I Kariaia Bwa E na Katamaroaa Arou Iehova

A bati baike I nori ma e rangi n anaaki riki nanou irouia aomata ake a mwakuri ikai. A mwakuri ikai taari mwaane ao aine aika ataei ni karaoa te bwai ae taraa ni kabotu. E aki noraki aia mwakuri. Ma a kukurei ao n rau nanoia. E reke reireiau n aia katoto ibukin te bae nanonaki raoi n te beku iroun te Atua ma te nanorinano.

I nanon ririki aika bati, e a tia Iehova ni katamaroaa arou bwa N na riki bwa ana toro ae tamaroa riki. Ma N na karakina moa rongorongoni kakaaean te koaua irou ngke I kaaina te Aro ni Buddhist.

I KAKAAEA TE ATUA NGKE I UAREREKE

I bungiaki ao ni kaikawaaki i Chicago, Illinois, U.S.A., ao te karimoa ngai i buakoia tariu ao mwaaneu. A mwaing au karo nako Chicago mai Tiaban ibukin uaiakinan te maiu ae tamaroa riki i Amerika. A tangiriia natiia bwa a na karekea te reirei ae te kabanea n tamaroa ao ni kukurei ni maiuia.

A rangi ni matoatoa au karo n aia Aro ae te Buddhist. E kaikawaaki tinau ni mwengana ae iai naba te tembora ni Buddhist iai. A beku tamana ao mwaanena aika uoman bwa mataniwi n te Aro ni Buddhist. Ngaia are e rangi ni kakawaki irou te Aro ni Buddhist ngke I uarereke. Te moanibwai ae I riai ni karaoia ngkana I okira mwengau man te reirei, boni kabuekani baika boiarara ao n anga au karea ae te raiti ao te ran nakon atuara ni Buddhist. Ni katoa Taabati ao ti nanako n te tembora ao n tataro nakon atuara are titeboo ma are n ara auti ma tii kaokorona bwa e rangi ni bubura riki ao e karaoaki man te koora.

Ngke tao ai itiua au ririki ao I uringnga ae I karaua n tataraa te bouannanti are n ara auti ao I iango i bon irou ni kangai, ‘E na tera aroni maiuu ngkana I a mate?’ I reireinaki n te Aro ni Buddhist bwa N na manga maiu n te aba n taamnei teuana imwini mateu. I a tibwa iangoia ae iai te tai ae N na mate iai. Tao I kona n riki bwa te taamnei ae aki mamate ma I aki manga nora kakukurein te maiu n aomata. Ai kananokawakira! I a taonakinako n namakinan ae akea te bae I kona ni karaoia n tuka rikina.

Ngke ai tebwi tabun au ririki, I a namakinna ai akea uaan te waaki n taromauri ni Buddhist. Iai te bwai ae e tuai n reke ni maiuu. (Mat. 5:3) Irou ngai I ataia ae bon iai te Atua ae mwaaka ae maiu ao I kani karekea ataakina. I iangoia bwa tao a kona n reke kaekaan au titiraki n te Baibara. Ngaia are I a kabooa au Baibara ae te King James Version n ana botaki teuana te Buddhist, ae te tabo ae ko aki kona ni kabooa te Baibara iai!

Ngke 17 au ririki ao e kawarai te tari te mwaane ae Wilson Bashou ngke I ririanna n te kawai ma au kamea. E titirakinai, “Ko ataia bwa tera ana berita te Atua ibukin taai aika a na roko?” Ikanne are e a waaki naba te maroro n te Baibara. E wareka Wilson Te Kaotioti 17:1 ao e titirakinai, “E kaineti nakon tera ‘raan aika bati’ ake e tekateka i aona te kabekaau?” I aki ataia. E kaota nakoiu te kibu 15, ae taekinaki iai bwa a kaineti raan akanne nakoia aomata. E rangi n anaaki nanou ngke I a ataia ae a kabongana te Baibara Ana Tia Kakoaua Iehova ni kabwarabwaraa kanoan te Baibara. Imwain nakon Wilson ao e anganai te boki ae The Truth That Leads to Eternal Life. E bita maiuu te boki ae buruu ma ni uarereke aei.

Tebwina te bong imwina ao I a kaea au moan taromauri n te Tabo n Taromauri. I bon aki kona ni mwaninga butimwaeau ma te tangira. I kaakaei taromauri man te tai anne ni karokoa ngkai. Imwina ao e a moana te reirei n te Baibara ma ngai Wilson. I rangi n tangira reiakinan te Baibara ao iai taai ake ti reirei iai i nanoni wanua te aoa. A raraoma irou au karo ao a rangi ni kaitaraa au reirei. Ma ngke I a reiakina riki ae bati ao I a kakoauaa ae bon te koaua aei. I bwabetitoaki n 1983.

I KITANA TE KUURA N REIREI AE RIETATA IBUKIN TE BWAIANIA

N te tai are N nang bwabetitoaki iai ao I reirei n te kuura n reirei ae rietata ao n uaiakina au mwakuri n taokita. A mwaiti baike a kakeai au karo bwa e aonga n reke au reirei aei. I kona n reitaanako au reirei ma I tangiria ni kan angan Iehova au kabanea n tamaroa ao ni beku ni kabwanina au tai irouna.

E kauringai tamau ni kangai, “Ngkana ko katoka am reirei, ao N na kakionakoko man te auti!” I nanokawaki ao I a aki ataa te bae N na karaoia. I tangiriia au karo ao I aki kani kaunia. Ngaia are I a nanako n te kaembwa n te reirei n te bwakanako n tai ao ni kakorakoraai n tataro ni kangai, “Taiaoka Iehova buokai n au motinnano aei.” Ngke e a moti raoi au iango bwa N nang katoka au reirei ao e a kakionakoai tamau man te auti. I tareboonia Wilson n tuangnga te baere riki. Ao e tuangai bwa N na maeka ma ngaia. I toka n te bwati nakon ana auti ma au baeki ae tii teuana. I uringnga ae I a bon namakina naba te rau ae I aki kona ni kabwarabwaraa. I ataia iai ae I karaoa te motinnano ae eti.

Kaanga ai aron te mannikiba ae kainaomataaki mani nnena ae rokanaki iai! I a inaomata raoi ni kabanea maiuu n te mwakuri ni minita. I moana au bwaiania n 1984.

E reireinai Iehova aroaro aika kakawaki n aron te nanomwaaka, n ririki ake I bwaiania ni katoatai iai. N te bong teuana, ao I a aki kona n nako n ira te mwakuri ni minita. E bwara nanou bwa akea ae kona ni katoaai ni mwakuri n te bwakantaai. Ma I boni mwananga naba. Imwin tao uoua te aoa ao I a baireia bwa N na karaoa au kabanea n auti. I a rangi ni kua ao n namakinna ae ai bon tii ngai ao e nang manga bwaka te karau. Ngaia are I a iangoia, ‘N nang oki?’ Ngke I tamwarake nakon te katenua ni borauatao ao I a nora te mwaane ae kaaini Biribin n tei imwaiu. I iango n taku, ‘E na bon aki kan ongora.’ E boni kairua au iango! I moana au reirei n te Baibara ma te aomata anne ao e riki bwa tariu n te onimaki.

E KATAMAROAAKI AROU N TE BETAERA I BROOKLYN

I maeka iroun Wilson i nanon uoua te ririki ao imwina I a kaoaki nakon te Betaera i Brooklyn n 1985. N aron are I taekinna mai moa, I kammwakuraki n te Tabo ni Karaoboki. N te bong teuana ngke I mwakuria te mitiin teuana ao iai te bwai ae bure ae I karaoia ao n tokina a bane n rotaki kunin taiani boki aika irabubua. A tuangai taari bwa N na ribootina te baere riki. I kabwarabwaraa bukin rikin te baere bure are I karaoia ma iai te bwai ae I mwaninga. E kauringai teuare mataniwi ikai ni kangai, “E raoiroi n taai nako ngkana ko kabwaraa am bure.” N te tai anne ao I a ataa kakawakin ae I riai ni butimwaei au kairua ao ni kabwaraa au bure.

E a katamaroaaki riki au iango ni kaineti ma te beku ibukia tabemwaang ngkana I mamatakuakinia kaain te utu ni Betaera aika a kara. N te tai teuana ao kaain ara taibora ni katawanou Brother Milton Henschel, ae kaain te Rabwata n Tautaeka. E onrake te tabo n amwarake n te tai anne ao a biriaitua taani katauraoa te amwarake n tibwatibwai amwarake. Ti tekateka ngaira aika ti ataei riki ao ni ngurengure ibukin aaun tauraoin te amwarake. E aki taetae Brother Henschel ma e teirake ao e nako ni buokiia nakekei n tibwatibwai raan, kariki ao te bwata. N na bon aki kona ni mwaninga te mwakuri ae kaota te nanorinano anne. I uringa iai aron Iesu ni beku ibukia ana abotoro.—Ioa. 13:3-5.

“KO RIAI N REIREINIKO TE TAETAE N TIABAN!”

I nako Tiaban n 1987 ao e rangi n anaaki nanou n noran ingaingaia ao nanorinanoia taan uarongorongo ikekei. I kani buokiia ma te kangaanga bwa I tuai ni bwaati te taetae n Tiaban. E katokai matana te tari te aine n te Betaera ae Michiko Oda ao e taku, “Ko riai n reireiniko te taetae n Tiaban!” Ao I karaoa anne. I aki ataia ae e na bitaki maiuu man ana taeka neiei.

Iraua te namwakaina imwina ao I a mwaing nakon te ekaretia n te taetae n Tiaban i New York. Reiakinan te taetae n Tiaban, e karekei aanga aika bati nakoiu n au beku iroun Iehova ae te Atua. N 1989, I a kaea te moani bwabwaro n te taetae n Tiaban i Los Angeles, i California. E a teke naba matau iroun te tari te aine ae te bwaiania ae Miwako Onami ae kaain te kaotioti n te bwabwaro.

I mare ma Miwako n 1992 ao ti kakabwaiaaki bwa ti kona ni kaai ni beku n te Betaera i Brooklyn. E akoi Miwako ao ni mwamwannano, ao e tatauraoi ni buokiia tabemwaang. I a tia ni buokaki n ana katoto ni katamaroaa riki arou nakoia tabemwaang. Bon te bwaintangira neiei mairoun Iehova, ao I rangi ni kukurei irouna ao e kakabebeteai.

TE AOBITI N TARARUA I TIABAN AO TE MWAKURI I TINANIKU

Ni waakinakon te tai ao a a rangi n aoraki ana karo Miwako ake a maeka i Tiaban. Ngaia are ti a kariaiakaki bwa ti na mwaing nakon te aobiti n tararua i Tiaban bwa ti aonga n uakaan nakoia ao n tararuaiia. Ti mwaing n 1999.

Ti butimwaeaki raoi irouia kaain te utu ni Betaera i Tiaban ao ti kukurei ni mwengara ae boou aei. E a katamaroaaki riki arou ngke I kakairi n aroaroia aika raraoi taari mwaane ao aine i Tiaban n aroia n tituaraoi ao n akoiia iruwa. A tataua ma nanoia ngkana a mwakuri ao a kaatuua raoi aia iango iai. A ataa aroia ni kaai ni mwakuri n ikotaki. N te aro raa? E kakawaki n te katei n Tiaban te kaai ni mwakuri ma tabemwaang ma te katiteuanaaki ao n ibuobuoki ibukini kabwaiaia ni kabane n oneani mwin are a na mwakuri n tii ngaiia ibukini karekeani oini kabwaiaia. I kaungaaki n aia katoto ae tamaroa bwa N na nanorinano ni mwakuri ma tabemwaang ao n ataia ae e kakawaki te bae uarereke ae I karaoia ibukini boutokaan ana kantaninga Iehova.

Ma ibukini kakaokoron te katei, iai taai ake I aki ota iai ni kaineti ma bukini karaoani bwaai tabeua. I riai n taotaona nanou ao n aki un. Imwina riki ao I a bita au iango ao I a ataia ae e kona Iehova ni kakabwaiai motinnano ni kabane ma tii ngkana ti ongeaba n ana kaetieti are e anganira rinanon ana botaki. Ni koauana, bon Iehova ae kanakoraoi bwaai.

I aki toki ni kabotaua te kataneiai are I karekea n te Betaera ma te kataneiai are e karekea te burabeti are Mote. E buokaki Mote iroun Iehova bwa e na karikirakea te nimamannei n rikina bwa te tia kawakintiibu i nanon 40 te ririki. N aroni Mote, e bubura naba au reirei. I a tia ni kariaia au reirei anne bwa N na kainikatonga ao n onimakinai i bon irou. I reireinaki n te Betaera bwa N na nanorinano ao n onimakina Iehova. N aron Iehova ngke e taotaona nanona ni katamaroaa riki aroni Mote, e a tia naba ni karaoa anne nakoiu i nanon ririki aika bati.

Ti tararuaiia ana karo Miwako i nanon 24 tabun te ririki ni karokoa a mate. A bati taai ake ti tarebooniaki iai, ti rotaki n te raraoma, ao ti nanako n te onnaoraki. E tabe ni kekerikaaki marurungin tinan Miwako ni karokoa ae e a aki kona n nakonako. E a kangaanga irouni Masako bwa e na kaei bobotaki n te ekaretia ao n ira te mwakuri ni minita. Ngke e a kaani mate ao e a kabongana te kaa ae kokokaki. Ma e aki te roko ni kekerikaaki tangiran Iehova irouna. E rangi ni kukurei ngkana e tataekina taekan te koaua. I rangi ni kaungaaki n ana katoto Masako n ana beku iroun te Atua ao ni karekean te raunnano ao te kukurei.

E reke te bitaki ae bubura ni maiura n 2024. Imwin ara beku n te Betaera ae raka i aon 30 te ririki, ti a manga mwiokoaki bwa ti na mwakuri i tinaniku. Ti a beku ngkai bwa bwaiania aika okoro n te aba ae Okinawa ao e reke iai ara anga n uarongorongo nakoia utu ake a maeka i rarikin aia kaembwa kaain te taanga ni buaka. Te kataneiai ae raoiroi are ti karekea n te Betaera e buokira ni kanakoraoa mwaingira nakon te mwakuri i tinaniku. Ti kataia ni kateimatoa ara babaire ae raoiroi ao ni kabonganai raoi ara tai n arora ni kaatuua ara iango n ara mwakuri ni minita ao ni mwakuri korakora. E kakabwaiaira Iehova ni karekeia ara reirei n te Baibara ake a a riki bwa ara utu. Ti nora iai kakawakin tangiraia aomata. Ti kaitaua Iehova ni katoabong ngai ma Miwako ibukini mwiokoara ae tamaroa aei.

I MOTINNANOIA BWA E NA KATAMAROAAKI RIKI AROU IROUN IEHOVA

E ngae ngke e a toki aia kakaaitara au utu ma a tuai n raonai n te taromauri ae itiaki. E ngae n anne, e berita Iesu nakoia naake a kitania aia utu ao n riki bwa taan rimwina, bwa a na karekeia 100 riki ngkai aia utu n te onimaki. (Mareko 10:29, 30) Ao I bon nora koauan aei. I a aki kona ni wareki mwaitiia utu ni kabane ni katobibia te aonnaba ake a tangirai ao n tabeakinai bwa kaanga bon aia utu ngai.

Bon iai naba ngkai irou te boki are te Truth are anganai Wilson. E riki te boki ane buruu anne bwa te bwai ni kauring nakoiu ae e boni buokai Iehova bwa N na kunea. (1Rong. 28:9) I motinnanoia bwa N na teimatoa ni kariaia katamaroaan riki arou irouna ao ni buokiia tabemwaang bwa a na ataa te koaua ae kairiri nakon te maiu ae akea tokina.