Tera ae E a Riki n te Karinerine Nakon te Maiu?

BUKINA NGKAI E KAKAWAKI TE KARINERINE NAKON TE MAIU

• Te moko n te tikareti e aki tii karekea te kaentia, ma e kamamaraa naba te rabwata bwa e na aki kona ni katoka te kaentia. E taekinaki bwa tao 90 te katebubua aomata ake a mate ni kaentian maamaaia imwin te moko ke te memena i rarikin te aomata ae momoko.

• Korakoran te mwakuri ni kakatii e karekea te rawawatannano nakoia aomata aika bati ni katoa ririki. E kangai te ribooti man te Stanford University: “E kaotaki man taiani kakaae bwa e ngae ngke a kona n reke maiuia tabeman man [te kakatii n te reirei] ma e teimatoa n tiku bwa te maneka i nanoia ao n aia iango i nanon ririki aika bati.”

• Aomata ake a buti i nanon te kawai ao a manging ke a drug, a kona ni karekea te kabuanibwai nakoia naake n te kawai ao naake a nakonako i rarikin te kawai. Ngkana e oti irouia aomata bwa a aki tabe ma te maiu, a kona n ikoaki naba iai tabemwaang.

TE BWAI AE KO KONA NI KARAOIA

Kawakina marurungim. E aki oimwi katokan te moko, mokonakin te moko are tiatiaatinaki, te koro ni manging, ke te drug. Mwakuri aikai, a kona ni karuanikaia maium ao ni kaota naba te aki karinerine nakoia naake a mena i rarikim, n ikotaki ma kaain am utu.

Tararuaiko raoi ma tabemwaang. Ibukin totokoan te kabuanibwai, tararuaa raoi mwengam. Taratara raoi ngkana ko buti, ao tararuaa raoi baom ni mwamwananga bwa e na teimatoa n raoiroi. Tai kariaia tabemwaang bwa a na kairaraangko nakoni mwakuri ake ko na ruanikai ke ni mate iai.

Bwabwaina te akoi nakoia tabemwaang. Karinean te maiu nanona bwa ti na bwaina te akoi nakoia aomata man reeti nako, aaba nako, n aki ongeia bwa a kaubwai ke a maiu ni kainnano, e bubura aia reirei ke a aki reirei. Te inanonano n te reeti ao te kairiribai boni wakaani mwakuri n iowawa aika kakaraoaki ao te buaka.

TE BWAI AE TI KARAOIA

A reireinia aomata Ana Tia Kakoaua Iehova bwa e na nakoraoi maiuia. Ara waaki n angareirei man te Baibara, e buokiia aomata bwa a na tokanikai i aoni babaeakinan tangirani bwaai tabeua ao anua aika karuanikai.

Ti irii raoi kaetieti ibukin te kamanomano n ara kateitei. Taan anganano ake a ibuobuoki ni katean ara tabo n taromauri ao ara kateitei riki tabeua, a kabongana ara waaki n angareirei man te Baibara bwa a na buokaki iai ni kararoai kabuanibwai. A tutuoaki raoi ara kateitei n taia ake a baireaki bwa a aonga n irii tuua n aaba ake ti mena iai.

Ti buokiia aomata ake a boo ma kabuanibwai aika karina. I nanon 12 te namwakaina n nako, ao ti anga baira n ibuobuoki nakoni kabuanibwai aika karina aika 200 tabun ni katobibia te aonnaba, ao e kaania 12 te mirion te taraa ae ti anga ibukini buokaia naake a rotaki ni kabuanibwai aikai.

Ngke e butinako te aoraki ae te Ebola n aonon Aberika Maeao (n 2014) ao n te Democratic Republic of Congo (n 2018), ti kabwarabwaraa nakoia aomata aron totokoan te aoraki ae kamamate aei. Ti kanakoia ara aomata bwa a na anga te reirei nakoia te koraki i aon taekan ae “E Kamaiuia Aomata te Ongeaba (Obedience Saves Lives).” Ti katauraoi naba taabo n tebobai i matan ara tabo n taromauri nako ao ti kamataataa kakawakin te tebobai ao bwaai riki tabeua aika ibuobuoki ibukin totokoan te aoraki.

I Sierra Leone ao a kamoamoaaki Ana Tia Kakoaua Iehova i aon te rerio ibukini buokaia tariia n te onimaki n aia kaawa ao ake tiaki naba, n totokoa te mannaoraki ae te Ebola.