Onimakina te Tia Tautaeka ae Moan te Rietata n te Iuniweeti

1. Baikara kangaanga aika rangi ni kananokawaki ake e kaaitarai Iobi?

IAI ngkoa te mwaane ae korakora ana onimaki ae Iobi, are a kuri ni bane ni bua ana bwai ni kabane: natina, marurungina, ao ai kaubwaina. Irarikin anne, e kabuakakaaki naba taekana. Ao angiini baike a taekin naake aongkoa raoraona, a boni kabwaranano. E rangi n un naba buuna n te aro are e a kaungaa Iobi bwa e na “taetae ni kabuakakaa te Atua ao [ni mate.]” (Iobi 2:9; 15:4, 5; 19:1-3) A kona kangaanga aika rangi ni kananokawaki aikai n uruana onimakinan te Atua ae koaua iroun Iobi, ao n nanououa iroun Iehova bwa e kona ni kamanoia naake a tangiria ao ni beku Irouna ke e aki.

2-3. Tera ae kona n rio n ara iango, ao tera reireiara ae ti na karekea man te boki ae Iobi?

² Iai taai aika ti aitara naba ma kangaanga aika kona ni kataaki iai onimakinan Iehova iroura n te aro ae korakora. Ti a maeka ngkai n “taai aika okoro aika karuanikai.” (2Tim. 3:1) Ngkana ti kaaitara ma te kataaki teuana imwin teuana, ti a kona n taonakinako iai ao ti a aki kona n nanomwaaka. Ngkana a rinanon te aekaki aei tabeman, a na bae n nanououa bwa e bon tabeakinia Iehova ke e aki.

³ Ngkana ko a tia n nanamakina anne, tai kabwaraa nanom. E a tia n noria Iobi ae e bon aki kona Iehova ni mwaninga taekaia naake a kakaonimaki ni koaua nakoina. Ti kona naba ngaira ni karikirakea onimakinan Tamara are i karawa. Ibukini buokara nakon te tia anne, ti na nora ngkai te boki ae Iobi ao n nora karauan nanora iai i aoni baika uoua: Te moan, Iehova bon tii ngaia te tia Tautaeka ae Moan te Rietata n te iuniweeti. Te kauoua, Atuara ae moan te mwaaka e kona n taui aroni baika riiriki n te aonnaba bwa e aonga ni koro bukin ana kantaninga ao ni kamanoia naba ana aomata n aki toki man rotakibuakan aia onimaki ao rabwataia.

E RIN TATAN I BUAKOIA

4. Antai ae kaoti ngke a ikotaki i karawa anera i matan Iehova are e taekinaki n te boki ae Iobi?

⁴ N te bong teuana ao a ikotaki “natin te Atua ae koaua” i karawa i matan Iehova. E kangai riki te rongorongo: “E rin naba Tatan i buakoia.” (Iobi 1:6) Aio te moantai ae taekinaki iai n te Baibara aran te tia kakaitaraa Iehova ae “Tatan” ke “te tia Kaaitara.” N te tai anne e aikoa riki Tatan bwa natin te Atua ae kakaonimaki. E a riki bwa te tia kairiribai nakon Iehova ao nakoia Ana utu ake i karawa ao n te aonnaba. E kaotia Iehova bwa e aikoa riki Tatan bwa kaain Ana utu are i karawa ngke E taekin taeka ake a koreaki ni Karikani Bwaai 3:15. Ngaia are ai akea irekereken Tatan ma “te aine,” ae taekan ana utu n taamnei Iehova are e na otinako mai iai “te kariki.”

5. Tera reireiara man rinanoakin te baere e taekinaki i karawa?

⁵ E taraia Iehova bwa e na koreaki n te Baibara te baere e taekinaki i karawa. E oti n ana taeka Tatan bwa bon te tia uarao ngaia ae akea ana tangira. (Iobi 1:9; kabotaua ma Te Kaotioti 12:10.) Ngkai e karina rongorongon te bae e riki i karawa aei Iehova, e a karaui iai nanora bwa e boni kabongana mwaakana ni kairiri n te aro ae kororaoi ao n eti. E kaotaki naba iai ae e tiatiana te bae a kona ni karaoia aomata Teuare Moan te Mwaaka.

E TIATIANA IEHOVA TE BAE TI KONA NI KARAOIA

6. E kangaa ni kaotia Iehova ae e kona n tiatiana te bae kona n riki n te boowi are i karawa? (Iobi 1:7, 8)

⁶ Wareka Iobi 1:7, 8. E boni kona Iehova n tiatiana te bae kona n riki n te boowi anne. E titirakina Tatan ni kangai: “Ko a tia n iangoa au toro ae Iobi?” Eng, e ataia raoi Iehova ae e kani kamwanea Iobi Tatan. Ti na nora aron Iehova ni kabongana mwaakana ni buoka iai Iobi.

7. Ni kaineti ma Iobi 1:10, 11, tera ae taekinna Tatan ibukia aomata aika beku iroun Iehova?

⁷ Wareka Iobi 1:10, 11. Iehova boni ngaia Teuare Moan te Rietata n te iuniweeti ao e kabongana mwaakana ao korakorana n aanga ake e taku bwa e raoiroi. (Ier. 32:17; Tan. 4:35) Ma e kamatoaa Tatan n taku bwa e kabongana mwaakana Iehova n te aro ae aki riai. Ai aron ae e bukibuki Tatan bwa e kamarai atoia aomata te Atua, n aron Iobi, bwa a na beku Irouna. E taku naba Tatan bwa naake a beku iroun Iehova a bon tii karaoia ibukini baike a karerekei mairouna. Tera ana kaeka Iehova iai?

8-9. Tera ae baireia Iehova bwa tian Tatan ao bukin tera? (Iobi 1:12) (Nora naba te taamnei.)

⁸ Wareka Iobi 1:12. E kariaia te Riaboro Iehova bwa e na nora koauan ana bukibuki, ma e bairea naba tiana. E kamataataa ni kangai te Atua: “Ko na aki katokaa baim i aon teuanne [ae taekan Iobi]!” A bane n ongo anera ngke e bairea Iehova tian te bae e na karaoia Tatan. Bon akea korakoran Tatan n riaon te baere e a tia n tuangaki, ngaia are akea riki te bae konaa ma tii are e a tia n tianaki nako iai. Ao anne naba arona ni boong aikai. E kabongana Iehova mwaakana ni kairiri ao korakorana ni kamanoa Iobi ao ni kaitiaka naba iai bon taekana.

⁹ E bon aki nakoraoi ana moani kakatai Tatan. E teimatoa Iobi ni kakaonimaki nakon Tamana are i karawa. (Iobi 1:22) Ma e bon tuai n toki nanon te tia Kaaitara ni kataa Iobi.

10. Bukin tera Iehova ngke e kariaia Tatan bwa e na kataa riki Iobi? (Iobi 2:2-6)

¹⁰ Wareka Iobi 2:2-6. N te tai aei e a kakorakoraa riki Tatan ni karawawataa Iobi. E taku Tatan bwa e na boni kabuakakaa te Atua Iobi ibukini kamanoani maiuna. Ibukini kaotan ana kewe Tatan, E a kariaia Iehova te Riaboro bwa e na orea te mwaane ae kakaonimaki aei n te aoraki. Ma e a manga katea naba tiana Iehova ni kangai: “Ma ko na aki anaa maiuna!” Bon akea ana anga Tatan n riaon te baere e a tia n tianaki iai. Ti a manga nora naba aron Teuare Moan te Rietata n tiatiana aroni kataakin Iobi, ibukina bwa e aki kona Tatan n riaon te baere e a tia Iehova n tiatianna ibukina.

E KATOKA RAWAWATAN IOBI IEHOVA

11. E kangaa Iehova n angan Iobi kaniwangana ngke e katoka kataakina? (Iobi 42:10-13)

¹¹ Wareka Iobi 42:10-13. E teretere bwa e na aki kona ni kaaki kakaonimakina ni koaua Iobi, ngaia are Iehova e a katoka naba ana kakaaitara Tatan. E a katoka rawawatan ana toro ae kakaonimaki aei Iehova. N te tai aei e a manga akea naba korakoran te tia Kaaitara n tuka ana babaire Iehova. E a aki kariaiakaki Tatan bwa e na reitaanako karawawataan ana toro Iehova ae rangi ni kakawaki ae Iobi.

12. Aanga te katoto teuana ae kaota te bae e karaoia Iehova nakoia ana toro aika onimakina mwaakana ni kakamaiu.

¹² Ni kabaneani boong aikai ao a bati aika a a tia n nora mwaakan Iehova ni kakamaiu. N te katoto, n 1945 ao iai 230 Ana Tia Kakoaua Iehova ake a reke maiuia imwini mwanangaia ae abwabwaki man ana tabo ni kaikain te Nazi nako taari ike a na tiringaki iai. A korei taeka aikai n aia motinnano ni kaineti ma te baere kakamaaku are a rinanona: “A a bunginako boong ni kataaki ao naake a kawakinaki kaanga ai aron ae a kamaiuaki ao ni buritaki ni kaotinakoaki mani nnen te ai ae uramwaaka, ao bon akea naba boin te ai teutana i aoia. . . . Ma a onrake riki n te korakora ma te mwaaka mairoun Iehova.” A a manga taku riki: “Bon tii teuana te bae ti tangiria . . . [imwin] otinakora man ooia raian, ae ti na kariaiakaki ni beku iroun Iehova . . . n aki totoki. Anne bon tii kakabwaiaara ae moan te rianako.”—Kabotaua ma Taniera 3:27; 6:22.

13. Tera ae ko kona n onimakinna ngkai ko kaaitarai kataaki? (Nori naba taamnei.)

¹³ Ngaira naba ti kona n rinanon taai aika ai aron ae ti a karenakoaki iai n te oo n raian n te aro ni kaikonaki. (1Bet. 5:8-10) N tabetai ti namakinna ae ti a konaaki iai ao ti iangoia bwa e nang aki toki kataakira. E kona n ibuobuoki ururingan rongorongon Iobi, n aekaki n tai akanne. Ti kona n onimakina raoi mwaakan Iehova bwa e na boni katoki rawawatara, n te tai aei ke n te waaki ae boou ae e na roko. E na bon aki kariaia bwa e na reitinako te waaki ae ngkai n riaon te tai are e a tia n namatia!

E TANGIRIIA IEHOVA ANA AOMATA AIKA KAKAONIMAKI NI KOAUA

14-15. Tera ana namakin Iehova ni kaineti ma anganakia ana toro aika kakaonimaki ni koaua kaniwangaia? (Iobi 14:15) (Nora naba te taamnei ni te maekatin.)

¹⁴ Wareka Iobi 14:15. E okoro ana reitaki Tamara are i karawa ma naake a kakaonimaki ni koaua nakoina. A rangi ni kakawaki irouna ao ngkana a matunako n te mate, e na boni manga kautiia. E na katoka te maraki are e reke man te mate.—Ita. 65:17.

¹⁵ E ngae ngke e teimatoa ni maiu Iobi n te aonnaba ae tautaekanaki iroun Tatan ma ti ataia man te rongorongo ae e aki kona ni kakeweaki ae n te Baibara bwa e boni kaoka Iehova marurungin Iobi ao ni kabatiaa riki kakabwaiaana nakon ake e karekei imwaini kataakina. Akanne bon tii bannan te bwai ae e na karaoia Iehova ibukin Iobi n te tai ae imwaira. E kaotia Iehova ae tangiriia ana aomata aika kakaonimaki ni koaua bwa a na kukurei ni koaua ao ni kimwareirei ni maiuia. Ni koauana, e na angania naake a kakaonimaki ni koaua Iehova kaniwangaia ae te maiu ae kororaoi n te bwaretaiti n te aonnaba. (TeKao. 21:3, 4) Iai nanona ni kani karaoa anne ngkai boni ngaia te tia Tautaeka ae Moan te Rietata n te iuniweeti aei. Ai karaunanora iaiangoan anne nakoira ngkana ti boo ma kataaki!

16. Tera riki bukina ngkai ti riai n onimakina Iehova ngkai te tia Tautaeka ae Moan te Rietata ngaia?

¹⁶ Imwini maiun Iobi ae abwabwaki ao e a mate. Ma e boni kona Iehova ni kauta Iobi man te mate ngkai boni ngaia te tia Tautaeka ae Moan te Rietata ao Teuare Moan te Mwaaka. (TuaKau. 32:39) Ngaia are bon akea ae kona n tukia mani kautaia naake e tangiriia. Ao e na riki aei n te tai are e a tia n namatia.—IRom 8:38, 39.

ONIMAKINA RAOI IEHOVA

17. Tera ae kaotaki iai bwa e kabwaka Tatan ni kamaunaia ana aomata Iehova?

¹⁷ Ti noria mani bokin te Baibara ae Iobi bwa a bati bukina ngkai ti kona n onimakina raoi Iehova. Ai kakaitaura ngaira ngkai e kabwaka Tatan ni kamaunaia ana aomata Iehova! Ni boong aikai ao e kaania ruaiwa tabun te mirion ana toro Iehova aika kakaonimaki, aika riki bwa taani kakoauaa mwaakan te tia Tautaeka ni koaua ae Moan te Rietata. Ti okioki n nori bwaai ni buaka aika karaoaki n ekiianako ana aomata Iehova, bwa a aki tokanikai. (Ita. 54:17) A aki kona natannaomata ao Aaro aika korakora ni kamanatuaia ana aomata Iehova aika taraa n akea kamanoaia. Ao akea ae kona n tukira mani kabutinakoan te koaua ibukin Iehova ao mani kaotan Tatan ae bon te tia kewe ao te tia tiritiri ngaia. E aki naba kona te mate ni katokira, ibukina bwa e na boni kautiia Iehova akana mate ibukini kakaonimakia ni koaua nakoina.—Otea 13:14.

18. Bukin tera ngkai ti riai ni kantaningai taai aika imwaira ma te aki nanokokoraki?

¹⁸ Ngkai ti kananoi ara iango i aon rongorongoni maiun Iobi, ti a kakorakoraa iai ara onimaki n te aro ae ti a kona ni kaaitarai taai aika imwaira ma te aki nanokokoraki. N tain te rawawata ae korakora ao a nang taraa n akea kamanoaia ana aomata Iehova ao Tatan ma ana aomata a na taraa n rangi ni korakora n te tai anne. Ma n aron are n ana bong Iobi, e na bon tiatiani bwaai aika kona ni karaoaki Iehova ao n aki kariaia te bwai teuana bwa e na kamaunaia ana aomata. E na boni waekoa n roko te tai are e nang kamauna iai Iehova te rawawata are e uotia Tatan nako aoia aomata nako. E na kabaeaki te Riaboro ma ana taimonio n te kinono i nanon 1,000 te ririki. (Ruka 8:31; TeKao. 20:1-3) Imwina riki ao e nang roko n tokia Tatan ma naake a tei n ana itera. (TeKao. 20:10) N aron are e taekinna Iehova, e na kamanatuaaki atun Tatan. E na boni kamaunaaki n aki totoki.—KBwaai 3:15; IRom 16:20.

19. Tera kaniwangaia naake a onimakina raoi Iehova? (Nora naba te taamnei.)

¹⁹ A ingainga taan taromauri ni koaua nakoni kaokan te maiu ae kororaoi ao ae kakukurei n te waaki ae boou ae i aoni kawaina n roko. E na rangi n tamaroa riki te maiu iai n aron ae ti kona ni kantaningaia. E berita Iehova ni kangai: “Noria! I a kabooui bwaai ni kabane.” (TeKao. 21:5) Tera nanon anne? Aei te moantai i nanon ririki aika nga ma nga are a nang aki manga boo iai aomata ma te babakanikawai, te riribai, ao kariri aika urui aroia aomata, mairoun Tatan ma ana taimonio. Ai tamaroara namakinan te raunnano anne! E nang toki te aki mamatu n te tairiki ibukini baika ko tabeaianga iai n te waaki ae ngkai. A nang nori kakai aika bati naake a maiu imwin Aremaketon. Irarikin anne, e nang waaki naba mai ikanne kautaia aika tangiraki iroura. Ti nang nora aron te maiu are kantaningaia Tamara are i karawa ibukira!

20. Tera ae ko motinnanoia bwa ko na karaoia?

²⁰ Ngkai ti ninikoria ni kaaitarai kataakira ni kabaneani boong aikai, ti bia motinnanoia bwa ti na onimakina raoi Iehova ao n ongeaba irouna ngkai bon teuare moan te rietata ngaia. Ti bia kaotiota tangiran Tamara are i karawa ao ni kaota koauan ae e boni kairua Tatan. Eng, ti kona ni kantaningai taai aika imwaira ma te aki nanokokoraki i aan ana tautaeka ara tia tautaeka ae Moan te Rietata ae Iehova, are e ingainga ni kani karekei kaniwangaia ana toro aika kakaonimaki!