Te Buaka i Ukraine, E a Karika Taren te Amwarake n te Aonnaba

Ni Mei 19, 2022, ao e ongo te botaki ae te United Nations Security Council mairouia bwakuakun te tautaeka aika 75 mwaitiia bwa “taren te amwarake n te aonnaba are e riki mani butinakon te COVID-19 ma bitakini kanoani boong, e a korakora riki ngkai ibukin te buaka are i Ukraine.” Imwin anne, e taekinaki n te nuutibeeba ae, The Economist bwa “i rarikini kangaanga nako ake a riki n te aonnaba man te buaka, e nang bati riki ngkai mwaitiia aomata aika a na rotaki n aki taun te amwarake.” E a kaman taekina anne te Baibara, ae e na riki te kangaanga ma aki taun te amwarake ni boong aikai, ma e anganira naba taeka n ibuobuoki ibukini kaitaraan te kangaanga anne.

E a Kaman Taekina te Kangaanga ma Aki Taun te Amwarake te Baibara

•  E taetae ni burabetinna Iesu bwa: “E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana, ao a na roko roongo.”—Mataio 24:7.

•  E kabwarabwaraaki ni bokin Te Kaotioti taekaia taan toka i aoia aoti aika aman. E kaikonakaki temanna mai buakoia bwa e tei ibukin te buaka. E rimwiaki iroun are e tei ibukin te rongo, ae te tai are e nang bwaunanaki iai te amwarake ao ni kabooaki nako ni boo aika bobuaka. “I a nora te aoti ae roroo, ao iai te kainikatine i bain teuare e toka i aona. I ongo te bwanaa . . . ae kangai: “Boon teuana te kuate ni uita bon titeboo ma mwaitin am bwakabwai n tebongina! Ao boon tenua te kuate ni baare bon titeboo ma mwaitin am bwakabwai n tebongina naba.’”—Te Kaotioti 6:5, 6, Contemporary English Version.

Ana taetae ni burabeti te Baibara ibukin aki taun te amwarake, e a noraki ngkai kakoroani bukina n te tai ae e a aranaki n te Baibara bwa “kabaneani boong.” (2 Timoteo 3:1) Ibukini kabwarabwaraan riki “kabaneani boong” ao taan toka i aoia aoti aika aman ake n Te Kaotioti, mataku n te taamnei ae E a Bitaki te Waaki n te Aonnaba Man 1914 ao wareka te kaongora ae “Taan Toka I Aoia Aoti Aika Aman—Antai Ngaiia?”

Aron te Baibara ni Buokiko

•  E anga taeka n reirei aika manena te Baibara, ake a na kona ni buokiko ni kaaitarai kangaanga, n aron rikirakeni bobuakani boon amwarake ke aki taun te amwarake. Nori katoto akana n te kaongora ae “How to Live on Less.”

•  E anga te kantaninga te Baibara n taekinna are a na bon nakoraoi bwaai nako. E beritanaki iai te tai are “e na bati te uita n te aonnaba, ao e na taonako i aon taubukini maunga” ao e nang riao taun te amwarake ibukia aomata nako. (Taian Areru 72:16) Ibukin reiakinan riki te kantaninga man te Baibara ibukin taai aika imwaira ao bukina ngkai ko riai n onimakina anne, wareka te kaongora ae “A Real Hope for a Better Tomorrow.”