NASA Photo
TEIMATOA N TANTANI!
Iai te Tautaeka ae Nakoraoi Ana Kairiri ae E Kona n Tautaekana Ara Buraneti?—Tera ae E Taekinna te Baibara?
A a rinanoni bitaki aika kamangaongao tautaeka nako n te aonnaba. A rotakibuaka naba tautaeka n aaba ake a taraa n nakoraoi aroia, ibukin rongorongo aika kamaamaa ake a karioaki ibukia taani kairiri tabeman, ibukin te rinerine ae karako iai mwaitiia taan rinea te tia kairiri, ibukin te ikakaiwi ni kaokoron iango ni kaineti ma ana waaki te tautaeka, ao ibukini mwaati ni kaotinano aika iowawa irouia aomata.
E taekinna te Baibara bwa iai te tautaeka teuana ae e nakoraoi ana kairiri. Ko a bae n tia n ongo taekana. E mwaneweia Iesu Kristo n ana tataro ni katoto.
“Ma kam riai n tataro n aron aei: ‘Tamara are i karawa, e bia katabuaki aram. E bia roko am Tautaeka n Uea. E na kakororaoaki nanom i karawa ao n te aonnaba naba.’”—Mataio 6:9, 10.
Tera ae e taekinna te Baibara ibukin te Tautaeka n Uea anne?
Te Tautaeka n Uea—te tautaeka ae nakoraoi ana kairiri
E kairiri mai karawa te Tautaeka n Uea aei.
E arana te tautaeka anne Iesu bwa “te Tautaeka n Uea ae bwaini karawa.” (Mataio 4:17; 5:3, 10, 19, 20) Anne bukina ngke e kangai: “Tiaki ana bwai te aba au Tautaeka n Uea.”—Ioane 18:36.
E na onei mwin aia tautaeka aomata te Tautaeka n Uea aei.
E taku te Baibara: “Te tautaeka n uea aei . . . e na urui tautaeka n uea aikai [aia tautaeka aomata] ni kabane ma ni kamaunai, ao tii te tautaeka aei ae e na teimatoa n aki toki.”—Taniera 2:44.
E na bon aki kamaunaaki te Tautaeka aei ma te Uea iai ae Iesu Kristo.
E taku te Baibara: “Mwaakana n tautaeka bon te mwaaka n tautaeka ae akea tokina ae e na aki nako, ao e na bon aki kamaunaaki ana tautaeka n uea.”—Taniera 7:13, 14.
E na karekea te rau ma te mweraoi n te aonnaba te Tautaeka n Uea aei.
E taku te Baibara: “E na maeka n rau temanna ma temanna i aan arokana ae te kureebe ao i aan arokana ae te biiku, ao akea temanna ae e na kakamaakuia.”—Mika 4:4, Good News Translation.
Reiakina riki taekan te Tautaeka n Uea aei
Ni menan Iesu i aon te aba, ao e kabanea angiin ana tai “n tataekina te rongorongo ae raoiroi ae taekan te Tautaeka n Uea.” (Mataio 9:35) E taetae ni burabetinna naba bwa:
“E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”—Mataio 24:14.
Ni boong aikai ao e a tabe n tataekinaki te rongorongo ae raoiroi ibukin te Tautaeka n Uea aei, n aaba aika e raka i aon 240 mwaitiia. Ti kaoko bwa ko na reiakina riki taekan te tautaeka aei ma kakabwaia aika ko na karekei man ana waaki ni kairiri.
Taiaoka mataku n te taamnei ae Tera Ana Tautaeka n Uea te Atua?