A Kona Kristian ni Kabongana Bwaini Babairean te Utu?

Ana kaeka te Baibara

E aki tua Iesu nakoia taan rimwina bwa a na kariki ke a na aki. A aki tua naba karaoan anne taan rimwin Iesu. E aki naba kabuakakaa kabonganaani bwaini kamarangaan te kariki, te Baibara. Ni kaineti ma aei ao e katereaki ae kangai n te boto n reirei ae n I-Rom 14:12: “Ti na angan te Atua taekan arora ngaira n tatabemanira nako.”

Mangaia are a inaomata taanga ni baireia bwa a na karekeia natiia ke a na aki. A kona naba ni baireia bwa iraman natiia ae a na karikiia ao n ningai ae a na kariki iai. Ngkana a baireia taanga bwa a na kamanena bwaini babairean te utu n tuka te bikoukou ae aki irekereke ma kabwakaan te teei, e a bon nakoia bairean anne ao bon tabeia. Akea ae e na kabuakakaia.—I-Rom 14:4, 10-13.