Te Kaetieti Ibukini Wikin Beberuare 16

Anene 87 ao Tataro

Te Reirei n te Baibara n te Ekaretia:

fy mwa. 3 bar. 11-26 ao te bwaoki n i. 38 (30 min.)

Te Kuura ni Kataneiai Ibukia Taan Uarongorongo:

Wareware n te Baibara: Taani Motiki-Taeka 15-18 (8 min.)

Na. 1: Taani Motiki-Taeka 16:13-24 (3 min. ke i aana)

Na. 2: E Tabeakinira Iehova?—fg-i. 5 bar. 1-3 (5 min.)

Na. 3: E Kangaa ni Manga Kaokaki te Koaua ae n te Baibara?—jl-Reirei 3 bar. 1, 2 (5 min.)

Te Botaki Ibukin te Uarongorongo:

Te Boto n Iango n te Namwakaina: Bwaina te “Ingainga ni Kani Karaoi Mwakuri Aika Raraoi”!​—Tito 2:14.

Anene 92

15 min: Katauraoiko n Tataekina te Rongorongo ae Raoiroi ma te Ingaingannano. Te maroro. Bukin tera ngkai e riai ni moanibwaiaki te tataro nakon Iehova ibukini katauraoara n te mwakuri ni minita? (TA. 143:10; Mwa. 4:31) Tera ae kainnanoaki riki irarikin te tataro? (Etr. 7:10) Imwini katauraoan nanora ni bwaai n taamnei, baikara mwaneka ibukini katauraoan ara boki ma ara baeki ni mwakuri? Tera mwina ae raoiroi ae kona n reke iroura ngkana ti katauraoira raoi? (Nora Te Taua-n-Tantani ae bwain Turai 1, 2008, i. 14, bar. 9.) Tera arom ni katauraoiko imwain te mwakuri ni minita? Karekea te tia uarongorongo temanna are e na karaoa te kaotioti ni kaota iai aron te katauraoi n rinanoa te turaeki, maekatin, ke boroutia ake e na kamanenai n te mwakuri ni minita. E a bairea kanoan ana baeki ni mwakuri ao ni kakoauaa raoi bwa iai ana mobwaera are e na kona iai ni kaota te rongorongo ke te reirei ma iai. Katuruturua kakawakin te katauraoi imwaini karaoan te mwakuri ni minita. (2 Ti. 3:17)

15 min: “Ko Kakairi n Ingaingan Nanon Iehova ao Iesu n Namwakainan te Kauring Aei?” Titiraki ma kaekaaia. Tibwaa katoton te beeba ni kakao ibukin te Kauring nakoia kaain te ekaretia, ao maroroakina kanoana. Karaoa te kaotioti ae kimototo, ni kabongana aroni kabwarabwaraan te maekatin n te iteraniba 4.

Anene 30 ao Tataro