E Manena Ana Taeka te Atua Ibukin te Angareirei
1. Tera te boto n iango n te runga n aono n te ririki ni mwakuri ae 2014, ao tera te titiraki ae e na kaekaaki iai?
1 Bon te tia reirei ae te kabanea n raoiroi n te iuniweeti ara “tia reirei” ae Iehova. (Ita. 30:20, 21, BG) Ma e kanga Iehova n reireinira? E a tia ni katauraoa te boki ae rangi ni kakawaki riki nakoni booki nako, ae ana Taeka ae kairaki koreana ae te Baibara. E kanga te reirei mairoun te Atua ni buokira n te itera n rabwata, n ara iango, n ara namakin ao n ara onimaki? E na rinanoaki kaekaan te titiraki aei n te runga n aono n te ririki ni mwakuri ae 2014. E kangai te boto n iango n te runga n aono, “E Manena Ana Taeka te Atua Ibukin te Angareirei,” ae boto man 2 Timoteo 3:16.
2. Kaekaan titiraki raa aika a na katuruturuaki iai reirei aika kakawaki?
2 Tarai Reirei Aika Kakawaki Aikai: A na katuruturuaki reirei aika kakawaki n te runga, ni kaekaan titiraki aikai:
• Tera aron rotakini maiura n te reirei mairoun te Atua? (Ita. 48:17, 18)
• Tera karauan nanora ngkana ti kakorakoraira ni karaoi bitaki ni maiura, bwa ti aonga ni kabwanina ara tai ni beku ibukin Iehova? (Maraki 3:10)
• Tera arora ae riai ngkana ti kaaitara ma “reirei . . . aika raka”? (Ebera 13:9)
• Ti na kanga ni kakairi n ‘aron Iesu n angareirei’? (Mat. 7:28, 29)
• Bukin tera bwa a riai n reireinia moa taan angareirei n te ekaretia? (IRom 2:21)
• E manena ibukin tera Ana Taeka te Atua? (2 Tim. 3:16)
• A kanga n rotaki aomata n ‘ioioaia’ botannaomata? (Akai 2:6, 7, BG)
• Tera ae e aki nanououa iai Iehova iroura? (IEbe. 5:1)
• Bukin tera bwa ti riai ni mwakuri korakora bwa ti aonga n teimatoa ni karekea reireiara mairoun Iehova? (Ruka 13:24)
3. Bukin tera ngkai e kakawaki bwa ti na kaea te runga aei ae e a tia ni katauraoaki n taina ae riai, ao ni kakauongo raoi iai?
3 Ni moan 2 Timoteo mwakoro 3 imwaini korean taeka aika aana te boto n iango n te runga aei, ao e kabwarabwaraa Bauro taekan taai aika okoro ae kanikinaeani kabaneani boong. E korea ae kangai: “Ane a na ririkirake riki ni buakaka aomata aika buakaka ma taani mwamwanaa te aba, ni bureburea te aba ao ni burebureaki.” (2 Tim. 3:13) Ai kakawakira ngkanne bwa ti na ongeaba nakon ana reirei te Atua ao ni maiuakin, bwa ti aonga n aki burebureaki! Mangaia are ti bia motinnanoia bwa ti na kaea te runga aei ae e a tia ni katauraoaki n taina ae riai, ao ni kakauongo raoi iai.