Waekoa ni Karaoa te Mwakuri

Man te tai are e moani katauraoaki iai te atureti ae kakawaraki n te Internet, ao a roko naba taiani bubutii rinanon te Internet ibukin rikiraken tangiran te reirei n te Baibara. Iai bubutii tabeua ake a a tia n rinanoaki ao ni karaoaki rinanon aanga n uarongorongo aika boou. A rinanoaki bubutii aikai n te tai ae waekoa man te aobiti n tararua. N te katoto, ngkana e roko te bubutii rinanon te jw.org, ao a kona unimwaane ake n te aono are e mena iai te aomata ae kan ongora ni karekea te rongorongo man te aobiti n tararua tii uoua te bong imwina. Ma e ngae n anne, e kaotaki man te ribooti ibukin te mwakuri bwa a tuai mani kawaraki tabeman ake a bubutii ibukin te reirei n te Baibara i nanon tabeua te wiki. Ti na kanga ni kakoauaa raoi bwa e karekea te ibuobuoki te aomata ae kan ongora imwaini kekerikaakin nanona?​—Mareko 4:14, 15.

Ngkana e kaota te nano ni kan ongora te aomata ae aki mena n am aono, waekoa ni kanoaa te booma ae Please Follow Up (S-43) ao angan te tia koroboki n te ekaretia n aki iremwe nakon am botaki are imwina. E riai ngkanne te tia koroboki n te ekaretia ni kanakoa te booma nakon te ekaretia ke te aobiti n tararua ni kamanenaan te tabo ae katauaki ibukin te Ekaretia n te jw.org n aki iremwe imwin teuana ke uoua te bong. A riai unimwaane n tuoa te Atureti aei n taai nako. Ngkana a karekea te rongorongo bwa a na reitaki ma temanna, a riai ni waekoa ni karaoa nne. E riai ni moanibwai aei iroun te tia uarongorongo are e tuangaki bwa e na karaoa anne. Ngkana e aki mena te aomata n te auti, tao ko kona ni katuka te reta ae kimototo ao ni kaota am atureti.