Tera Ana Taeka te Baibara Ibukini Kamannangakin Rabwataia Maate?
Ana kaeka te Baibara
Akea te kaetieti n te Baibara ae mataata raoi ibukin te waaki ae kamannangan rabwatan te mate. Akea te tua n te Baibara ni kaineti ma kaiian te mate ke kamannangana.
A taekinaki katoto tabeua n te Baibara ae taekaia ana toro te Atua aika kakaonimaki ake a kaiia aia mate. N te katoto, e kakorakoraa Aberaam ni karekea ana nne ni mate are kaiiaki iai buuna are Tara.—Karikani Bwaai 23:2-20; 49:29-32.
E taekinaki naba n te Baibara aroia naake a kakaonimaki ngke a kabueki nikiran rabwataia aia mate. N te katoto, ngke e mate n te buaka te Uea ae Tauro ma natina mwaane ake teniman, ao a tiku moa rabwataia n aia aono taani kairiribai ao e karaoaki ae aki riai nakoia. Ngke e a ongo te aba taekan aei, ao a a nako I-Iteraera aika kakaonimaki ake taani buaka, n anaa rabwatan Tauro ma natina ao a kabuekiia, ao a tauni riia. (1 Tamuera 31:8-13) E kaotaki n te Baibara bwa e raoiroi te bae karaoaki aei nakon nikiran rabwataia mwaane aikai.—2 Tamuera 2:4-6.
Iango aika kairua ibukini kamannangan rabwatan te mate
Te iango ae kairua: E aki kaota karinean te rabwata te kamannang.
Te koaua: E taku te Baibara bwa naake a mate a a okira te tano, ae bon te bae riiriki nakon te rabwata ngkana e a mka. (Karikani Bwaai 3:19) Te kamannang e tii kabaitiia bitakin te rabwata nakon te mannang, ke te tano.
Te iango ae kairua: N taai ake e koreaki iai te Baibara, ao tii aomata ake e aki kukurei irouia te Atua ake a kabuekaki imwini mateia.
Te koaua: Tabeman aomata ake a aki kakaonimaki a kabuekaki rabwataia imwini mateia, n aron Akan ma ana utu. (Iotua 7:25) Ma e burenibwai rikin aei. (Te Tua-Kaua 21:22, 23) Ma n aron are taekinaki mai mwaina, a kabuekaki naba rabwataia aomata aika kakaonimaki tabeman imwini mateia, n aron rabwatan natin te Uea ae Tauro are Ionatan.
Te iango ae kairua: E a aki kona te Atua ni kauta te aomata ae kamannangaki rabwatana.
Te koaua: Ni kaineti ma kautaia maate, e na kautiia aomata te Atua, e ngae ngkana tao a kaiiaki, a kamannangaki, a bua i taari, ke a kanaki irouia maan ni kaakang. (Te Kaotioti 20:13) E bebete iroun Teuare Moan te Mwaaka manga karaoan rabwatan te aomata are kautaki ae boou.—1 I-Korinto 15:35, 38.