Tera ae A Nanonaki ni Waare Aika n te Baibara? E Boboto Man te Baibara te Numerology ae Kakaaean Nanon Taiani Ware?
Ana kaeka te Baibara
A kona n iaiangoaki taiani ware n te Baibara bwa bon tii waare, ma n tabetai a tei ibukini bwaai tabeua. E kaokaotaki n tein te rongorongo bwa te ware anne e tei ibukin te bwai teuana ke bon tii te ware. Nori katoto aikai ibukini waare aika n te Baibara, ao nanoia n te aro ni kaikonaki:
1 Te katiteuanaaki. N te katoto, e tataro Iesu nakon te Atua ibukia taan rimwina ni kangai: A na “bane n riki n teuana, n arom Tamau ae ko katiteuanaaki ma ngai, ao I katiteuanaaki ma ngkoe.”—Ioane 17:21; Mataio 19:6.
2 N tain te boowi, e na kamatoaaki koauan te bwai teuana irouia taani kakoaua aika uoman. (Te Tua-Kaua 17:6) N aron naba anne, ngkana uoua okiokin te miitara ke te kibuntaeka teuana, e a kamatoaaki iai bwa e boni koaua te baenne. N te katoto, ngke e kabwaraa miin te Barao are mai Aikubita Ioteba, ao e taku: “E kamiiaki Barao uoua te tai ibukina bwa e kamatoaaki raoi te baei iroun te Atua ae koaua.” (Karikani Bwaai 41:32) N te taetae ni burabeti, ‘kooro aika uaai’ a kona n tei ibukin tautaeka aika uoua, n aron are tuangaki te burabeti are Taniera ni kaineti ma Miria ao Botia.—Taniera 8:20, 21; Te Kaotioti 13:11.
3 N aroia taani kakoaua aika teniman aika kamatoaa raoi etin te bwai teuana, kaokiokan te bwai tentai, e taraa ni kamatoaa raoi ke ni katuruturua raoi te bwai anne.—Etekiera 21:27; Mwakuri 10:9-16; Te Kaotioti 4:8; 8:13.
4 E kona n tei te ware aei ibukin te bwai teuana ae tabwanin raoi arona, ke e kakororaoa raoi te baere e kantaningaaki bwa e na karaoia. N te katoto, “angin te aonnaba ake aua” e tei ibukin aang aika urubwai ake a roko man iteran te aonnaba ake aua, ae nanonaki iai man iterana nako, ao e kabutaa te aonnaba ana urubwai.—Te Kaotioti 7:1; 21:16; Itaia 11:12.
6 Teuana te kee i aan itiua are tei n taai nako ibukin te bae tabwanin, e kona ngkanne n tei onoua ibukin te bae aki tabwanin ke e aki kororaoi ke te bae irekereke ma taani kairiribai nakon te Atua.—1 Rongorongo 20:6; Taniera 3:1; Te Kaotioti 13:18.
7 E kakabonganaaki te ware aei n tei ibukin te bae tabwanin raoi. N te katoto, e tua te Atua nakoia I-Iteraera bwa a na mwaati n raaunia Ieriko ni katoabong i nanon itibong. Ao n te kaitiua ni bong a na mwaati n raaunia itiua te tai. (Iotua 6:15) A bati naba katoto n te Baibara n aron aikai aika kabongana te ware ae itua. (Nakoaia Ibonga 4:6; 25:8; 26:18; Taian Areru 119:164; Te Kaotioti 1:20; 13:1; 17:10) Ngke e tuangaki Betero iroun Iesu bwa e riai ni kabwaraa ana bure tarina ao e aki tuangaki bwa “nakon itiua te tai, ma nakon 77 te tai,” ae nanona bwa kaokiokan “itiua” e oti iai te iango ae “akea tiatianakina.”—Mataio 18:21, 22.
10 E kona n tei te ware aei ibukin tabwaninin ke ikotani mwaitini bwaai ke aomata aika iangoaki bwa te rabwata ae tii teuana.—Te Otinako 34:28; Ruka 19:13; Te Kaotioti 2:10.
12 E taraa n tei te ware aei ibukin ana babaire ae tabwanin raoi te Atua. N te katoto, te miitara ibukini karawa are kaotaki nakon te abotoro Ioane, e kaotaki naba iai te kaawa teuana ma “atibu aika tebwi ma uoua aika a aana oon te kaawa, ae iai aara aika tebwi ma uoua i aoia, ake araia ana abotoro te Tiibutetei ake tengaun ma uoman.” (Te Kaotioti 21:14; Karikani Bwaai 49:28) Okiokin te ware ae 12 e kona n nanona te babaire naba ae tabwanin raoi.—Te Kaotioti 4:4; 7:4-8.
40 Taiani motikitaeka tabeua ke maanin te katuuaa a irekereke ma te ware ae 40.—Karikani Bwaai 7:4; Etekiera 29:11, 12.
Te Numerology ao Gematria ae Kakaaean Nanon Taiani Ware
Waare ni kaikonaki aika iai nanoia aika n te Baibara aikai, a kaokoro ma te numerology ae te waaki n tabunea ae irekereke ma kaiwanakin nanon taian nambwa ae irekereke ma te tabunea. N te katoto, a nenera te Koroboki ae Tabu n te Taetae n Ebera I-Iutaia aika taiani Cabalists ni kabongana te anga ae aranaki bwa te gematria, ae irekereke ma kakaaean taiani kanikina aika karabaaki ni waare aika titeboo teia ma manin te koroboki. Te Numerology bon rinanin naba te kaiwa ae kabuakakaaki iroun te Atua.—Te Tua-Kaua 18:10-12.