“Kakoauaan Iesu”—Ko a Kamaiuaki Naba Tii Mani Kakoauaan Iesu?
Ana kaeka te Baibara
A kakoauaa Kristian bwa e mate Iesu ibukin aia bure aomata. (1 Betero 3:18) Ma e bati riki ae kainnanoaki n te kamaiuaki nakon ae tii kakoauaan Iesu bwa te tia Kamaiu. A ataia taimonio ae Iesu bon “Natin te Atua” ma a na boni kamaunaaki naba, a na aki kamaiuaki.—Ruka 4:41; Iuta 6.
Tera ae N na karaoia bwa I aonga ni kamaiuaki?
Ko riai ni kakoauaa ae e kareana maiuna Iesu ibukin ara bure. (Mwakuri 16:30, 31; 1 Ioane 2:2) E nanonaki naba n aei kakoauaan ae e bon riki n aomata ngkoa Iesu, ao a bane n eti rongorongona ake n te Baibara.
Reiakina ana reirei ni koaua te Baibara. (2 Timoteo 3:15) E taekinaki n te Baibara bwa a tuanga te tia tararuaiia buure te abotoro Bauro ao Tira ni kangai: “Kakoauaa te Uea ae Iesu ao ko na kamaiuaki.” Imwin anne ao a a moana aia angareirei n “ana taeka Iehova”a nakon te tia tararuaiia buure. (Mwakuri 16:31, 32) E oti n aei bwa e aki kona ni kakoauaa raoi Iesu te tia tararuaiia buure aei ni karokoa ae e karekea ana atatai ni moan reirei man Ana Taeka te Atua. E riai n reke ana atatai ae eti ae boto i aon te Baibara.—1 Timoteo 2:3, 4.
Raira nanom. (Mwakuri 3:19) Ko riai naba n raira nanom, ke n rangi n rawawata n aroarom ao n am mwakuri aika kairua n taai aika nako. E na otara am rairannano irouia aomata ngkai ko a katoki karaoani mwakuri ake e aki kukurei iai te Atua, ao ni karaoi “mwakuri aika boraoi ma te rairannano.”—Mwakuri 26:20.
Bwabetitoaki. (Mataio 28:19) E taku Iesu bwa a na bwabetitoaki naake a riki bwa taan rimwina. E boni bwabetitoaki te tia tararuaiia buure are taekinaki mai mwaina. (Mwakuri 16:33) N aron naba anne, imwin reireinakia te koraki aika bati iroun te abotoro Betero te koaua ibukin Iesu, ao a “a bwabetitoaki te koraki ake a butimwaei ana taeka ma te kukurei.”—Mwakuri 2:40, 41.
Ongeaba n ana kaetieti Iesu. (Ebera 5:9) A kaotia n anuani maiuia te koraki ake a “kakairi ni bwaai ni kabane” ake e tua Iesu, bwa bon taan rimwina ngaiia. (Mataio 28:20) A riki bwa “taan toua mwin te taeka, ao tiaki tii taan ongora.”—Iakobo 1:22.
Nanomwaaka ni karokoa te toki. (Mareko 13:13) A “kainnanoa te nanomwaaka” taan rimwin Iesu bwa a aonga ni kamaiuaki. (Ebera 10:36) N te katoto, e teimatoa n ongeaba raoi te abotoro Bauro nakon ana reirei Iesu ao ni kakaonimaki nakon te Atua, ao e nanomwaaka ni karaoa anne man te bong are e riki iai bwa te Kristian n uaa matena.—1 I-Korinto 9:27.
Tera aron “Ana Tataro te Tia Bure”?
N Aaro tabeua ao a kakabonganai aeka n tataro tabeua n aron ana “Tataro te Tia Bure” ao te “Tataro Ibukin te Kamaiuaki.” E oti n tataro aikai taekan ae a bubure ao a onimakina ae e mate Iesu ibukin aia bure. A butiia naba Iesu bwa e na rin i nanoia ke ni maiuia. Ma Akea n te Baibara taekan Ana Tataro te Tia Bure, ao e aki naba boutokaaki iai kakaraoan te tataro aei.
A iangoia aomata tabeman bwa imwini kaokiokan “Ana Tataro te Tia Bure” ao e a kona naba n reke kamaiuan te aomata ane tataro anne. Ma bon akea ae e kona ni kamaiuaki tii ibukin ae e tataro. Ngkai aomata ngaira aika ti aki kororaoi, ti na bon teimatoa ni kakairua. (1 Ioane 1:8) Anne bukina ae e reireinia taan rimwina Iesu bwa a na tatataro ibukini kabwaraan aia bure. (Ruka 11:2, 4) Ao riki, a kona ni kabuaa maiuia Kristian tabeman ake a na boni maiu n aki toki, ibukina bwa a a tannako mairoun te Atua.—Ebera 6:4-6; 2 Betero 2:20, 21.
E moan reke mai ia “Ana Tataro te Tia Bure”?
A bobuaka n iango taani korea rongorongon rimoa bwa e moan reke mai iai “Ana Tataro te Tia Bure.” A taku tabeman bwa e moan reke n tain Tein te Aro ni Boretetanti. A kakoauaa tabeman bwa a moana aomata kabonganaan “Ana Tataro te Tia Bure” n te ka-18 ao n te ka-19 n tienture. Ma e bon aki boutokaaki te aekaki n tataro anne n te Baibara, ao e boni kauntaba ma ana reirei te Baibara.
a Iehova bon aran te Atua ae kaotaki n te Baibara.