E Kamaiua te Aba Iesu—N te Aro Raa?
Ana kaeka te Baibara
E kamaiuia aomata aika kakaonimaki Iesu ngke e anga maiuna bwa te karea ni kaboomwi. (Mataio 20:28) Ngaia are te Baibara e arana Iesu bwa “te tia Kamaiuia kaain te aonnaba.” (1 Ioane 4:14) E taku naba: “Akea te kamaiu iroun te aomata riki temanna, bwa bon akea te ara riki teuana i aon te aba ae a anganaki aomata, ae ti kona ni kamaiuaki iai.”—Mwakuri 4:12.
E ‘katoonga te mate Iesu ibukia aomata nako’ ake a onimakinna. (Ebera 2:9; Ioane 3:16) Imwina ao “e kautia te Atua mai buakoia maate,” ao e okira karawa Iesu n rabwatana ae te taamnei. (Mwakuri 3:15) E a kona ikanne Iesu “ni kakororaoa kamaiuaia te koraki ake a kaania te Atua rinanona, ibukina bwa e teimatoa ni bubutii ibukia ngkai e teimatoa ni maiu.”—Ebera 7:25.
E aera ngkai ti kainnanoa Iesu bwa e na bubutii ibukira?
Bon taani bure ngaira ni kabane. (I-Rom 3:23) E riki te bure bwa te bwai n tutuki i marenara ma te Atua ao e kairiri nakon te mate. (I-Rom 6:23) Ma e riki Iesu bwa “te tia tei” ibukia naake a onimakina ana karea ni kaboomwi. (1 Ioane 2:1, kabwarabwara mai nano) E bubutii ibukia n tuanga te Atua bwa e na ongo aia tataro ao ni kabwarai aia bure ae boto i aoni maten Iesu are e anga iai ngaia. (Mataio 1:21; I-Rom 8:34) E kaekai bubutii aikai te Atua ake a roko mairoun Iesu ibukina bwa e boraoi ma Nanona. E kanakoaki Iesu iroun te Atua nakon te aonnaba “bwa a aonga ni kamaiuaki kaain te aonnaba [rinanona].”—Ioane 3:17.
E tau tii onimakinan Iesu bwa ti aonga ni kamaiuaki?
E aki. E ngae ngke ti riai n onimakina Iesu ibukini kamaiuara, ma e bati riki ae kainnanoaki irarikin anne. (Mwakuri 16:30, 31) E taku te Baibara: “N aron te rabwata bwa e mate ngkana akea te taamnei iai, ao ai aron naba te onimaki bwa e mate ngkana akea ana mwakuri.” (Iakobo 2:26) Ngkana ti na kamaiuaki ti riai:
N reiakina taekan Iesu ma Tamana ae Iehova.—Ioane 17:3.
Ni karikirakea onimakinaia.—Ioane 12:44; 14:1.
Ni kaotiota ara onimaki n arora n ongeaba ni baike a tua. (Ruka 6:46; 1 Ioane 2:17) E angareirei Iesu bwa a na aki bane naake a weteia bwa “Te Uea” ni kamaiuaki, ma a na tii kamaiuaki naake a “kakaraoa nanon [Tamana] are i karawa.”—Mataio 7:21.
Ti na teimatoa ni kaotiota ara onimaki n aki ongei kangaanga. E kamataataa anne Iesu ngke e kangai: “Ane e a tia n nanomwaaka ni karokoa te toki ao e na kamaiuaki.”—Mataio 24:13.