E Mwaaka Ana Taeka te Atua
1. Tera te boto n iango n te bong ni botaki ae okoro n te ririki ni mwakuri ae 2014?
1 E kaokoro baike a karaoi aomata aika a aki kororaoi ma te Baibara ae iai mwaakana ni bita maiura, ni kairi ara iango ao kawaira bwa e na boraoi ma nanon Iehova. Tera aroni korakorani mwaakan Ana Taeka te Atua? Ti na kanga ni kamanena raoi mwaakana ni maiura? Ti na kanga ni kamanena n te aro ae uaana, ni buokiia iai aomata? Akea ara nanououa bwa ti na bane n rikirake n te onimaki, kioina ngkai a na rinanoaki reirei aika kakawaki aikai n te bong ni botaki ae okoro n te ririki ni mwakuri ae 2014. E kangai te boto n iango iai, “E Mwaaka Ana Taeka te Atua,” ae aanaki n I-Ebera 4:12.
2. Baikara titiraki aika ti riai n ongoraei kaekaaia?
2 Kakaaei Kaekaan Titiraki Aikai: Ngkana ko ongoraea kanoan te botaki, ao korei kaekaan titiraki aika karinanaki i nano:
• Bukin tera bwa ti riai n onimakina Ana Taeka Iehova? (TaiAre. 29:4)
• Ti na kanga n nora mwaakan Ana Taeka te Atua ni maiura? (TaiAre. 34:8)
• Ko na kanga ni kamanena mwaakan Ana Taeka te Atua n am mwakuri ni minita? (2 Tim. 3:16, 17)
• Ti na kanga n rawa n riki bwa konan ana waaki Tatan ae kona ni mwamwanaa te aba? (1Ioa. 5:19)
• Ko na kanga ngkoe ae te roro n rikirake n roko n tiam n te onimaki? (Ier. 17:7)
• Ti na kanga ni korakora e ngae ngkana ti mamaara? (2 Kor. 12:10)
• Tera ae kainnanoaki ibukini kateimatoaani bitaki aika ti karaoi ni maiura, e ngae ngkana a bubuaka anuara ao aroarora i nanon te tai ae maan? (IEbe. 4:23)
3. Irarikin ongoraeani kanoan te bong ni botaki ae okoro, ti na kanga riki ni kakabwaiaaki iai?
3 Ti na rangi ni kakabwaiaaki n ongoraean te rongorongo ae kakawaki aei! Irarikin anne, e na reke ara tai ni kamwaawai nanora nakoia tarira ao mwaanera man ekaretia ake tabeua n te bong ni botaki ae okoro, n aron naba ae ti karaoia n te runga n aono ao te bwabwaro. (TaiAre. 133:1-3; 2 Kor. 6:11-13) Mangaia are karekea am tai n itamwaomwao ma raoraom ngkoa, ao ni karekeia aika boou. Ngkana e mwiokoaki nakon te bong ni botaki ae okoro n am aono, te tia kabwarabwara ae te iruwa n aron te mataniwi n te aono ae bubura ke te tari te mwaane temanna man te Betaera, e aera ko aki karekea am tai ni butimwaeia ma buuna? Ni koauana, a bati bukina ngkai ti kariariaa te bong ni botaki ae imwaira!