Titiraki Mairouia Taani Wareware

E taku te tia korea Taeka N Rabakau 30:18, 19 bwa e ‘riaon te ataibwai’ “kawain te rorobuaka ma te ateiaine.” Tera ae e nanonna?

A bati aika aki ota n taeka aikai, n ikotaki ma taan rabakau naba tabeman. E kangai taekana ae bwanin n Te Rairai ae te Aonnaba ae Boou: “Iai baika tenua aika riaon au ataibwai [ke, “aika riaon te kamimi irou,” kbn.], ao aua baika I aki ota iai: “Kawain te ikare i karawa, kawain te naeta i aon te bwaa, kawain te kaibuke i marawa, ao kawain te rorobuaka ma te ateiaine.”-TaeRab. 30:18, 19.

Otara mai mwaina n te kibuntaeka ae “kawain te rorobuaka ma te ateiaine” e kabwarabwaraa te bwai ae buakaka. Bukin tera? E kaotaki ni kanoan te kibu baika aki raraoi aika aki kona ni kangai “E a tau.” (TaeRab. 30:15, 16) Ao ni kibuna 20 e taekinaki iai te “aine ae wewene ni kimoa” ae e taku bwa akea te bwai ae e karaoia ae bure. Ngaia are ti a iangoia bwa e nanonaki iai ae e kona te aomata ni karaoi baika aki kona n noraki mwia n ai aron te ikare i karawa, te naeta i aon te bwaa, ke te kaibuke i marawa. Ibukin anne, ti a iangoia ae te kibuntaeka ae “kawain te rorobuaka ma te ateiaine” e kaineti nakon te bwai ae buakaka ae taekan te teinimwaane ae nanowanawana ni kamwanea te ateiaine ae nanoroo ae aki ataa te baere riki nakoina.

Ma iai bukina ae raoiroi ae ti riai n iangoa te kibu aei n te aro ae riai. E bon tii mimi te tia koreia ni bwaai ake e taekin.

E kaotaki naba n te Baibara n te taetae n Ebera bwa te kibu aei e nanona te bwai ae raoiroi. Ni kaineti ma te boki ae te Theological Lexicon of the Old Testament, ao te taetae n Ebera ae rairaki bwa “riaon au ataibwai” n Taeka N Rabakau 30:18 “e kaota te bwai ae riki ae e noria te aomata . . . bwa e kamimi, e taraa n aki kona n riki, ao e tamaroa naba.”

E taekinna naba te Professor ae Crawford H. Toy man te Harvard University n te United States bwa te kibu aei e aki kabwarabwaraa te bwai ae buakaka. E taku: “E tii kataia te tia koreia ni kabwarabwaraa aroni kamimini bwaai akanne.”

Ngaia are e taraa n raoiroi riki taekinan ae taeka ake n Taeka N Rabakau 30:18, 19 a kabwarabwarai bwaai aika rangi n tamaroa, aika riaon ara ataibwai. N aron te tia korea te Baibara, ti mimi n aron te ikare ni kiba, aron te naeta ae kona ni butiraoi i aon te bwaa, aron te kaibuke ae tinebu ae kona ni buti i marawa, ao aron te rorobuaka ma te ateiaine n tangira ao n uaia ni karekea maiuia ae kakukurei.