‘E na Kakororaoaki Nanon te Atua’
1. Tera te boto n iango n te bong ni botaki ae okoro ibukin te ririki ni mwakuri ae 2012, ao e aera ngkai ti riai n iaiangoa te kaongora aei?
1 Ti karikaki ibukin nanon Iehova. (TeKao. 4:11) Ma e kona ni kangaanga kakororaoan nanoni bukini karikara ngkana ti aki reiakina ao ni karaoa nanon te Atua. E kona n taraa ni kangaanga aei ibukina bwa ti tabe ni kabokorakora ma mamaaran nanora, ae karaoani “baike e tangiri te rabwata ma te iango” ke n irii “nanoia kaain te aonnaba.” (IEbe. 2:3; 1 Bet. 4:3; 2 Bet. 2:10) N akean ana ibuobuoki te Atua, ti na bon rotakibuaka ngkana ti ‘raweaki iroun [te Riaboro] bwa ti aonga ni karaoa nanona.’ (2Tim. 2:26) N ara bong ni botaki ae okoro ibukin te ririki ni mwakuri ae 2012, ao e na buokira n tatabemanira nako bwa ti na kaboraoa ara mwakuri ma te katenua ni bubutii n te tataro ni katoto. (Mat. 6:9, 10) E kangai te boto n iango iai, “E na Kakororaoaki Nanon te Atua.”
2. Baikara titiraki aika a na kaekaaki n tain te botaki?
2 Titiraki Aika A na Kaekaaki: Ngkana ko kakauongo n tain te botaki ao ongoraei kaekaan titiraki aikai: Tera te bwai ae kakawaki riki irarikin ongoraeakinan Ana Taeka te Atua? Ti na kanga n teimatoa n ataa nanon te Atua ibukira? E aera bwa ti riai ni kukurei n anga nanora ni buokiia aomata n aekaia nako? Ti na kanga ni karekea te maiu ae manena ma ni kakawaki? Rooro n rikirake, tera ae kam riai ni kaotia nakon Iehova? Baikara kakabwaia aika a na reke mani karaoan nanon te Atua? E aera bwa e kaumakaki bwa ti na kateimatoaia ao ni kaungaia tabemwaang?
3. Ti na kanga ni kakabwaiaaki man te bong ni botaki ae okoro aei?
3 Ti bon riai n ira te botaki aei ao ni kakauongo raoi iai. E na roko naba n te tai anne temanna ae e mwiokoaki man te Betaera ke te mataniwi ae mwamwananga, bwa te tia kabwarabwara mai tinaniku. Imwain ao imwin te botaki ao karekea ami tai ni maroro ma teuanne ao buuna ngkana iai. Ngkana kam a okiri mwengami ao tai riki bwa ‘taan ongora aika mwamwaninga,’ ma rinanoa kanoan te botaki ma kaain ami utu ao maroroakina aromi ni kona ni kaboraoa raoi maiumi ma nanon te Atua.—Iak. 1:25.
4. Bukin tera bwa e kakawaki iroura moanibwaiani karaoan nanon te Atua?
4 N te tai ae waekoa ao a na boni kamaunaaki te koraki ake a uaiakini baike a tangiri ao ake a rawa n aantaeka ni karaoa nanon Iehova. (1 Ioa. 2:17) Mangaia are ti rangi ni kakaitau nakon Iehova ngkai e a tia ni katauraoa te reirei aei ae roko raoi n taina, bwa e na buokira ni moanibwaia karaoan nanona!