Teimatoa n Reiakini Moan Reirei Man te Baibara

1. Tera aron rotakim n taian reirei man te Baibara ngke ko moan reiakina te koaua?

A A TIA moan reirei man te Baibara ni bitii maiura. N te katoto, ngke ti a reiakinna ae aran te Atua bon Iehova, ti a moanna naba n riki bwa raoraona. (Ita. 42:8) Ngke ti reiakina te bwai raoi ae riki nakoia maate, ti a aki manga iangoia bwa a rawawata ara koraki aika tangiraki iroura aika a a tia ni mate ke aki. (TeMin. 9:10) Ao ngke ti reiakina ana berita te Atua ibukin te Bwaretaiti n te aonnaba, ti a aki manga raraoma ibukin taai aika imwaira. Ti a kakoauaa ae ti kona ni maiu, tiaki tii i nanon te tai ae uarereke ae tao 70 ke 80 te ririki, ma n aki toki.​—TaiAre. 37:29; 90:10.

2. E kangaa ni kaotaki n 2 Betero 1:​12, 13 ae a kakabwaiaaki naba Kristian aika ikawai n te onimaki mani moan reirei n te Baibara?

² Ti aki riai ni kakeaa bongan taiani moan reirei man te Baibara. N ana kauoua n reta te abotoro Betero ao e koroboki nakoia Kristian ake a “teimatoa n te koaua.” (Wareka 2 Betero 1:​12, 13.) N te tai anne ao a kaaitara ma kangaanga i nanon te ekaretia, irouia naba taan angareirei ni kewe ao mwaane aika aki tangira te Atua. (2Bet. 2:​1-3) E tangiria Betero ni kakorakoraia tarina ao mwaanena bwa a aonga n tokanikai i aoni kangaanga aikai. Ni karaoan anne, e a kauringia reirei tabeua ake a a kaman reiakin. A na buokaki n reirei aikai bwa a na kateimatoa etin aroia n uaa te toki.

3. Taekina te katoto ngkai a riai Kristian ni kabane n teimatoa ni kananoa aia iango ni moan reirei man te Baibara.

³ Ngkai ti rikirake bwa Kristian aika ikawai n te onimaki, ti kona ni karekei reirei aika boou ni moan reirei man te Baibara. N te katoto: A kona ni kamanenai taian rengarenga aika titeboo, te tia kuuka ae mwaatai ao ae e aki mwaatai ngkana a na katauraoa te amwarake teuana. Ma ni waakinakon te tai, e a atai riki aroni kamanenaani rengarenga aikai te tia kuuka are mwaatai ao ni katauraoa ana kuuka n aanga aika boou ao a kakaokoro. N aron anne, a kona naake a a maan ni beku iroun Iehova ao aika boou ake a reirei n te Baibara, n tarai moan reirei man te Baibara n itera aika kakaokoro. A kona ni bibitaki baike ti rinanoi ke mwiokoara man te tai are ti bwabetitoaki iai. Ngkana ti maiuakin ngkai reirei ake ti reiakin ngkoa, ti kona n nori iai reirei aika boou ao aika manena. Ti na noria bwa tera reireiaia Kristian aika ikawai n te onimaki ni moan reirei aika tenua man te Baibara.

BON TE TIA KARIKIRIKI IEHOVA

4. Tera aron rotakira n ataakin ae Iehova bon te tia Karikiriki?

⁴ “Ane e katei bwaai ni kabane bon te Atua.” (Ebera 3:4) Ti ataia ae e karikaki ara buraneti ao baika a maiu ake i aona, iroun te tia Karikiriki ae wanawana ao moan te mwaaka. E boni karaoira, ngaia are e atai arora ni kabane. Ae kakawaki riki e bon tabeakinira. E ataa ae te kabanea n tamaroa ibukira. Ngaia are ataakin te koaua ae Iehova bon te tia Karikiriki, e rotii maiura n aanga aika rangi n tamaroa ao e anganira te maiu ae manena.

5. Tera te koaua ae kona ni buokira ni karikirakea te nanorinano? (Itaia 45:​9-12)

⁵ Ti kona n reireinaki te nanorinano n te koaua ae Iehova bon te tia Karikiriki. E rangi ni kaatuua ana iango Iobi i aona ao i aoia aomata tabeman, ngaia are e a kauringnga Iehova imwina ae boni Ngaia te tia Karikiriki ae moan te mwaaka. (Iobi 38:​1-4) E buokaki Iobi n te kauring aei n ataia ae e rianako riki aron te Atua nakon aroia aomata. E korea naba ae ai aron anne imwina riki te burabeti are Itaia ni kangai: “E riai te bokaboka ni kangai nakon te tia Karaomwangko: ‘Tera ae ko karaoia?’ ”​—Wareka Itaia 45:​9-12.

6. N ningai te tai ae ti riai n iaiangoa iai rietatan nakoan Iehova ae ara tia Karikiriki? (Nori naba taamnei.)

⁶ Ngkana e a rikirake mwaatain te Kristian, e kona ni manga rangi n onimakina oin ana iango nakon ae e na kawara Iehova ao Ana Taeka ibukini kairana. (Iobi 37:​23, 24) Ma tera aron te aomata ae kananoa raoi ana iango n te wanawana ae akea kabotauana ao ni kakannaton ana tia Karikiriki? (Ita. 40:22; 55:​8, 9) E na buokaki n te koaua ae kakawaki aei bwa e na teimatoa n nanorinano ao ni kateimatoa ana iango n te aro ae riai.

7. Tera are karaoia Rahela ni butimwaea te bitaki n te kaetieti?

⁷ E noria Rahela ae maeka i Slovenia, bwa e buokaki n iaiangoan ana tia Karikiriki bwa e na butimwaea te bitaki n ana botaki Iehova. E taku neiei: “N tabetai e kangaanga irou butimwaeani babaire aika karaoaki irouia naake a kairiri. N te katoto, I aki kukurei ngke I moan nora te tari te mwaane ae buai ni kabwarabwara, e ngae naba ngke I a tia ni matakuakina Ana Ka-8 ni Kaongora te Rabwata n Tautaeka 2023. Ngaia are I a tataro nakon Iehova bwa e na buokai ni butimwaea te bitaki aei.” E ataia Rahela ae ngkai te tia Karika karawa ao aonnaba Iehova, e boni kona ni kaira ana botaki n te aro ae kororaoi i nanon te kawai ae eti. Ngkana ko noria bwa e kangaanga iroum kaangaraoam nakon te ota ae boou ke butimwaean te kaetieti ae boou, e aera ko aki kananoa am iango i aon te wanawana ae rianako ao mwaakan ara tia Karikiriki?​—IRom 11:​33-36.

E AERA NGKAI E KARIAIA TE RAWAWATA TE ATUA

8. Ti kangaa ni kakabwaiaaki man ataakin ae e aera ngkai e kariaia te rawawata te Atua?

⁸ E aera ngkai e kariaia te rawawata te Atua? Tabeman ake a aki ataa kaekaan te titiraki anne a un iroun te Atua ke a iangoia bwa bon akea ngaia! (TaeRab. 19:3) Ni kaitaraan anne, ko a tia n reiakinna ae e riki te rawawata man rikiara ae te bure ao te aki kororaoi, tiaki mairoun Iehova. Ko a tia naba n reiakinna ae man ana taotaonakinnano Iehova nakoia aomata, a a kona mirion ma mirion ni karekea kinaakina ao n noria i bon irouia aron Iehova ni kamauna raoi te rawawata. (2Bet. 3:​9, 15) A a tia koaua aikai ni kabebeteko ao ni katikiko bwa ko na kaan riki nakoina.

9. N ningai taai aika ti kona n iaiangoia iai bwa e aera Iehova ngkai e kariaia te rawawata?

⁹ Ti ataia ae ti kainnanoa te taotaonakinnano ngkai ti tataningaa Iehova bwa e na katoka te rawawata. Ma ngkana e mate ae tangiraki iroura ke ngkana ngaira ke ara utu aika rinanoni kangaanga ke te ribuaka, ti kona n un ibukina bwa e tuai mani katoka te rawawata Iehova. (Aba. 1:​2, 3) N taai akanne, ao ti wanawana ngkana ti iaiangoi bukina bwa e aera Iehova ngkai e kariaia te aomata ae raoiroi bwa e na rinanon te kangaanga.a (TaiAre. 34:19) Ti kona naba n iaiangoa ana kantaninga are e nang kamauna te rawawata n aki toki.

10. E kangaa ni buokaki Anne ni maten tinana?

¹⁰ E kona ni buokira n nanomwaaka te koaua ibukin te rawawata. E taku Anne ae maeka n te aba ae Mayotte, n te Indian Ocean: “I rangi n nanokawaki ni maten tinau tabeua te ririki n nako. Ma I aki toki ni kakauringai ae e aki karika te rawawata Iehova. E ingainga nanona ni kani kamaunai aeka n rawawata nako ao ni kautiia ara koraki aika tangiraki iroura. E reke raun nanou ngke I kananoa au iango i aoni koaua aikai.”

11. E kangaa ni buokira bwa ti na teimatoa n uarongorongo ataakin ae e aera ngkai e kariaia Iehova rikin te rawawata?

¹¹ E kona ni kaungaira bwa ti na teimatoa n uarongorongo ataakin te koaua ae e aera te Atua ngkai e kariaia te rawawata. E korea aei Betero ngke e tia ni kabwarabwaraa ana taotaonakinnano Iehova ae karekea kamaiuaia naake a rairi nanoia: “Iaiangoia bwa tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua.” (2Bet. 3:11) Teuana i buakoni “mwakuri ibukin tangiran te Atua” bon ara mwakuri ni minita. N aron Tamara, ti tangiriia aomata. Ti tangiriia bwa a na maeka n ana aonnaba ae boou ae raoiroi te Atua. E taotaona nanona Iehova n angania aomata n am aono aia tai n taromauria. Ai tamaroara mwiokoam ae te riki bwa raon te Atua ni mwakuri ao ni buokiia aika bati n reiakina taekana imwain rokon te toki!​—1Kor. 3:9.

TI A MAEKA NI “KABANEANI BOONG”

12. Ti kangaa ni kakabwaiaaki n ataakin ae ti a maeka ni “kabaneani boong”?

¹² E kabwarabwaraaki raoi n te Baibara aroia aomata ni “kabaneani boong.” (2Tim. 3:​1-5) Ti kona n nora koauan raoi te bae taekinna te Baibara ngkana ti nori aroaroia aomata aika i rarikira. Ngkai ti a nora aroia aomata bwa e a rikirake ni buakaka, ti a kakoauaa riki nakon are mai mwaina bwa e boni kona n onimakinaki ana Taeka te Atua.​—2Tim. 3:​13-15.

13. N aron ae oti n ana kaikonaki Iesu n Ruka 12:​15-21, tera ae ti kona n titirakinira iai?

¹³ Ti butimwaea te koaua ae ti a maeka ni kabaneani boong n arora n umaki. Nora reireiara ae reke ibukin te umaki man ana kaikonaki Iesu ae koreaki n Ruka 12:​15-21. (Warekia.) Bukin tera ngke e aranaki te mwaane ae kaubwai bwa te “nanobaba”? Tiaki ibukina bwa e kaubwai ma ibukina bwa e kairua baike e moanibwai. E “kaiko i bon ibukina, ma e aki toronibwai i matan te Atua.” E aera ngkai e riai n umaki ni karaoa te bitaki? E kangai te Atua nakon te mwaane aei: “A boni kan anaa maium mairoum n te tairiki aei.” Ngkai e a uakaan tokin te waaki ae ngkai, ti kona n titirakinira ni kangai: ‘Tera ae oti man tiau ni kaineti ma nanou n umaki? Tera aron tiaia natiu ake I buokiia bwa a na katei? I kamanena korakorau, au tai, ao au mwane ni kaiko i bon ibukiu ke ibukini baika kakawaki i karawa?’

14. E kangaa rongorongoni Miki ni buokira n ataia bwa e aera e kakawaki iroura ururingan ae ti a maeka ni kabaneani boong?

¹⁴ E kona ni bitaki ara iango ibukin te maiu ngkana ti iaiangoa koauan ae ti a maeka ni kabaneani boong. Anne te bwai ae riki iroun te tari te aine ae Miki. E taku neiei: “Ngke I a angabeeba man te reirei, ao I rangi n tangiria ni karekea au mwakuri ae N na kamatebwaia iai taekaia maan. I katea naba tiau ae te bwaiania ae katoatai ao te beku n te tabo ae kainnanoaki riki iai te ibuobuoki. Ma a kauringai raoraou aika ikawai n te onimaki bwa N na karaua raoi n iangoia ngkana I kona ni karekea au mwakuri ni kareketianti ae I tangiria ao ni karokoai naba n tiau n te onimaki ke I aki. A kauringai ae i aoni kawaina n toki te waaki ae ngkai. N te itera are teuana, n te aonnaba ae boou ao N nang reiakini n aki toki taekaia maan aika bati ake I tangiri. Ngaia are I a anaa au kooti ae uarereke. E reke iai au mwakuri ni kareketianti ae boutokaa au bwaiania ae katoatai ao imwina riki I mwaing nako Ecuador, ae te tabo ae kainnanoaki riki iai te ibuobuoki.” E beku ngkai Miki ma buuna n te mwakuri ni mwamwananga n te aono, n te aba anne.

15. Tera aroia aomata nakon te rongorongo ae raoiroi? Taekina te katoto. (Nori naba taamnei.)

¹⁵ Ti aki riai ni kabwarai nanora ngkana a rawa aomata n te moantai ni butimwaea te rongorongo ae raoiroi. A kona ni bitaki aomata. Iangoa ana katoto tarin Iesu are Iakobo. E nora ikawairaken Iesu, ngke e riki bwa te Mesia, ao n angareirei n te aro ae rianako riki nakoia aomata. E aki irira Iesu Iakobo i nanon ririki aika bati. Ma e a tibwa riki bwa te tia rimwin Iesu imwin raoi kautakina ao e ingainga iai!b (Ioa. 7:5; IKar. 2:9) Tai iangoia bwa akea uaani kawaraia am koraki ake a tuai kan ongora ke manga okiraia naake a aki butimwaea rongorongon te Tautaeka n Uea. Uringnga ae ti a maeka ni kabaneani boong, ngaia are e a kaumakaki ara mwakuri n uarongorongo. A kona n rotaki imwina riki n te bae ko taekinna nakoia ngkai, tao imwin naba moanakin te rawawata ae korakora.c

TEIMATOA NI KAKAITAU IBUKIN ANA KAURING IEHOVA

16. Ko kangaa ni kakabwaiaaki man ana kauring Iehova? (Nora naba te bwaoki ae “Kamanenai ni Buokiia Iai Tabemwaang.”)

¹⁶ Tabeua amwarake n taamnei ake ti anganaki a katauraoaki ibukia aomata ake a tuai ongongo moan reirei man te Baibara. N te katoto, iai ara kabwarabwara ibukia aomata ni katoa wiki, kaongora ao taamnei tabeua n jw.org, ao ara maekatin ibukia aomata, aika katauraoaki ibukia naake tiaki taani Kakoaua. Ma ti boni kakabwaiaaki naba ni kauring akanne. E a kakorakora iai tangiran Iehova iroura ao onimakinan ana Taeka, ao ti buokaki iai bwa ti na rabakau riki ngkana ti reireinia aomata moani koaua man te Baibara.​—TaiAre. 19:7.

17. N ningai ae ko riai n iaiangoi iai moan reirei man te Baibara?

¹⁷ Ngkai Ana Tia Kakoaua Iehova ngaira, ti rangi ni kukurei ngkana e a manga kamatataaki riki otara n te koaua teuana man te Baibara. Ma ti rangi ni kakaitau naba ibukin reirei aika kakawaki man te Baibara aika katikira nakon te koaua n te moantai. Ngkana ti kaririaki bwa ti na karaoi oin ara iango nakon ae ti na ongeaba n te kaetieti man ana botaki Iehova, ti kona n nanorinano n ururingnga bwa antai ae kaira te botaki anne, ae bon teuare moan te mwaaka ao te tia Karikiriki ae wanawana. Ngkana ti nanomwaaka i aan te kataaki ke iai ara koraki ae tangiraki iroura ae kataaki, ti kona n taotaon nanora ao n iangoia bwa e aera Iehova ngkai e kariaia te rawawata. Ao ngkana ti iangoia bwa ti na kangaa ni kamanena raoi ara tai ao kaubwaira, ti kona n ururinga ae ti a maeka ngkai ni kabaneani boong. E bia teimatoa ana kauring Iehova ni kakorakoraira, ni kaungaira, ao ni kawanawanaira.