Tera ae Taekinaki n te Baibara ni Kaineti ma te Tekateka ao n Aki Mare?

Ana kaeka te Baibara

E taku te Baibara bwa bon nanon te Atua bwa a na “rawa nakon te wene ni bure” aomata. (1 I-Tetaronike 4:3) N te Baibara ao te taeka ae “wene ni bure” e nanonaki naba iai te wene ni kimoa, te wene ni bure i marenaia aomata aika titeboo aroia ni mwaane ke n aine, ao te wene n taanga i marenan te mwaane ma te aine aika tuai ni mareaki.

• E aera bwa e tabe te Atua ma aroia raao bwa a mareaki ke a aki?

• Tera aroia raao aika tekateka i mwaini mareia ibukin tuoan aroia bwa e na nakoraoi ngkana a mare ke e na aki?

• A na kangaa taanga ni karekea aia mare ae nakoraoi?

E aera bwa e tabe te Atua ma aroia raao bwa a mareaki ke a aki?

• Boni mairoun te Atua te babaire ae te mare. E moani karaoia ngke e ikotiia ara moan aomata. (Karikani Bwaai 2:22-24) E aki iangoia bwa e na tekateka te mwaane ma te aine ao n aki mare.

• E ataa ae te kabanea n tamaroa ibukia aomata te Atua. E karaoa te mare te Atua bwa te bwai ni kabaebae ae e na teimatoa, i marenan te mwaane ma te aine, ao a na kakabwaiaaki iai ao ni kamanoaki iai kaain te utu. Iangoa te kaikonaki ae bebete aei: N aron taiani kaetieti aika ko karekei mairoun te tia karaobwai ae kaota nakoim aroni katomatomaan raoi ana karaobwai teuana, ai aron naba taiani kaetieti mairoun te Atua bwa a tuangira arora ni kanakoraoa ara reitaki n ara utu.​—Itaia 48:17, 18.

  

• Te wene n taanga i tinanikun te mare e kona ni karekei mwina aika kakaiaki. N te katoto, e kona ni karekea te bikoukou ae aki kantaningaaki, aorakin te wene n taanga aika ewewe, ao ai te uruakinnano.a

• E angania mwaane ao aine te Atua te konaa ni kakariki, rinanon te wene n taanga. E iangoa te maiu te Atua bwa te bwai ae tabu, ao te konaa ni kakariki bwa te bwaintangira ae rangi ni kakawaki. E tangirira te Atua bwa ti na karinea te bwaintangira anne n arora ni karinea ana babaire ibukin te mare.​—Ebera 13:4.

Tera aroia raao aika tekateka i mwaini mareia ibukin tuoan aroia bwa e na nakoraoi ngkana a mare ke e na aki?

Ibukini kanakoraoan te utu, e aki kainnanoaki irouia raao bwa a na kaai moa n tekateka n taanga tabeua te tai imwaini mareia. Ma e nakoraoi te reitaki ngkana a uaia raao ni kakoroa nanon aia berita i marenaia ao ni kaai ni mwakuria aroia n tokanikai i aoni kangaanga.b Te mare e a kamatoaa riki te berita i marenaia taanga.​—Mataio 19:6.

A na kangaa taanga ni karekea aia mare ae nakoraoi?

Akea te mare ae kororaoi. Ma a kona taanga ni kanakoraoa aia mare ngkana a maiuakin ana taeka n reirei te Baibara. Aikai katoto tabeua:

• Moanibwaia kainnanoni buum ao tiaki oini kainnanom.​—1 I-Korinto 7:3-5; I-Biribi 2:3, 4.

• Karikirakea te tangira ao te karinerine i marenami.​—I-Ebeto 5:25, 33.

• Reireiniko n tiatiana am taetaenikawai.​—Taeka N Rabakau 12:18.

• Taotaona nanom ao waekoa ni kabwarabure.​—I-Korote 3:13, 14.