E a Kerikaaki 73 te Katebubua Mwaitiia Maan i Nanon 50 te Ririki—Tera ae E Taekinna te Baibara?

E otinako te ribooti ae kararaoma man te World Wildlife Fund n Okitobwa 9, 2024, are e a kaotaki iai rotakibuakaia maan imwin aia mwakuri aomata. E katereaki iai bwa “i nanon 50 te ririki n nako (1970-2020), ao e noraki bwa 73% kerikaakini mwaitiia maan ake a tauaki mwia.” E anga te kauring te ribooti aei ni kangai: “Ti kona n taekinna ma te koaua bwa baika a na riki nimaua te ririki mangkai, a nang rota aron te maiu n te Aonnaba.”

Iai bukina ae riai ngkai a kubanako aomata aika bati n ribooti aikai. Ti tangira ara buraneti ae tikauarerei aio ao a rawawata nanora ngkana a rotakibuaka maan n aekaia nako. Ti namakina aei ibukina bwa e karikira te Atua ma kantaningaan are ti na tararuaia maan.—Karikani Bwaai 1:27, 28; Taeka N Rabakau 12:10.

Ko na bae n iangoa aei, ‘Ti na boni kona ni kamanoia maan aika n te aonnaba? Tera ae e taekinna te Baibara?’

Te kantaninga ibukin taai aika imwaira

Bon tii te Atua ae e kona ni kamanoia maan, e ngae ngke ti kabanei korakorara ni kani karaoa anne. E a kaman taekinna te Baibara n Te Kaotioti 11:18, bwa e “na kamaunaia . . . te koraki ake a urua te aonnaba” te Atua. Aikai reireiara aika uoua man te kibu anne:

1. E na katokiia aomata te Atua man urubekean ke kamaunaan te aonnaba.
2. E na waekoa te Atua ni karaoa anne. Ti kangaa n ataia? Ibukina bwa e a korakora riki ngkai aia konabwai aomata ni karuanikaia maiuia maan.

Tera aron te Atua ni kanakoraoa te kangaanga aei? E na kabongana ana tautaeka i karawa ke te Tautaeka n Uea, n taua iai taekan te aonnaba ni kabutaa. (Mataio 6:10) A na reireiaki iai aomata aika ongeaba ao ni kataneiaaki bwa a na rabakau n tararuaia maan ao ni kamanoia.—Itaia 11:9.