E a Bua Onimakinaia Taani Kairiri n te Tautaeka​—Tera ae E Taekinna te Baibara?

E noraki birirakeni mwaitin te rinerine ni katobibia te aonnaba n te ririki 2024. Ma a bati aomata ake e a bua irouia onimakinaia taani kairiri n te tautaeka.

• A taekinna angia I-Amerika n te kakaae teuana bwa “a kairaki n te bangaomata angia taani kairiri n te tautaeka,” n oneani mwin are a na karaoi baika raraoi ibukia aomata.a​—Pew Research Center, Tebetembwa 19, 2023.

A mwaiti naba rooro n rikirake aika aikoa onimakinia taani kairiri n te tautaeka.

• “A aki toki te roro ae tebwi tabun aia ririki ni kakakaaei angan tokini kangaanga aika kakawaki, ma a taekinna n ribooti tabeua bwa a aki kakaraoa anne taani kairiri n te tautaeka.”​—The New York Times, Tianuare 29, 2024.

• “A taekinaki rooro n rikirake n te kakaae teuana bwa a onimakinia riki naake a kakatokai taamnei ma rongorongo n te intanete, n oneani mwin are a na onimakinia taani kairiri n te tautaeka.”​—The Korea Times, Tianuare 22, 2024.

Ti kona n onimakinia taani kairiri n te tautaeka ibukini kanakoraoan taai aika imwaira? Antai ae ti na onimakinna?

Taratara raoi n rinean ae ko na onimakinna

E bon riai bwa a na taratara raoi aomata n rinean ae a na onimakinna. E taku te Baibara bwa “e kakoauai taeka nako te aomata ae nanoroo, ma e iaiangoa raoi nakonakona te aomata ae ataibwai.”​—Taeka N Rabakau 14:15.

• Ibukini buokam ni motinnanoia bwa te rongorongo raa ae koaua ke ae kewe, wareka te kaongora ae “Protect Yourself From Misinformation.”

Irarikin anne, e ngae naba ngkana a bwabwaina te koaua taani kairiri n te tautaeka ke a karaoa nanon tibwangaia, ma a bon aki kona ni kakororaoi baika a kani karaoi. Anne bukina ngkai e anga ana kauring ni kangai te Baibara:

• “Tai onimakinia taani kairiri n te tautaeka; e bon aki kona ni kamaiuko te aomata temanna.”​—Taian Areru 146:​3, Good News Translation.

Te tia kairiri ae ko kona n onimakinna

E kabwarabwaraaki n te Baibara bwa e a tia te Atua n rinea te tia kairiri ae kororaoi ana konabwai ao ni kona n onimakinaki: Iesu Kristo. (Ruka 1:​32, 33) Iesu bon te Uea n Ana Tautaeka n Uea te Atua, ae te tautaeka ae e na kairiri mai karawa.​—Mataio 6:10.

• Reiakinna bwa e aera ngkai ko kona n onimakina Iesu ao tera ae e na karaoia ni katoki kangaanga aika ti kaaitarai ni maiura. Wareki kaongora aika “Antai te Uea n Ana Tautaeka n Uea te Atua?” ao “Tera ae E na Kakororaoia Ana Tautaeka n Uea te Atua?”