I a Riai n Aki Turaiua?

Ko kaaitara naba ma te aekaki anne? Ngkana eng, ao tera ae kona ni buokiko ni motinnanoia bwa ko na teimatoa n turaiua ke ko na aki?

N aaba tabeua, a riai n tuoaki iroun te taokita turaiua ake a a riaon te ririki ae katauaki aia ririki ni maiu, ngkana a kani manga kabooui aia raitienti. A riai Kristian ake a maeka n aaba aikai n ongeaba nakon tuua ao babaire ake a karaoaki irouia kaain te tautaeka. (IRom 13:1) Ma n aki ongeia bwa ko maeka ia, ma iai aanga aika ko kona iai n tutuoa am konabwai n turaiua.

TUOKO BWA KO TAU N TURAIUA

N aron ae taekinaki n ana atureti n te intanete te National Institute on Aging (NIA) n te United States, ko kona n titirakiniko titiraki aika i nano aikai:

• E kangaanga irou warekani kanikina ibukin te kawai ke au taratara n te tairiki?

• I a aki kona ni mwaing n te aro are e a kangaanga irou bwa N na raira atuu n tarai kiraatin au kaa ao n tarataraa naba rarikiu?

• E kangaanga irou bwa N na waekoa ni karaoa te bwai teuana, n aroni kamwaingani waeu man te bentiin nakon te bureiki?

• I rangi ni buti ni karaurau n te aro are I a taua nanon te kawai?

• E a mwaiti au tai ae I kuri iai ni kurati, iai taiani mwano ke te kina n au kaa imwin okinakoani bwaai?

• I a tia ni kateaki iroun te bureitiman ibukini butiu?

• I a tia n turaiua ao I matu?

• Iai bwatin aika I nim aika kona n rota arou n turaiua?

• A a tia au utu ke raoraou n tabeaianga ngkana I turaiua?

Ngkana am kaeka eng nakon teuana ke uoua mai buakon titiraki akanne, ko kona n iangoa karaoani bitaki tabeua. N te katoto, ko kona ni kauarerekea am tai n turaiua, moarara riki n te tairiki. Teimatoa n tutuoa arom n turaiua. Ko kona n tuanga temanna kaain am utu ke raoraom bwa e na taekina ana iango ibukin am turaiua. Ko kona naba n ira te reirei i aon aron te turaiua n te aro ae ko na mano iai. Ma ngkana am kaeka eng nakon tabeua mai buakon titiraki akanne, e raoiroi riki ngkana ko a aki turaiua.a

KAIRIRAKI NI BOOTO N REIREI MAN TE BAIBARA

Ti kona n aki namakinna ae e a kekerikaaki ara konabwai n turaiua. Ao iangoan ae ko nang aki turaiua e kona n riki bwa te bwai ae kangaanga maroroakinana. Ngaia are baikara booto n reirei man te Baibara aika kona ni buokiko ni bwaina te iango ae riai ao ni karaoa am motinnano ma te wanawana? Iangoi uoua aikai.

Teimatoa n nanorinano. (TaeRab. 11:2) Ngkai ti a tabe ni kara, a a rotakibuaka ara taratara, ara kakauongo, ara mwatireti, ao kakammwakurira. N te katoto, angiina aomata a katoka aia takaakaro ngkai a a kara ibukina bwa a ataia ae a kai ikoaki ngkai a a rikirake ni kara. E kaineti naba te boto n reirei anne nakon te turaiua. E kona te aomata ae nanorinano n iangoia bwa e na aki turaiua ibukini maurina. (TaeRab. 22:3) Ao ngkana iai tabemwaang aika tabeaianga irouna, e na kakauongo raoi te aomata ae nanorinano.​—Kabotaua 2 Tamuera 21:​15-17.

Rarawa nakon te katuturaraa. (TuaKau. 22:8) E rangi ni karuanikai te kaa ngkana e aki kabutaki raoi. Te aomata ae teimatoa n turaiua e ngae ngke e a kekerikaaki ana konabwai e kona ni kabuaa maiuna ao maiuia tabemwaang. Ao e kona ni bure ni katuturaraa ngkana e karika te kurati ae mate iai te aomata.

Ngkana ko kaaitara ma te motinnano bwa ko riai n turaiua ke ko na aki, tai iaiangoia bwa e a bua iai karineam ke kakawakim. E tangiriko Iehova ibukin aroarom aika tamaroa, n ikotaki ma nanorinanom ao tabeakinan aroia riki tabemwaang. Ao e berita bwa e na kateimatoako ao ni kabebeteko. (Ita. 46:4) E na bon aki kitaniko. Ngaia are bubutiia bwa e na buokiko ni kamanena te wanawana ao booto n reirei man te Baibara ngkana ko a motinnanoia bwa ko riai n turaiua ke ko na aki.