Akea te Bwai ae E Aki Konaaki ni Bain Iehova

1. E kangaa Mote ni kaota onimakinan Iehova ngke e kairiia tibun Iteraera ni kaotinakoia mai Aikubita?

TEMANNA i buakoia naake a taekinaki n te boki ae Ebera ae te katoto ibukin te onimaki ae rianako, boni Mote. (Ebera 3:​2-5; 11:​23-25) E kaota ana onimaki ngke e kairiia tibun Iteraera ni kaotinakoia mai Aikubita. E aki maaka Barao ma ana taanga ni buaka. E onimakina Iehova ao e kairiia aomata rinanon Taari are Uraura ao imwina nakon te rereua. (Ebera 11:​27-29) Angia tibun Iteraera a aikoa onimakina Iehova bwa e na kona n tabeakinia, ma e teimatoa Mote n onimakina Atuana. E bon aki matebuaka ana onimaki Mote, bwa e katauraoa te amwarake ao te ran te Atua n te kakai ni kateimatoa maiuia aomata n te rereua.a​—TeOti. 15:​22-25; TaiAre. 78:​23-25.

2. Bukin tera te Atua ngke e titirakina Mote ni kangai: “Iai te bwai ae e aki konaaki ni bain Iehova”? (Warekaia Iteraera 11:​21-23)

² N aki ongea korakoran ana onimaki Mote, ma tao teuana te ririki imwini kamaiuaia tibun Iteraera n te kakai, ao e a manga raraoma bwa e kona Iehova n angania Ana aomata te irikomaiu ke e aki. E riaon ana iango Mote bwa e na kangaa Iehova ni katauraoa te irikomaiu ae tau ni kanuaiia mirion ma mirion aomata ake a kaembwa n te rereua ae tionako. E titirakina Mote Iehova ni kangai: “Iai te bwai ae e aki konaaki ni bain Iehova?” (Wareka Warekaia Iteraera 11:​21-23.) E kaineti te taeka ae “bain Iehova” nakon taamnein te Atua, ke mwaakana ae mwamwakuri. Ai aron ae e titiraki Iehova nakoni Mote ni kangai, ‘Ko iangoia bwa I aki kona ni karaoa te bae I taekinna bwa N na karaoia?’

3. Bukin tera bwa ti riai n iaiangoa rongorongoni Mote ao tibun Iteraera?

³ Ko a tia n raraoma bwa e na bon tabeakini kainnanom Iehova ke kainnanoia am utu ke e na aki? Ngkana ko raraoma ke ko aki ma ti na neneri baike e rinanoi Mote ao tibun Iteraera ake a aki onimakina te Atua ae e na kona ni katauraoi kainnanoia. A na buokira booto n reirei man te Baibara ni kateimatoa onimakinan ae e aki kona ni konaaki bain Iehova.

REIREIARA MAIROUNI MOTE AO TIBUN ITERAERA

4. Tera ae kairiia aika bati bwa a na raraoma iroun Iehova bwa e kona ni katauraoi baike a kainnanoi ke e aki?

⁴ Iangoa te baere riki. A mena n te rereua ae abwabwaki i nanon tabeua te tai te natannaomata are Iteraera ao “aomata aika kakaokoro nako” aika tiaki tibun Iteraera ngke a mwananga mai Aikubita nakon te Aba ni Berita. (TeOti. 12:38; TuaKau. 8:15) A a kua aomata aika kakaokoro ni kana te manna ao a bati naba tibun Iteraera aika ngurengure iai. (WarIte. 11:​4-6) A a kani kang amwarake ake i Aikubita. Ibukina bwa a ngurengure aomata, e a iangoia Mote bwa e riai ni karekea te irikomaiu ibukia aomata ni kabane.​—WarIte. 11:​13, 14.

5-6. Tera reireiara n aron rotakia tibun Iteraera aika bati irouia aomata aika kakaokoro nako?

⁵ A rotaki tibun Iteraera n aia aki kakaitau aomata aika kakaokoro nako. Ti kona naba n iraraang n aia aki kakaitau tabemwaang ao n riki bwa aomata aika aki rauaki ni baike e katauraoi Iehova. E kona n riki anne ngkana ti tanrikaaki n tarai baike iai ngkoa iroura ke ngkana ti a moanna ni bakantang ni baike iai irouia tabemwaang. Ma ti na boni kukurei riki ngkana ti karikirakea te raunnano, n aki ongei baike ti rinanoi.

⁶ A riai n uringnga tibun Iteraera ae e a tia ni karaui nanoia te Atua bwa ngkana a roko ni mwengaia ae boou, a na boni kukurei ni bwaai aika bati. E kakororaoaki te berita anne n te Aba ni Berita, tiaki ngke a mwananga n te rereua. N aron anne, n oneani mwin are ti na kaatuua ara iango i aoni baika akea iroura n te waaki aei, ti karaoa ae raoiroi ngkana ti kaatuua ara iango i aoni baika e beritan Iehova bwa e na anganira n te aonnaba ae boou. Ti kona naba ni kananoa ara iango i aoni kiibu aika kona ni buokira ni kateimatoa onimakinan Iehova iroura.

7. Bukin tera ngkai ti kona n onimakinna bwa e aki kona ni konaaki bain Iehova?

⁷ Ma ko bae n iaiangoia bwa e aera te Atua ngke e titirakina Mote ni kangai: “Iai te bwai ae e aki konaaki ni bain Iehova?” E tangiria Iehova bwa e na iaiangoi Mote baika uoua: (1) Akea tiani mwaakana. (2) E kona ni kamanena mwaakana n taabo nako, ao n taabo ake a raroanako. E kona te Atua ni katauraoa te irikomaiu ae bati ibukia tibun Iteraera n aki ongeia bwa a mena n te rereua ae raroanako. E kaota mwaakana te Atua n “te bai ae korakora ao n te bai ae aroraki.” (TaiAre. 136:​11, 12) Ngaia are ngkana ti kataaki, ti aki riai n nanououa ni bain Iehova ae kona ni buokira n tatabemanira nako.​—TaiAre. 138:​6, 7.

8. Ti na kangaa n aki karaoa te kairua are a karaoia aika bati n te rereua? (Nora naba te taamnei.)

⁸ E waekoa Iehova ni katauraoa te irikomaiu, ao e angania aomata kanaia te kuere ae bati. A aki kakaitau tibun Iteraera nakon te Atua ibukin te kakai aei. Ma a bati aika e korakora irouia te nanonrang. A mwakuri ni kabongnga ao ni kangainaa n rikorikoi kuere aika bati. E rangi n un Iehova irouia naake a “kaotiota te nanonrang,” ao e kamateia. (WarIte. 11:​31-34) E reke reireiara man te katoto anne. Ti riai n taratara raoi bwa ti na aki mwane n te nanonrang. E ngae ngke ti kaubwai ke ti maiu ni kainnano, ti riai ni moanibwaia moa kaikoani “baika kakawaki . . . i karawa” n arora ni kateimatoa ara iraorao ae kaan ma Iehova ao Iesu. (Mat. 6:​19, 20; Ruka 16:9) Ngkana ti karaoa anne, ti kona ni kakoauaa ae e na katauraoi Iehova bwaai ibukira.

9. Tera ae ti kona n onimakinna raoi n ana ibuobuoki te Atua?

⁹ E tauraoi Iehova ni buokiia ana aomata ni boong aikai. Nanon aei bwa ti nang aki kainnanoa te mwane ao te amwarake? Tiaki ngaia anne.b Ma e na bon aki kitanira Iehova. E na boni kateimatoaira ni kataakira aika kakaokoro. Ti kona n nora koauan anne ngkana ti iangoi itera aika uoua aika ti kona iai ni kaota onimakinan ae e tauraoi Iehova ni katauraoi baike ti kainnanoi: (1) ngkana ti kaaitara ma te kangaanga ma te mwane ao (2) ngkana ti bairei baika ti kainnanoi nakon taai aika imwaira.

NGKANA TI KAAITARA MA TE KANGAANGA MA TE MWANE

10. Baikara kangaanga ma te mwane ae ti kaaitara ma ngaia?

¹⁰ Ngkai e a kaan tokin te waaki ae ngkai, ti kona ni kantaningaia bwa e a kangaanga riki karekean te mwane. Ana kamangaongao te tautaeka, aia itabarara taanga ni buaka, kabuanibwai aika karina, ke aoraki aika boou, a karekei kabanemwane aika aki kantaningaaki ke buan ara mwakuri ni kareketianti, ara bwai, ke mwengara. Ti na bae ni kakaaea ara mwakuri ae boou n ara tabo ke n iangoa te mwaing ma ara utu nakon te aono teuana bwa ti aonga ni karekei kainnanoia. Tera ae kona ni buokira ni karaoi motinnano ae oti iai bwa ti onimakina bain Iehova?

11. Tera ae kona ni buokiko ni kaitaraa te kangaanga ma te mwane? (Ruka 12:​29-31)

¹¹ Te anga ae te kabanea n tamaroa boni kaotan tabeaiangam nakon Iehova. (TaeRab. 16:3) Bubutiia te wanawana ae ko kainnanoia ni karaoi motinnano aika raraoi ao te nano ae rau bwa ko na ‘katoka te raraoma’ ibukini baike ko rinanoi. (Wareka Ruka 12:​29-31.) Bubutiia bwa e na buokiko ni karikirakea te raunnano ni baike ko kainnanoi ni maium. (1Tim. 6:​7, 8) Karaoa am ukeuke n ara boki i aon arom n tokanikai i aon te kangaanga ma te mwane. A bati aika a tia ni buokaki ni baika katauraoaki i aon jw.org ae kaineti ma kangaanga ibukin te mwane.

12. Baikara titiraki aika a na buoka te Kristian bwa e na karaoa ana motinnano ae raoiroi ibukia ana utu?

¹² A a tia tabeman ni butimwaea te mwakuri ni kareketianti ae kairiia bwa a na kitania aia utu, ma e oti bwa tiaki anne te motinnano ae kaota te wanawana. Imwain ae ko butimwaea te mwakuri ae boou, tai tii iangoa te boo iai ma iangoa naba rotakin am onimaki iai. (Ruka 14:28) Titirakiniko aei: ‘E na tera aron rotakin au mare ngkana I a raroa ma buu? Tera aron rotakin au bobotaki ni Kristian ao au mwakuri ni minita n te mwaing aei?’ Ngkana iai natim, ko riai naba n titirakiniko te titiraki ae kakawaki aei: ‘N na kangaa ni kaikawaa natiu “i nanon ana reirei ni kaetieti ao ana kaungaunga Iehova” ngkana akea ngai i rarikia?’ (IEbe. 6:4) Ko bia kairaki n ana iango te Atua, ao tiaki irouia am utu tabeman ke raoraom ake a aki karinei ana boto n reirei te Baibara.c E bati karirian Tony, ae maeka i Atia maeao ibukin te mwakuri i tinaniku. Ma imwin tataroakinan te kangaanga anne ao maroroakinana ma buuna, e a baireia bwa e na aki butimwaea te mwakuri anne ma e na mwakuria kauarerekean aia kabanemwane n ana utu. E ururing rikaaki Tony ni kangai: “E reke au tai ni buokiia aomata aika bati bwa a na kinaa Iehova ao a ingainga natira ibukin te koaua. E reke reireiara n ara utu bwa ngkana ti maiuakin taeka ake ni Mataio 6:​33, e na bon tabeakinira Iehova.”

NGKANA TI BAIREI BAIKA TI KAINNANOI NAKON TAAI AIKA IMWAIRA

13. Baikara mwaneka aika raoiroi aika ti kona ni karaoi ngkai aika a na buokira ni karekei baika ti kainnanoi ngkana ti a rikirake ni kara?

¹³ E kona naba ni kataaki onimakinani bain Iehova iroura ngkana ti iaiangoia bwa tera arora ngkana ti a rikirake ni kara. Ti kaungaaki n te Baibara bwa ti na mwakuri korakora bwa ti aonga n tabeakini kainnanora nakon taai aika imwaira. (TaeRab. 6:​6-11) E raoiroi ngkana ti kakawakina teutana ara mwane ibukin taai aika imwaira ngkana ti kona. E kona te mwane ni kamanoira n aanga aika bati. (TeMin. 7:12) Ma ti aki riai ni kariaia tangirani bwaikoraki bwa e na moanibwai ni maiura.

14. Bukin tera ngkai ti riai n iaiangoa Ebera 13:5 ngkana ti bairei baika ti kainnanoi nakon taai aika imwaira?

¹⁴ E kabwarabwaraa Iesu ae bon te nanobaba aron te aomata ae kaikoa ana mwane ma e aki “toronibwai i matan te Atua.” (Ruka 12:​16-21) Akea temanna ae ataa te bwai ae e na riki ningabong. (TaeRab. 23:​4, 5; Iak. 4:​13-15) Ti kaaitara ma te kangaanga teuana ngkai ti riki bwa taan rimwini Kristo. E taku Iesu bwa ti riai n tauraoi ni “kaaki” ara bwai ni kabane ao n riki bwa te tia rimwina. (Ruka 14:33.) A kukurei Kristian ake n te moan tienture i Iutaia ni kakeai aia bwai ma te kimwareirei. (Ebera 10:34) Ni boong aikai, a bati taari mwaane aika kitana aia mwakuri ni kareketianti ibukina bwa a rawa ni boutokaa te bwaatei teuana. (TeKao. 13:​16, 17) Tera ae buokiia ni karaoa anne? A onimakina raoi ana berita Iehova aei: “N na bon aki kaakiko ao N na bon aki kitaniko.” (Wareka Ebera 13:5.) Ti karaoa ara kabanea ni konaa ni bairei baika ti kainnanoi nakon taai aika imwaira, ao ngkana a riki baika aki kantaningaaki nakoira, ti onimakina ana ibuobuoki Iehova.

15. Tera ae a riai n iangoia kaaro aika Kristian ibukia natiia? (Nora naba te taamnei.)

¹⁵ Ni katei tabeua, ao taanga a kani karikiia natiia bwa a aonga natiia ni kona ni karekea aia mwane ae tau imwina ibukin tabeakinaia aia karo ngkana a kara. E taekinaki n te Baibara bwa a riai kaaro n tabeakina kainnanoia natiia. (2Kor. 12:14) E koaua ae a kona kaaro ni karekea te ibuobuoki teutana ngkana a kara, ao a bati ataei aika kukurei ni karaoa anne. (1Tim. 5:4) Ma a ataia kaaro aika Kristian ae e reke kimwareireia ae bati, mani buokaia natiia bwa a na riki bwa ana toro Iehova, ao tiaki mani kaikawaaia natiia ma iangoan ae e na reke aia mwane mairouia.​—3Ioa. 4.

16. A na kangaa kaaro ni katauraoiia natiia bwa a na boutokaiia i bon irouia ni karekea aia mwane? (I-Ebeto 4:28)

¹⁶ Reireinia natim man am katoto bwa a na onimakina Iehova ngkai ko tabe ni katauraoiia bwa a na kona ni boutokaiia i bon irouia. Kaota nakoia kakawakin te mwakuri korakora mangke a uarereke. (TaeRab. 29:21; wareka I-Ebeto 4:28.) Ngkana a ikawai, buokiia bwa a na karaoa aia kabanea ni konaa n te reirei. A kona kaaro aika Kristian ni karaoa aia kakaae ao ni kamanenai booto n reirei man te Baibara ni buokiia iai natiia ni karaoi aia motinnano ibukin aia reirei. A na buokaki iai natiia ni boutokaa maiuia ao ni kabatiaa naba aia tai n uataboa te mwakuri ni minita.

17. Tera ae ti kona ni kakoauaa raoi?

¹⁷ A kona ana toro Iehova aika kakaonimaki n onimakinna ae e kona Iehova ni karekei baika a kainnanoi n te itera n rabwata ao e kukurei ni karaoia. Ngkai ti a uakaan ma tokin te waaki ae ngkai, ti kona ni kantaningaia bwa e na kataaki onimakinan Iehova iroura. N aki ongeia bwa tera ae riki, ti bia motinnanoia bwa ti na onimakinna ae e na kamanena mwaakana Iehova ni katauraoi baika ti kainnanoi n te itera n rabwata. Ti kona ni kakoauaa raoi bwa e boni kona Iehova ni buokira ni baina ae korakora ao ni baina ae aroraki.