E Buokira Iehova ni Kaangaraoira ao ni Kukurei n Taabo Ake Ti Mena Iai

A kaea te Kuura ni Kireata n 1979 Brother ao Sister Kassholms ao i nanon ririki aika bati, a mwiokoaki bwa a na beku i Iran, Mauritius, Myanmar, Tanzania, Uganda, ao Zaire. A anganaki te taeka n reirei n te Kireata iroun te tia reirei ae Jack Redford, ae a na butimwaei bitaki ao ni kukurei n taabo nako ake a kanakoaki iai. A buokaki n te taeka n reirei anne ni katoatai are a kamwaingaki iai nakon te tabo ae boou n taai aika bati. A na karakinna.

Mats, tuangira moa taiaoka bwa e kangaa n reke iroum te koaua.

Mats: Ni menau i Poland n te Kauoua ni Buaka Are Kabutaa te Aonnaba, ao e nora tamau te mwakuri ni mwamwanaa te aba ae korakora n te Aro ni Katorika. Ma e aki toki ni kangai, “I ataia ae bon iai te Aro ae koaua!” Ni waakinakon te tai ao I a kakoauaa te baere e taku. I kabooi booki aika bati aika aki boou. Iai teuana te boki ae buruu ae atuna The Truth That Leads to Eternal Life. E rangi n anaaki nanou n atun te boki anne, ao I warekia ni kabanea n te tairiki are I kabooa iai. Ngke e a ingabong ao I a ataia ae I a kunea te koaua!

Man Eberi 1972 ni karokoa ngkai, I a tia ni wareki aia boki Ana Tia Kakoaua Iehova aika bati ao ni karekei kaekaan au titiraki aika boto man te Baibara. I namakinna ae titeboo arou ma te tia iokinibwai ae mwamwananga are n ana kaikonaki Iesu are ngke e kunea moomin te bwaeao teuana ae rangi ni kakawaki, ao e kaboonakoi ana bwai ni kabane bwa e aonga ni kabooa. I kakeaa au babaire ae uaiakinan te reirei ae rietata ao te kan riki bwa te taokita bwa I aonga ni kona ni kabooa te “bwaeao” ae te koaua are I kunea. (Mat. 13:45, 46) I bwabetitoaki n Ritembwa 10, 1972.

I nanon teuana te ririki ao a a butimwaea naba te koaua au karo ao tariu ae uarereke ao a bwabetitoaki. N Turai 1973, I a beku ni kabwanina au tai. Iai te tari te aine ae arana Ann-Catrin i buakoia bwaiania aika ingainga n ara ekaretia, ae e botonnaine ao e ikawai n te onimaki. Ti a tangirira ao ti a mareaki n 1975, ao ti a maeka aua te ririki n te kaawa ae rangi ni kan ae Strömsund, i Sweden ae te aono ae a rangi ni kan ongora kaaia .

Ann-Catrin: E reke te koaua iroun tamau ngke e mena n te kuura ae rietata i Stockholm. Ai tibwa tenua au namwakaina n te tai anne, ma e boni kakairai n te taromauri ao n te mwakuri ni minita. E aki kukurei iai tinau ao e kataia ni kaotaraei keweia taani Kakoaua. Ma e aki kona ni karaoa anne ao n tokin te tai e bwabetitoaki naba. I bwabetitoaki ngke 13 au ririki ao I moana au bwaiania ngke 16 au ririki. I riki bwa te bwaiania ae okoro imwin au beku i Umeå, ike a kainnanoaki riki iai taan uarongorongoa te Tautaeka n Uea.

Imwini mareu ma Mats ao e reke kimwareireira ni buokaia aomata tabeman bwa a na reiakina te koaua. Temanna mai buakoia bon te teinnaine ae Maivor are katoka ana takaakaro ao n riki bwa toan tariu ae uarereke ni bwaiania. A kaea te Kireata n 1984 ao a beku bwa mitinare i Ecuador.

Ni mwiokoami ni mitinare aika bati, tera ae buokingkami ni kaangaraoingkami ao ni kukurei ni mwiokoami?

Mats: Ti aki toki n tuangaki bwa ti na mwaing nakoni mwioko aika boou. Ma ti kataia ni kanenei wakaara iroun Iesu n arora ni kabanea ara konaa ni kakairi irouna, moarara riki n nanorinanona. (IKoro. 2:6, 7) N te katoto, n oneani mwin are ti na kantaningaiia taari bwa a na kaangaraoiia nakoira, ti kataia ni kakaaea bwa bukin tera ngkai a karaoi bwaai n te aro ae kaokoro. Ti kani kaotaira n aroia n iaiango ao aia katei. Ngkana ti kakairi iroun Iesu, e bebete riki iai iroura arora ni kaangaraoira ao ni kukurei ni mwiokoara.—TaiAre. 1:2, 3.

Ann-Catrin: Ngkana ti mwaing nakoni mwiokoara ae boou, ti riki bwa kaanga ai aron te aroka ae boou ae unikaki ae kainnanoa ootan taai bwa e na rikirake. E teimatoa Iehova n riki bwa “taai” ibukira. (TaiAre. 84:11) E katauraoa ibukira te botaki n itaritari ae kaainaki irouia taari mwaane ao aine aika tatangira ao a ikawai n te onimaki. N te katoto, ti namakina raoi akoakira n ara ekaretia ae uarereke i Tehran, i Iran, n aron akoaia iruwa ae kakaraoaki n taai ake a karakinaki n te Baibara. Ti rangi n tangiria n tiku i Iran, ma n Turai 1980 ao e a katabuakaki aia mwakuri Ana Tia Kakoaua Iehova ikanne ao ti a tuangaki bwa ti riai n nako i nanon 48 te aoa. Ti a manga mwiokoaki nako Zaire (ae e ataaki ngkai bwa Congo) i Aberika.

I tang ngke I moan ongo are ti a manga mwiokoaki nako Aberika. I maaku ngke I ongo taekan taian naeta ao aoraki i Aberika. Ma a kangai nakoira uoman raoraora ni kaan ake a a maan ni beku ikanne: “Ko tuai n roko ikekei! Bon naako noria, ao ane kam na rangi n tangira Aberika.” Ao e bon eti! A rangi n tatangira ao n akoi taari mwaane ao aine ikekei. Ngke ti a riai ni kitana Zaire onoua te ririki imwina ibukini katabuakan te mwakuri, ao I ngare i nanou bwa I a tataro ngkai nakon Iehova ni kangai, “Taiaoka katikuira i Aberika.”

Baikara baika kam kimwareirei iai ni waakinakon te ririki?

Mats: I kan taekina ngai rekeia raoraora ni kaan aika mitinare man aaba aika kakaokoro. Ni mwiokoara naba tabeua, e reke iai te kimwareirei ae rianako mani kairan reirei n te Baibara aika bati, ao n tabetai tao kaka 20 ara reirei! I aki kona naba ni mwaninga aia tangira ao aia akoi taari i Aberika. Ngke ti kawari ekaretia i Tanzania, a bati raoraora ake a kaotiota akoakira n te aro ae “riaon aia konaa,” ngke ti mamatu n ara kaa ae te Volkswagen Kombi i rarikini mwengaia. (2Kor. 8:3) Te bwai ae rangi n okoro riki iroura bon ara tai ni kakaraki i marenara. Anne te tai are I tekateka iai ma Ann-Catrin ni banen te bong teuana ma teuana, ni maroroakini baika riki n te bong anne ao ni karabwaa Iehova ngkai e teimatoa n raonira.

Ann-Catrin: Ngai irou, te bwai ae I rangi ni kimwareirei iai boni karekeani kinaakia taari man taabo aika kakaokoro n te aonnaba. Ti reiakin taetae aika boou n ikotaki ma te taetae ae te Farsi, te taetae ni Buranti, n Luganda, ao n Swahili ao ti nori naba katei aika kakaokoro ao ni kamimi. Ti buokiia taan rimwini Kristo aika boou, ti karekeia raoraora ni koaua, ao ti mwakuri ma ngaiia “ma te katiteuanaaki” n ara beku iroun Iehova.—Teb. 3:9.

Ti nori naba aroni kamimin ao kakaokoron ana karikibwai Iehova aika tamaroa. Ni katoatai are ti butimwaea iai mwiokoara ae boou n ara beku iroun Iehova, ti namakinna ae kaanga ti airi ma Iehova n te mwananga teuana ao e riki bwa te tia Kairira. E a tia n reireinira baika ti aki kona n reireinira iai i bon iroura.

Baikara kangaanga ake kam boo ma ngaai, ao kam kangaa ni kaaitarai?

Mats: E reke iroura aoraki tabeua ni waakinakon te ririki n ikotaki naba ma te maraeria. Ao iai tabeua ana korokoro Ann-Catrin ake e karaoi. Ti raraomaeakinia naba ara karo aika tabe ni kara ngaia are ti kakaitau irouia tarira ao mwaanera aika uarereke riki nakoira ngkai a riki bwa taan tararuaiia. A kakaonimaki ni karaoa tabeia anne ma te taotaonakinnano, te kimwareirei, ao te tangira. (1Tim. 5:4) Ma n taai tabetai, ti kabokorakora ma namakin aika aki raoiroi, n iangoan ae ti kona ni karaoa ae bati riki ibukia ara karo nakon ae ti a tii buobuokiia naba mai kiraroa.

Ann-Catrin: N 1983, ngke ti beku i Zaire ao e rangi ni korakora irou te aoraki ae te korera. E taku te taokita nakon Mats, “Kairaanako neiei man te aba aei n te bong aei!” N te bong are imwina, ao ti a toka n te wanikiba ni kaako bwa tii anne te kiba ae tauraoi nako Sweden.

Mats: Iroura ngaira e nang toki ara mwakuri ni mitinare ngaia are ti a bon tang. Ma e boni marurung Ann-Catrin e ngae ngke e taku te taokita bwa e na aki. Ao teuana te ririki imwina ti a manga okira Zaire, ma n te tai aei ti a nakon te ekaretia n Swahili ae uarereke i Lubumbashi.

Ann-Catrin: N tikura i Lubumbashi, ao e bwaka natiu. E ngae ngke akea n ara iango ae ti na kariki, ma I bon rangi n nanokawaki ngke e mate natira. Ma n ara tai n nanokawaki anne, ti a manga karekea te bwaintangira ae aki kantaningaaki mairoun Iehova. E a bati riki ara reirei n te Baibara ake ti kairi nakon are mai mwaina. E aki koro teuana te ririki imwina ao e a keerake mwaitiia taan uarongorongo n te ekaretia man 35 nakon 70, ao mwaitiia aika a kaea te taromauri man 40 nakon 220. Ti rangi n tatabetabe n te mwakuri ni minita ao e reke kabebeteau man ana kakabwaia Iehova. Ma ti teimatoa n iaiangoa ao ni kakarakina natira ae tangiraki arei. Ti ingainga nakon te tai are ti na nora iai aron Iehova ni kamarurunga raoi nanora.

Mats: N te tai teuana, ao e a rangi ni kua Ann-Catrin. E a reke irou te kaentia n te kanoannano ao I a kainnanoa te korokoro ae bubura. Ma ngkai I a marurung ao e kabanea ana konaa Ann-Catrin ni beku iroun Iehova.

Ti a ataia ae bon tiaki tii ngaira ni kabokorakora ma kataaki. Imwin tiringakia kaain te reeti teuana are riki i Rwanda n 1994, ti a kawariia taari mwaane ao aine aika bati n aia kaembwa naake a birinako mai abaia. Ti reireinaki man noran aia onimaki, nanomwaakaia, ao aia mwakuri n akoi, bwa bon iai mwaakan Iehova ni kateimatoaia ana aomata ni kataakia nako.—TaiAre. 55:22.

Ann-Catrin: E reke riki te kangaanga teuana ngke ti kaea katabuan te aobiti n tararua i Uganda n 2007. Imwin te botaki ao ti mwananga n oki ma mitinare ao kaain te Betaera aika tao 25 nako Nairobi, i Kenya. Imwain rokora n tian aban Kenya ao e a kaoti naba te kaa ni kaako ae bubura n taonaanako kawaira ao ni kuratinira. A mate naba ngkekei raoraora aika niman ao e a manga mate imwina riki te tari te aine temanna n te onnaoraki. Ti kariariaa te tai ae ti na manga noriia raoraora aikai.—Iobi 14:13-15.

Imwina riki ao I a marurung man ikoakiu. Ma ti bon rotaki ngai ma Mats mai buakoia bwatintia n te tai arei, n te raraoma ae korakora imwin te bwai ae kakamaaku ae riki. E roroko angina irou n te tairiki, ao I namakina iai ae kaanga e na toki buroou. E kakamaaku anne. Ma ti buokaki n tokanikai man te botumwaaka n tataro nakon Iehova ao n raonaki ma te kabebeteaki ae reke man ara kibu tabeua aika ti tatangiri. Ti karekea naba buokara mairouia taokita ao ti boni buokaki iai. Ti a namakina riki te korakora ngkai, ao ti butiia Iehova bwa e na buokira ni kabebeteia tabemwaang ake a kabokorakora naba ma te aeka ni karawawataaki aei.

Ngke kam kabwarabwaraa aromi ni kabokorakora ni baika kam rinanoi aika kangaanga ao kam taekinna ae e uouotingkami Iehova n aroni “bunnimoa aika tuai kaburoaki.” Tera ae kam nanonna iai?

Mats: E reke te taeka anne man te taetae n Swahili ae kangai “Tumebebwa kama mayai mabichi,” ke “Ti uouotaki n aroni bunnimoa aika tuai kaburoaki.” N aron te aomata ae karaurau raoi n uotii bunnimoa aika tuai kaburoaki, e boutokaira naba Iehova ma te akoi ni mwiokoara nako. A rereke n taai nako baike ti kainnanoi, ae riaon naba ae ti kainnanoi. Te anga teuana ae ti namakina iai tangirara iroun Iehova ao ana boutoka boni man aia atataiaomata kaain te Rabwata n Tautaeka are a kaotiotia nakoira.

Ann-Catrin: I kan taekina teuana te katoto ibukin ana boutoka Iehova. N te bong teuana ao I a tarebooniaki n tuangaki ae e a rangi n aoraki tamau are maeka i Sweden, ao e a rin n te onnaoraki. E a tibwa marurung naba Mats man aorakina ae te maraeria. E a aki tau ara mwane ni kabwakaa kantokara n okira abara, ngaia are ti baireia bwa ti a riai ni kaboonakoa ara kaa. Imwina e a manga roko riki tarebooniara uoua te tai, teuana mairouia te taanga teuana ae a ongo ara kangaanga ao a tangiria ni kabwakaa kantokan temanna. Are teuana e roko mairoun te tari te aine ae e a kara ae kakaikoa ana mwane n ana kaibwaoki ae korea iai, “Ibukin temanna ae kainnanoa buokana.” Tii i nanon tabeua te miniti ao e a reke naba buokara iroun Iehova!—Ebera 13:6.

Tera ae kam a tia n reiakinna ngkana kam iaiangoa ami beku ni kabwanina ami tai ae 50 te ririki maanna?

Ann-Catrin: I a ataia ngkai ae e reke korakorara ngkana ti “teimatoa n rau ao n onimaki.” Ngkana ti onimakina Iehova, e na boni buaka ibukira. (Ita. 30:15; 2Rong. 20:15, 17) Man arora ni kabanea ara konaa n ara beku iroun Iehova ni mwiokoara nako, ti a karekei kakabwaia aika bati riki nakon are ti kona ni karekei.

Mats: Reireiau ae kakawaki ae I karekea bon onimakinan Iehova n taai nako ao n nora arona ni karaoi bwaai ibukiu. (TaiAre. 37:5) E buokira n taai nako n aron are e a tia ni beritanna. Ti teimatoa n nora koauan aei ni mwiokoara ngkai n te Betaera i Myanmar.

Ara kantaninga bwa a na nora naba ana tangira ae koaua Iehova ae e a tia ni kaotia nakoira, rooro n rikirake aika bati aika a tangiria ni karababaa aia mwakuri ni minita. Ti onimakinna ae a na kariaia Iehova bwa e na buokiia ni kaangaraoiia ma bitaki ao ni kukurei n taabo nako ake a mwiokoaki iai.