“Te Amwarake n te Tai ae Riai”
1. E kanga ni buokiko ao ni buokia tabemwaang te bong ni botaki ae okoro ae e a tia ni karaoaki?
1 Ti aki toki n atonga ae kangai imwini kaean ara bong ni botaki ae okoro, “Boni ngaia raoi anne ae ti kainnanoia!” E ribootinna temanna te mataniwi n te aono ae uarereke bwa imwin ongoraeia tabeman kaain ana aono n te bong ni botaki ae okoro, ao a kaota nanoia bwa a na kabatiaa riki aia tai n te mwakuri ni minita. E taku temanna te mataniwi ae mwamwananga, “E buokira bwa ti na tuoi baika ti rinei bwa ti na karaoi ni maiura n ataakin te tai ae ti a maeka i nanona ngkai.” E taku are temanna, “A kaota aia iango taan uarongorongo tabeman bwa ai aron te wewete ni kautiuti nakoia bwa a na taraia raoi bwa a kaatuua iangoan te mwakuri ni minita bwa te bwai ae moan te kakawaki.” E kanga ni buokiko te bong ni botaki ae okoro?
2. Tera ae e na rinanoaki n te bong ni botaki ae okoro n te ririki ni mwakuri ae e na roko?
2 E na buokira naba te bong ni botaki ae okoro ibukin te ririki ni mwakuri ae e na roko ibukini baika ti kainnanoi. E anaaki te boto n iango aei man Taian Areru 118: 8, 9 (NW) ae “Kamanoko Iroun Iehova.” Aikai riki reirei tabeua aika a na maroroakinaki: “Aron Iehova n Riki Bwa te Nono ni Kamaiu,” “Buokia Tabeman Bwa A na Karekea Kamanoaia i Aan Bain Iehova,” “Katotonga Iehova n Riki bwa te Tabo ni Kamanomano,” “Roro n Rikirake, Karika Iehova Bwa Mwiokoni Maium!” ao “Ara Bwaretaiti n Taamnei—E Katauraoia Iehova Ibukin te Kamanomano.”
3. Ti na kanga ni kakabwaiaaki mani kaeana?
3 Aroni Karekeani Kakabwaiaara Mai Iai: Ngkana e katanoataaki taina are e na boo iai, karaoa am babaire ibukini kaeana ao kaoia am reirei n te Baibara bwa a na iriko. Bwa ti aonga ni “karikiuaa ma te nanomwaaka,” ti riai ni ururingi baike ti ongoraei. (Ruka 8:15) Mangaia are kakauongo raoi nakon te bong ni botaki ae okoro ao taui mwin boto n reirei aika kakawaki n ikotaki naba ma reirei ake ko baireia bwa ko na kamanenai ni maium ao n te mwakuri ni minita. Karekea am tai imwin te botaki ni maroroakina iai te bong ni botaki ae okoro ma am utu, ao iangoi aanga aika kam na kamanena iai te reirei anne n am utu.
4. E aera ngkai ti riai ni kantaningaa ara bong ni botaki ae okoro ae e na roko?
4 Ai aron te amwarake ae kangkang ao ni kamarurung, e a katauraoaki ma te tangira ae bati ao ni barongaaki raoi te bong ni botaki ae okoro ibukin te ririki ae e na roko. E bia kakabwaiaa ami kakorakora Iehova ni kaeana iroumi ao mani karekei kakabwaiami man ‘te amwarake n te tai ae riai’ ibukini kamarurungaia Kristian aika minita ni kaineti ma te onimaki.—Mat. 24:45.