Baika Riki Ngkana E a Kaani Mate te Aomata​—Tera ae A Aki Nanonaki Iai?

Ana kaeka te Baibara

A bati aomata ake a a tia ni kuri ni mate ake a taku bwa a uringnga ae a a tia ni maenako ma rabwataia, ke a nora te oota ae otamwaaka ke te tabo ae rangi n tamaroa. E taekinaki n te boki ae Recollections of Death bwa ‘tabeman a iangoa te baenne bwa te kakabwaia ike a kona n nora iai te aonnaba teuana.’ E ngae ngke a aki taekinaki n te Baibara baika riki ngkana e a kaani mate te aomata, ma iai te koaua ae kakawaki iai ae kaotia bwa baikanne bon tiaki norakin te maiu are imwina.

A aki ataa te bwai teuana maate.

E taku te Baibara bwa a “aki ataa te bwai teuana” akana mate. (Te Minita 9:5) Ngkana ti a mate, ti aki mwaing nakon te tabo teuana ke e teimatoa ni maiu iai ara iango, ma ti a boni mate. E aki nako man te Baibara te angareirei are iai taamneira ae maiu nako naba imwini matera. (Etekiera 18:4) Ngaia are ngkana ti a kaani mate, ti bon aki kona n nora karawa, moone, ke te maiu are imwin te mate.

Tera ana taeka Rataro ibukin te maiu are imwin te mate?

E kabwarabwaraaki taekan raoi te mate n rongorongon Rataro ae n te Baibara: E kautaki iroun Iesu imwin abong ana bong ni mate. (Ioane 11:38-​44) Ngke arona bwa e rangi ni kukurei Rataro ni maiuna are imwini matena, e a ribuaka ngkanne Iesu ngke e a manga kautia ao ni kaokia nakon te aonnaba. Ma akea n te Baibara ana taeka Rataro ni kaineti ma te maiu are imwin te mate. E na boni karakina te maiu are imwini matena Rataro ngke arona bwa e noria. Ao Iesu naba e kabwarabwaraa maten Rataro bwa kaanga te matu, are e oti iai bwa ngke e mate Rataro ao bon akea te bwai teuana ae ataia.​—Ioane 11:11-​14.