwa karaoaki, ao ni kaineti ma aia kaeka aomata aika raka i aon 32,000 n aaba aika 28, ao 65 te katebubua ae a taekinna bwa e a rikirake riki te aki karinerine irouia aomata.

TE BWAI AE KO KONA NI KARAOIA

Ti riai ni bwabwaina te karinerine nakoia aomata nako n ara tabo n reirei ke n ara tabo ni mwakuri —e ngae ngke ko aki boraoi n iango ma ngaiia. Kakaaei bwaai ake ko kona ni boraoi n iango iai. E na buokiko anne bwa ko na aki kabuakaka ke ni momotikitaeka.

“Katoka ami kabuakaka bwa kam kaawa ni manga kabuakakaaki.”—Mataio 7:1.

Te bwai are ko tangiria bwa e na karaoaki nakoim, karaoia naba nakoia tabemwaang. Ngkana ko bwabwaina te akoi ao ko ataa te riai nakoia aomata, a na boni karaoa naba anne nakoim.

“Bwaai ake kam tangiriia aomata bwa a na karaoi nakoimi, karaoi naba nakoia.” —Ruka 6:31.

Kakabwarai buure. Iangoia ae e bon aki kani kauniko te aomata anne n arom n tarariaoi taeka ke mwakuri aika aki kaota te akoi.

“Ana ataibwai te aomata e boni kakerikaaka unna, ao bon tamaroana tarariaoan te bwai ae kaun.”—Taeka N Rabakau 19:11.

Nanon aia tabo n taromauri Ana Tia Kakoaua Iehova imwaini moanakin te taromauri. A kakamauri ao ni maroro i marenaia aomata aika kakaokoro nako aia reeti ao aia ririki.

TE BWAI AE TI KARAOIA

A boutokaa bwainan te karinerine Ana Tia Kakoaua Iehova nakoia tabemwaang n taabo ake a maeka ao ni mwakuri iai.

Ti tatauraoi n anga taeka n reirei man te Baibara nakoia aomata nako ao akea te roo iai, ma ti aki kairoroiia bwa a na ira ara koaua ke ara iango. Ma ti kabongana ana taeka n reirei te Baibara n arora n tibwaa ara rongorongo “ma te nimamannei ao te karinerine ae bati.”—1 Betero 3:15; 2 Timoteo 2:24.

Ti rarawa n inanonano ao ti butimwaeiia nakon ara ekaretia aeka n aomata nako ake a kan reiakina ana reirei te Baibara. Ti na aki tabeitera ma ti na “kaotiota raoi te karinerine nakoia aeka n aomata nako.”—1 Betero 2:17, New International Version.

Ti karinea mwaakan te tautaeka are ti mena i aana. (I-Rom 13:1) Ti ongeaba nakon te tua ao ti kakabwakai ara taekiti. E ngae ngke ti teimatoa n tei i nuka ni kaineti ma te tautaeka, ma ti karinea inaomataia tabemwaang ni karaoan aia motinnano i aoni baika irekereke ma te waaki n tautaeka.