Taobaraa Namakinan ae Ko a Tiku n Tii Ngkoe n Arom ni Buokiia Tabemwaang​—⁠Te Bwai ae E Taekinna te Baibara

A namakinna aomata nako bwa a a tiku n tii ngaiia ao ni katinanikuaki mairouia tabemwaang. A kakoauaa taan rabakau ibukini marurungia aomata bwa te anga ae e na taobaraa te namakin anne, boni buokaia tabemwaang.

• “Buokaia aomata ake a boni kainnanoa te ibuobuoki, e kona ni kakerikaaka namakinan ae ti a tiku n tii ngaira ke namakinan te katinanikuaki.”​—U.S. National Institutes of Health.

E anga taeka n reirei aika manena te Baibara ni kaineti ma baika ti kona ni karaoi ni buokiia iai tabemwaang. E kona maiuakinan ana taeka te Baibara ni buokira n taobaraa namakinan ae ti a tiku n tii ngaira.

Te bwai ae ko kona ni karaoia

Bwaina te tituaraoi. Ukeri aanga ake ko na kabanea iai am tai ma tabemwaang, e a moamoa riki te kaai n ikotaki ma ngaiia. Tatauraoi n tibwai nakoia baika iai iroum. A na boni bae ni kakaitauko ngkana ko karaoa anne ao e na kona n reke iai reitakimi ae kaan.

• Ana boto n reirei te Baibara: “Teimatoa n anganga ao ane kam na manga anganaki irouia aomata.”​—Ruka 6:38.

Kabongana korakoram ni buokiia tabemwaang. Kakaaei aanga ake ko na kona ni buokiia iai ake a karawawataaki. E kona n nanonaki n anne, arom ni kakauongo ma te nanoanga nakoia ke karaoani mwakuri ake a na kabebeteaki iai.

• Ana boto n reirei te Baibara: “E tatauraoi n anga ana buoka te rao ni koaua, n taai nako.”​—Taeka N Rabakau 17:​17, Contemporary English Version.

Ngkana ko kan ota riki ibukini kateimatoaan reken te itoman ae raoiroi ma tabemwaang, wareka te kaongora ae “Te Maiu n Utu ao te Reitaki ma Aomata.”