Karikirakea Riki ‘Rabakaum n Angareirei’ n te Mwakuri ni Minita

1. Tera te rabakau ae ti riai ni kani karikirakea riki, ao bukin tera? (2 Timoteo 4:2) (Nora naba te taamnei.)

E TUANGIA taan rimwina Iesu ni kangai: “Reireinia aomata . . . , bwa a na riki bwa taan rimwiu . . . ao reireinia bwa a na kakairi ni bwaai ni kabane ake I tua nakoimi.” (Mat. 28:19, 20) E oti n te kaetieti aei bwa a riai n riki Kristian ni kabane bwa taan angareirei. E koaua ae bon Iehova ae katikiia naake “a tauraoi nanoia ni butimwaea te koaua,” ao a ibuobuoki naba anera ni kairira nakoia aekaki n aomata aikai. (Mwa. 13:48; Ioa. 6:44; TeKao. 14:6) Ma ti riai naba ngaira ni karaoa tabera. Iangoa ana katoto te abotoro Bauro ao Barenaba. E taekinaki n te Baibara bwa ngke a uarongorongo n te tinakoka i Ikonio ao “a taetae n te aro are a a rangi ni mwaitikurikuri iai I-Iutaia ao I-Kuriiti ake a a riki bwa taan onimaki.” (Mwa. 14:1) A boni bae n tia Bauro ma Barenaba ni karikirakea riki ‘rabakauia n angareirei.’ (Wareka 2 Timoteo 4:2.) A wanawana Kristian ni kabane ngkana a karikirakea te rabakau anne.

2. Bukin tera ngkai a namakinna tabeman Kristian bwa a aki kona ni karikirakea riki rabakauia n angareirei?

² A kona n namakinna tabeman bwa a aki kona ni karikirakea riki rabakauia n angareirei, ibukina bwa e uarereke aia reirei ke aia konabwai. Iai tabeman mwaane aika taekinaki n te Baibara aika namakinna naba bwa a aki tau. (TeOti. 4:10; Ier. 1:6) A kona naba ni bwara nanoia tabemwaang n aia konabwai n angareirei, ibukina bwa a aki nora mwina ae raoiroi, n aroia tabemwaang. E koaua ae tiaki ni kabane aomata ake ti maroro ke ni kaitiboo ma ngaiia aika a na butimwaea te rongorongo ae raoiroi. Ao e aki boboto mwin ara mwakuri tii man ara kakorakora. N aron are e a tia n taekinaki, e taraia raoi Iehova ma anera bwa a na kuneaki aomata aika raoiroi nanoia. Ma ti kani kabanea ara konaa n taekina ara rongorongo n te aro ae anainano. Ibukini buokara, e na maroroakinaki n te kaongora aei aanga aika tenua aika ti kona iai ni karikirakea riki rabakaura n angareirei n te mwakuri ni minita.

TABEAKINIA AOMATA

3. E kangaa Iesu ni kona n ringi nanoia aomata?

³ E taekinaki n te Baibara bwa “e bon ataa nanon te aomata” Iesu. (Ioa. 2:25) E oti man te kibuntaeka aei bwa e atai aia iango aomata Iesu ao bukini karaoani bwaai irouia. E kona n ringi nanoia aomata Iesu ibukina bwa e ota ni kainnanoia. E kona n noria ae a baki n te onimaki ao a karawawataaki ni katei aika bati ma aia tua aomata. (Mat. 9:36; 23:4) E mwanewei kangaanga akanne Iesu n Ana Kabwarabwara i Aon te Maunga. A bati aomata aika katikaki nanoia iroun Iesu ibukina bwa e taekini baika a rinanoi.

4. Ti na kangaa ni kaotia bwa ti tabeakinia aomata? (Nori naba taamnei.)

⁴ Ti kona ni kaotia bwa ti tabeakinia aomata ake ti boo ma ngaiia ngkana ti kataia n ota n tabeaiangaia. A bane aomata ake ti uarongorongo nakoia n rotaki n ana waaki ae buakaka Tatan n te anga teuana ma teuana. N ururingan anne, ti kona ni buokaki iai n ota irouia aomata ake n ara aono. N te katoto, iai te rongorongo ae boou ae a tabeaianga iai kaain ara aono? A raraoma kaaro ibukini kamanoaia natiia n te reirei? A mwaiti aika akea aia mwakuri ni kareketianti? Kataia ni kataamneia aroni maiuia aomata aikai ngkai a rinanon “taai aika okoro aika karuanikai” ao akea irouia te kantaninga ae n te Baibara.—2Tim. 3:1; Ita. 65:13, 14.

5. Ngkai te tia reirei Iesu e kangaa ni kaokoro ma Baritaio? (Mataio 11:28-30)

⁵ E tabeakinia aomata Iesu, ao a kona ni kakoauaa anne man aroarona nakoia. Ai kaokorora ngaia ma Baritaio ake a kamangoriia aomata aika maiu ni kainnano ao a iangoiia bwa aomata aika riribaaki! (Mat. 23:13; Ioa. 7:49) Ma e kaotiota te akoi ao te karinerine Iesu nakoia aomata. E “nimamannei ao [e] nanorinano,” ao anne naba bukina ae e riki iai bwa te tia reirei ae mwaatai. (Wareka Mataio 11:28-30.) Ti riai naba ni kaotiota te akoi ao te karinerine nakoia aomata.

6. Ti na kangaa ni kaotiota te akoi ao te karinerine nakoia naake a rawa ke a kaitaraa ara rongorongo?

⁶ Iai tabeman aika a rawa ke tao a boni kaitaraa ara rongorongo. Ma tera ae ti riai ni karaoia? E reireinira Iesu bwa ti na aki tii kariaia te kakaaitara. E kangai: “Karaoa ae raoiroi nakoia aika riribaingkami,” “taetae ni kakabwaiaia akana kamaraiaingkami,” ao “tataro ibukia akana kabwainrangingkami.” (Ruka 6:27, 28) E na bebete karaoan anne iroura ngkana ti iangoia bwa tao iai bukina irouia ae ti aki ota iai, ngkai a rawa nakon ara rongorongo. Bon iai naba aika a kani katoka ara mwakuri aei. Ma tabeman tao a karawawataaki n aia kangaanga n aia utu ke a raraoma n te bwai teuana ae akea irekerekera iai. Tao ti roko raoi irouia n te tai ae nakobuaka. Ma n aki ongeia bwa tera, ti riai ni kakairi n te kaungaunga are “a na raonaki n taai nako [ara] taeka n te atataiaomata ao n taoronaki, bwa [ti] aonga n ataa [arora] ni kaeka ae riai nakoia aomata n tatabemania nako.” (IKoro. 4:6) Ngkana ti nanoangaia aomata ao ni kataia n ota ni kainnanoia, ti na aki waekoa n un ao ti na riki bwa taan angareirei aika rabakau riki.

ONIMAKINA ANA TAEKA TE ATUA

7. E kangaa Iesu ni kaotia bwa e onimakina Ana Taeka te Atua ngke e angareirei? (Ioane 7:14-16)

⁷ E aki onimakina oin ana ataibwai Iesu. E boboto ana angareirei i aon Ana Taeka te Atua, ao e kabongana n aanga aika a kai ota ao n ururingnga riki aomata ake a ongora irouna. E taekinaki n te Baibara bwa e angareirei Iesu “n aron te aomata ae iai mwiokoana, ma tiaki n aroia taani koroboki.” A “mimi” aomata n arona anne. (Mareko 1:22; nora te study note i aon “not as the scribes.”) Taani koroboki ake n ana bong Iesu a mwamwanewei aia taeka taian rabi aika rangi ni karineaki n aana iai aia angareirei. Ma Iesu e mwamwanewea kanoan te Koroboki ae Tabu ae kairaki koreana n te taamnei. Ngkai natin te Atua ngaia are e a tia ni maiu i karawa, e kona ni kai kabongana wanawanana ae bati n anai iai nanoia aomata ao ni kamimia naba. Ma e aki karaoa anne. E kabotoa ana angareirei i aon nanon te Atua ma ana Taeka. (Wareka Ioane 7:14-16.) E katea te katoto ae rianako Iesu ibukia taan rimwina.

8. E kangaa te abotoro Betero ni kakairi n ana katoto Iesu?

⁸ A onimakina naba Ana Taeka te Atua taan rimwin Iesu n aia angareirei. N te katoto, iangoa ana maroro te abotoro Betero ni Bentekota 33 C.E. E uarereke ana reirei Betero. Ma e bon ringi nanoia aomata ngke e kabwaranakoa te taetae ni burabeti man te Koroboki ae Tabu are e a kakoroa nanona Iesu. (Mwa. 2:14-37) Tera mwina? “A bwabetitoaki te koraki ake a butimwaei ana taeka ma te kukurei, ao n te bong anne a a ikotaki riki i buakoia tao 3,000 aomata.”—Mwa. 2:41.

9. Bukin tera bwa ti riai n onimakina Ana Taeka te Atua n ara angareirei?

⁹ Akea riki te bwai ni mwakuri ae kona n ringi nanoia aomata nakon Ana Taeka te Atua. (Ebera 4:12) Ngaia are ti riai ni kabotoa ara angareirei i aon te Baibara. Ti kan “uarongorongoa te taeka” ma tiaki oin ara iango. (2Tim. 4:2) E kangai Taeka N Rabakau 2:6: “Bon Iehova ae ngaia ae anganga te wanawana, ao e otinako te atatai ma te ataibwai mai wina.” Ngaia are ngkana ti angareirei man te Baibara ai aron ae ti angan Iehova ana tai n taetae. (Maraki 2:7) Ti tangiriia aomata bwa a na ataia ae iai n te Baibara te bwai teuana ae riaon riki wanawanaia aomata. E kairaki koreana iroun te Atua ao e reke mai iai te atatai ae ti kainnanoia ibukini kakukureian ara tia Karikiriki ao ni kukurei ni maiura ae uaana aei.—2Tim. 3:16, 17.

10. Ti na kangaa ni kaira ana iango ara reirei n te Baibara nakon Ana Taeka te Atua?

¹⁰ Ngkai ko katauraoi imwaini kawaran am reirei n te Baibara, kakaaei aanga aika ko na kaira iai ana iango nakon ana reirei n te Baibara. E riai n ataia am reirei ae e ngae ngke e nakoraoi riki te reirei n taian taamnei ao viteo, ma te boki raoi n reirei bon te Baibara. Ngaia are kakaaei kiibu aika kakawaki ao buoka am reirei bwa e na iaiangoi. Ngkana ko maroroakin taian taamnei ma viteo, taraia raoi bwa e na ota am reirei n ana boto n reirei te Baibara aika kakawaki aika maroroakinaki. E aki nanonaki iai bwa ko na taekini baika bati ke ni wareki kiibu aika bati. Ma angan am reirei ana tai bwa e na iaiangoa raoi ae nanonaki n te baere e warekia teuana imwin teuana, ao e kona ni wareka riki te kibu ngkana e kainnanoia. N te aro anne, ti a kaira iai te reirei tiaki man te boki ke man te taamnei ke te viteo teuana, ma man te Baibara.—1Kor. 2:13.

11-12. (a) Ti na kangaa n taotaona nanora nakoia ara reirei n te Baibara? (Mwakuri 17:1-4) (Nora naba te taamnei.) (b) Tera ae a kona n aki iaiangoia tabeman ibukin te Baibara, ao ti na kangaa ni kona ni buokiia?

¹¹ Ngkana e kangaanga iroun am reirei bwa e na butimwaea te reirei teuana, ururingnga are “ko na uarongorongoa te taeka . . . ma te taotaonakinnano ni kabane.” A aki titeboo rikirakeia aomata ni kabane. Tabeman a kainnanoa te tai ae maan bwa a na ota raoi ni koaua aika bebete iroura. E okioki Bauro n uarongorongo nakoia I-Iutaia ake i Tetaronike, ma n reireinia man te Koroboki ae Tabu, ao a a tibwa ota raoi iai tabeman.—Wareka Mwakuri 17:1-4.

¹² Te anga teuana ae ti kona ni kaota iai te taotaonakinnano, ngkana ti tabeki titiraki nakoia ara reirei ao n aki taua atin te maroro. Kataia n ongora moa ao n ota raoi n aia iango. Imwina wareki ao kabwarabwarai kiibu aika a na kona ni buokiia bwa a na ota raoi n ana iango te Atua i aon te baere kam rinanona. Ururinga naba aei: Tabeman aomata a bon aki taneiai ma te Baibara ao bon akea naba teutana aia atatai ni kanoana. E na ibuobuoki ngkana ti kaota nakoia te Baibara are boreetiaki? Ko kona n nakon “Moantaeka n Ana Taeka te Atua,” are mai moa n te Rairai ae te Aonnaba ae Boou, ni kaota iai kakawakin taian reirei aika n te Baibara. Tao ko kona ni kabwarabwaraa kakawakini kanoana ni kamanenaan teuana ke uoua te kibu ake a kaotaki i aan titiraki 15 ni kaota aron te Baibara ni kona ni buokira ni karekea te kukurei. Ni kauarerekeana, ngkana ko kaota raoi mwaakan Ana Taeka te Atua nakon am reirei n te Baibara, e na uaana riki iai am angareirei.

KAATUUA RIKI TAEKAN IEHOVA

13. Ngkana ti angareirei, antai ae ti riai ni kaatuua riki taekana? Aanga te katoto.

¹³ Tiara bwa ti na buokiia aomata bwa a na ataa Iehova ao ni kaania. (Iak. 4:8) Ibukin anne, ti kona ni kabotaua ara mwakuri ma te tia kammwakura te taura n te tabo ni kamataku. N tain te kamataku ao e aki kaotaa te taura i aona. Ma e kainetia nakoia taani kamataku bwa a aonga n noraki raoi. Ti riai ni karaoa naba aron anne ngkana ti angareirei, ae ti na kaatuua riki taekan Iehova ao tiaki taekara.

14. Ti na kangaa ni buokiia ara reirei bwa a na kaatuua riki taekan Iehova?

¹⁴ Ngkana ko kaira te reirei n te Baibara, buoka am reirei bwa e na rikirake i nanona kani kakukureian Iehova. (TaeRab. 27:11) Ko aki tii reireina am reirei bwa e na tii ataa te bae e kairua ao ae eti bwa e aonga n riki bwa Ana Tia Kakoaua Iehova. Ko tangira am reirei bwa e na karaoi bitaki bwa e aonga ni kakukureia Iehova. N te katoto, ngkana e kabokorakora am reirei ma aroarona teuana ae buakaka, titirakinna ni kangai: “Bukin tera Iehova ngkai e ribaa te aroaro anne? Bukin tera ngkai e tangiria Iehova bwa ko na katoka karaoan te bwai ae ko kukurei iai? E kangaa n oti man te kaetieti aei ae e tangiriko Iehova?” Ngkana ko kakaira am reirei bwa e na iaiangoa taekan Iehova, ane e na waekoa riki n noria ae e tatangira Tamara. N te aro anne ko na buoka iai am reirei bwa e na kani kakukureia Iehova.

TEIMATOA NI KARIKIRAKEA RIKI RABAKAUM N ANGAREIREI

15. Tera ae ko kona ni karaoia bwa ko aonga n teimatoa ni karikirakea riki rabakaum n angareirei?

¹⁵ Ko kona ni bubutiia Iehova n te tataro bwa e na buokiko n nori itera aika ko kona ni karikirakea riki iai rabakaum n angareirei. (1Ioa. 5:14) Ko kona ni kabongana raoi te kataneiai are e katauraoia Iehova rinanon te bobotaki n te ekaretia, ngkana ko maiuakina am tataro. Ko kona ni kaoia taan angareirei aika mwaatai bwa a na katoako nakon am reirei n te Baibara. Ao titirakinia bwa tera aia iango. Uringnga naba are e ngae ngke ko a mwaatai ma kanoan te reirei, ma e bon tuai am reirei. Kataia n iangoia bwa e na tera ana namakin am reirei n te baere kam na maroroakinna. Ao buoka am reirei bwa e na ataia ae bon te rongorongo ae raoiroi ara rongorongo. E kona ni kairaki iai bwa e na karekea ana iraorao ae kaan ma Iehova ao ni karekea nakoina te kukurei ni koaua.—TaiAre. 1:1-3.

16. Ti na kangaa ni kakabwaiaaki ngkana ti teimatoa ni karikirakea riki rabakaura n angareirei?

¹⁶ Reiakinaia tabemwaang taekan Iehova bon te bwai ae rangi ni kakimwareirei iroura. E na rangi ni kainnanoaki riki n te tai ae imwaira n te aonnaba ae boou te mwakuri n angareirei ae kakimwareirei aei. Ngaia are ti bia teimatoa n tabeakinia aomata, n onimakina Ana Taeka te Atua, ao ni kaatuua riki taekan Iehova ngkana ti tataekina te rongorongo ae raoiroi. Ni karaoan anne ti a kona ni karikirakea riki iai rabakaura n angareirei n te mwakuri ni minita.