Nnen Titiraki

◼ A riai taan uarongorongo ni kakabongana te intanete, n uarongorongo ke n reirei iai ma aika ianena ake a maeka n te aba teuana?

A kabongana te intanete ni karekei aia reirei n te Baibara tabeman taan uarongorongo, n aaba ake a taburoroko iai ara mwakuri ke a karako iai taan uarongorongo. E a tia n noraki nakoraoini karaoana irouia tabeman. Ma, iai kangaanga ngkana taan uarongorongo a kakabooi meeri ke ni mamaroro n te intanete ma aika ianena. (Nora Ara Mwakuri ni Minita, Turai 2007 i. 3.) Ngkai bon te kantaninga ae e na karokoaki rongorongon te Tautaeka n Uea irouia naake a raoiroi nanoia, a kona maroro akanne ni kaira te tari te mwaane ke te tari te aine, nakon reitakia ae buakaka ma kaain te aonnaba ao taan tannako naba man te koaua. (1 Kor. 1:19-25; IKoro. 2:8) Irarikin anne, a bae n tutuoa aron te reitaki kaain te tautaeka n aaba ake a taburoroko ke ni kainaki iai te mwakuri ibukin te Tautaeka n Uea. A kona aeka n reitaki akanne n ruanikai iai taari n te tabo anne. Ngaia are, a aki riai taan uarongorongo ni kabongana te intanete n uarongorongo iai ibukini karekeaia aomata man te aba teuana.

Ngkana ti uarongorongo n te tai ae aki baireaki nakon te ianena ae roko man te aba teuana, ti na aki kataia ni karikirakea kan ongorana imwin okiran abana, ma tii ngkana e kariaiakaki man te aobiti n tararua are e mena iai. Ma, ti kona n tuangnga aroni kabonganaan te jw.org ni karekei riki rongorongo iai, ke arona n reitaki ma te aobiti n tararua n ana tabo. Ti kona naba ni kaungaa bwa e na kawara te Tabo n Taromauri ae uakaan ma ngaia. Ni koauana, akea Taabo n Taromauri n aaba tabeua. Ngkana e tangira kawarana irouia taani Kakoaua n ana tabo, ti riai ni kanoaa te booma ae Please Follow Up (S-43) ao n angan te tia koroboki n te ekaretia, bwa e na kanakoa n te jw.org. E riai te aobiti n tararua are e tabeakina te mwakuri n te aba are e mena iai te aomata ae kan ongora, n atai baika riiriki iai aika okoro ao e kona ni karekea te ibuobuoki n taamnei ae te kabanea n tamaroa.—Nora Ara Mwakuri ni Minita, Tun 2014 i. 7 ao Nobembwa 2011 i. 2.

Ngkana e mwaing te aomata ae ti kakawaria ngkai nakon te aba teuana, ke ti reirei n te Baibara ngkai ma temanna ae mena n te aba teuana are ti kinaa rinanon te intanete, ti riai n ira te babaire are e katuruaki taekana mai eta. Ma, ti kona n teimatoa ni karikirakea kan ongorana ni karokoa e kawaraki irouia taan uarongorongo i abana. Ngaia are, ngkana e maeka n te aba are e totokoaki ke ni kainaki iai ara mwakuri, e riai bwainan te iangoraoi ni maroroakinan atun reirei n te Baibara rinanon te reta, te tareboon ke te intanete.—Mat. 10:16.