Anton Petrus/Moment via Getty Images
TEIMATOA N TANTANI!
E a Kaan Rokon te Buaka ae E na Kabutaa te Aonnaba?—Tera ae E Taekinna te Baibara?
A mwaiti aomata aika namakinna 30 te ririki n nako, bwa iai te nakoraoi ae reke i marenaia aaba aika kakaokoro. Ma taraan ae e aki koaua anne ni kaineti ma baika riki n taai aikai.
“A tabeaianga aomata n te boo ni buaka ae kaineti ma Gaza, bwa n aia iango, e na bae n rotii aaba tabeua ake a uakaan ma tian Lebanon, kioina ngkai anne te tabo are a a moana iai aia itabarara Iteraera ma Hezbollah.”—Reuters, Tianuare 6, 2024.
“Kurubu n aomata ake a a kairiraki i aani mwaakan Iran, a a tabe ngkai ni karaoi mwakuri n akiako n taabo aika kakaokoro ao e a manga karina ni karaoi ana bwai ni buaka aika mwaakaroiroi Iran. Irarikin anne, a a riki ngkai Rutia ma Tiaina bwa ana itoman Iran. Aei are e a kauekea te raraoma irouia aaba ake mai maeao.”—The New York Times, Tianuare 7, 2024.
“E teimatoa ni waakinako ana mwakuri n urubwai Rutia i aon Ukraine.”—UN News, Tianuare 11, 2024.
“Rikirakeni kaubwain Tiaina ma ana taanga ni buaka, rikiraken ana nanonnaba Taiwan ma kainikatongana, ao ai rikiraken te aki boraoi n iango i marenan Tiaina ao Amerika, a a kona ni kauekea te itabarara ae karina.”—The Japan Times, Tianuare 9, 2024.
Iai ana taeka te Baibara ni kaineti ma te aki nakoraoi i marenaia aaba n te aonnaba ae ti a noria ngkai? E nang kairiri aei nakon te buaka ae e na kabutaa te aonnaba?
E a kaman taekini baika a a riki ngkai te Baibara
E aki taekinna te Baibara bwa aekara tein te buaka ae ti na noria ni boong aikai. Ma e a kaman taekina butanakon te buaka ae kangaanga katokana ae ti a nora rikina ngkai ae e a “uotaanako te rau man te aonnaba.”—Te Kaotioti 6:4.
E a kaman taekinna te boki ae Taniera bwa “n tain te toki,” a na “inotunotu” ke n uaiakina te kan toka i eta, tautaekan te aonnaba aika kakaaitara i marenaia. Aia itabarara anne, e a kairiia bwa a na kaotaraea korakoran aia bwai ni buaka ma aia taanga ni buaka ao ni kabanebuakai baika “kakawaki” ke aia mwane iai.—Taniera 11:40, 42, 43.
Te buaka ae nangi roko
E katerea te Baibara bwa e na rikirake moa ni buakaka te waaki n te aonnaba imwain rikiraken raoiroina. E a kaman taekinna Iesu “bwa e na roko te rawawata ae korakora ae tuai ni kaoti mangke e moani karikaki te aonnaba.” (Mataio 24:21) E na kairira te “rawawata ae korakora” aei nakon te buaka ae aranaki bwa Aremaketon, ae kabwarabwaraaki bwa “te buaka n te bong ae kakannato ae ana bong te Atua ae Moan te Mwaaka.”—Te Kaotioti 16:14, 16.
Ma e na kamaiuia te botannaomata Aremaketon, e na aki kamaunaia. E nang katoka aia kairiri aomata te Atua rinanon te buaka anne, ibukina bwa boni ngaiia ake a rangi ni kabatiai rikini buaka aika urubwai. Ngkana ko kan ataia riki bwa e na kangaa Aremaketon ni karekea te rau ae akea tokina, wareki kaongora aikai: