RONGORONGONI MAIUNA

E Beku Jairo Ibukin te Atua ni Matana

ANA KARAKI TARINA AE SAMUEL RUIZ-LEÓN ARROYO

Tera am iango ngkana ko a aki kona ni kammwakura rabwatam ma tii matam? Bon anne te kangaanga ae rinanona tariu ae Jairo. E ngae n anne, e rangi ni manena maiuna. Ma imwain ae N na kabwarabwaraa bwa e kangaa n riki anne, N na karakina moa rongorongona.

E bungiaki Jairo ma rinanin te aoraki ae te cerebral palsy ae te spastic quadriplegia.a Ibukin anne, e a aki kona ni kakammwakura rabwatana. E aki kona ana kaburoro ni kanakoa te rongorongo nakon ana mwatireti n te aro are a a kona ni kakammwakuri baina ma waena n aki akaka i bon irouia. E kona n ikoaki n tabetai Jairo ngkana e a tii karina naba n riki anne nakoina. A kona naba n ikoaki aomata ake i rarikina ngkana a aki taratara raoi. E kananokawaki bwa n angiin te tai, a boni kabaeaki baina ao waena ma ana wheelchair ibukin totokoan te kabuanibwai.

E IKAWAIRAKE RIBUAKON TE MARAKI AE KORAKORA

E rangi ni kammaraki ikawairaken Jairo. E moan reke irouna te katikitiki ngke tenua ana namwakaina ike e a kona n tong iai. E bae n rabwatia tinara ao ni waekoa n nakon te onnaoraki ni katoatai are e katikitiki iai ma n iangoia bwa e a mate.

Imwini kakatikitikin Jairo ao a a riki kangaanga nakon riina. Ngke 16 ana ririki, e a tibanako riini bebeena ike e a kainnanoa te korokoro ae bubura nakon rangana ao riini bebeena. I aki toki n ururinga tangitangin Jairo ni katoa tairiki ibukini marakina ngke e tabe ni kamarurungaki.

Ibukin aorakina ae kakaiaki anne, e a kainnanoia tabemwaang ibukin tabeakinana ni katoabong n aroni kaamwarakeana, oneakina ao kamatuana. A aki toki ni karaoi mwakuri akanne ara karo. E ngae ngke e kainnanoa te ibuobuoki n taai nako Jairo, a aki toki ara karo ni kauringnga are tiaki tii aomata ae e riai n onimakinia ibukini maiuna ma bon te Atua naba.

E A REKE TE ANGA IBUKIN TE REITAKI

Boni kaain Ana Tia Kakoaua Iehova ara karo ao a wawareki karaki man te Baibara nakon Jairo ngke e uarereke. A ataia bwa e kona n rangi ni manena te maiu ngkana e karekea ana reitaki temanna ma te Atua. E boni mamaara rabwatan Jairo n okiokini katikitikina, ma e kona ni karekea te kantaninga ae kakukurei ao ae nene ibukin taai aika a na roko. Ma a aki toki n tabeaianga ara karo bwa e ota raoi n te atatai man te Baibara ke e aki.

N te bong teuana ao e titirakinaki Jairo ngke e uarereke iroun tamara ni kangai: “I a butiiko Jairo, ko kona ni kataetaeai?” E reitia riki ni kangai: “Ngkana ko tangirai ao ko boni kona!” A waanako rannimatana ngke e butiiaki bwa e na taekina te taeka teuana. E kataia n taetae ma e tii otinako bwanaana ae uarereke. E nanokawaki tamara ngke e tang Jairo irouna. E kaotaki n aron Jairo anne bwa e ota n te baere e taekinna tamara, ma te kangaanga bwa e boni kabi n taetae.

N te tai ae aki maan, a a noria ara karo bwa e kona Jairo ni kakammwakura matana n tabetai ibukini kaotan ana iango ao ana namakin. E boni kabwaranano iroun Jairo ngkai e kangaanga te ota irouna n taai nako. Ma ngkana a ota ara karo n teini matana ao n anganna te bae e kainnanoia, e a matangare naba. Bon anne arona ni kaota ana karabwarabwa.

E iangoia taokitan te taetae bwa ti riai ni katei baira ngkana ti tabeki titiraki aika a na kaekaaki n eng ke tiaki ibukini kanakoraoan reitakira ma Jairo. E tei ibukin eng te angaatai ao te angamaing ibukin tiaki. Ngaia are e kona ni kaota te bae e tangiria ni matana ngkana e tarai baira.

TE BWAI AE KAKAWAKI AE RIKI NI MAIUN JAIRO

A karaoaki ruunga ao bwabwaro irouia Ana Tia Kakoaua Iehova tenua te tai n te ririki ike a a karaoaki iai kabwarabwara man te Baibara nakoia kaain te botaki aika rangi ni mwaiti. E kukurei n taai nako Jairo n tain te kabwarabwara ibukia taani bwabetitoaki. N te bong teuana ngke 16 ana ririki, e a titirakinna tamara ni kangai: “Ko tangiria ni bwabetitoaki Jairo?” E oti raoi nanona ni kan toua te mwaneka anne, ngke e waekoa n taraa bain tamara are te angaatai. E reitia riki ni kangai tamara: “Ko a tia ni berita nakon te Atua n te tataro bwa ko na beku ibukina n aki toki?” E a manga taraa naba angaatain tamara. E teretere raoi bwa e a tia ni katabua maiuna Jairo nakon Iehova.

Imwini maroroakinan reirei tabeua n te Baibara, e a teretere iai bwa e mataata Jairo ni kakawakin te bwabetito ni Kristian. N 2004, e a kaekaa te titiraki ae moan te kakawaki ae kangai: “Ko a tia ni katabua maium nakon te Atua bwa ko na kakaraoa nanona?” E kaekaa te titiraki anne ngke e taraa eta. Bon anne arona n taekina eng. E bwabetitoaki bwa temanna Ana Tia Kakoaua Iehova ngke 17 ana ririki.

E KAATUUA ANA TARATARA I AON ANA BWAI TE ATUA

N 2011, e a reke te anga ibukin te reitaki ma Jairo bwa te kaombiuta ae kammwakuraki n te mata. E kona te bwai anne n irira mwaingingini matana n te aro are e a kona ni kotei taamnei n te kaombiuta. Ngkana e karubei matana Jairo ke n tarai taamnei akanne ai aron ae e kammwakura ana mouse. A tei taamnei akanne ibukin taeka ke kibuntaeka are e a buokaki iai ibukin reitakina. Ngkana e karubea matana i aon teuana mai iai ao te program are n ana kaombiuta e kona ni kaotinakoa bwa te taetae.

Ngke e a rikirake otan Jairo n te Baibara ao e rikirake naba nanona ni kani buokiia aomata ni kaineti ma te onimaki. Ni karaoan ara reirei n te Baibara n te utu ni katoa wiki, e aki toki n taraai ao ana kaombiuta. Bon anne arona ni kauringai bwa I riai ni korei ana kaeka are e na anga n te bobotaki n ara Ekaretia.

N tain te bobotaki, e kataia ni kamwainga matana bwa e na kotea raoi te taamnei n te kaombiuta ibukin ana kaeka ike e a taetae iai ana kaombiuta ao ni kona n ongo aomata. E aki toki ni moangare n taai ake a kaungaaki iai kaain te ekaretia n ana kaeka. E taku temanna mai buakoia raoraon Jairo ae Alex are te roro n rikirake: “E rotaki nanou n taai nako ngkana e anga ana kaeka Jairo man te Baibara.”

E kamanena naba matana Jairo n taekina ana koaua nakoia aomata. Te anga teuana ae karaoa iai anne boni kotean te taamnei ni matana are e kaotaki iai te onnaroka ma maan ao aomata ni kabane iai aika maeka ma te rau. Karaoan anne irouna, e a taetae ana kaombiuta ni kangai: “Te kantaninga ae n te Baibara bwa e na bwaretaiti te aonnaba ike e na akea iai te aoraki ao te mate, Te Kaotioti 21:4.” Ngkana e kan ongora te aomata, e a manga kotea riki te taamnei anne ni matana ike e a manga taetae riki ana kaombiuta ni kangai: “Ko tangiria n reiakina te Baibara ma ngai?” Ma e kamimi bwa e butimwaea te reirei n te Baibara tibura te unimwaane. Ai boni kakukureira noran Jairo n reiakina tibura teutana imwin teutana n te Baibara ao ni buokaki iroun temanna te tia Kakoaua! E kakukurei bwa e bwabetitoaki tibura n te bwabwaro i Madrid n Aokati 2014.

E ataaki Jairo bwa e tangira te Atua irouia taan reirei n ana tabo n reirei. E taekina ae kangai n te tai teuana Rosario ae temanna mai buakoia ana taokita ibukin te taetae: “Ngkana arona bwa I iangoa kaainakin te aro, N na bon riki bwa temanna kaain Ana Tia Kakoaua Iehova. I a tia n nora aron ana onimaki Jairo ni karekea te kukurei ni koaua ni maiuna n aki ongei ana kangaanga aika rawawata.”

E rangi ni kukurei Jairo ngkana I wareka nakoina te berita man te Baibara ae kangai: “Ane e na ewewe iai te mauku n ai aron te ria, ao e na anene ni kimareirei newen ane e bae newena.” (Itaia 35:6, BG) E ngae ngke e kona ni bwara nanona n tabetai ma e teimatoa ni kukukurei. E riki anne ibukina bwa e kabotoa maiuna iroun te Atua ao raoraona aika Kristian. E kakoauaaki man aroarona aika kakukurei ao ana onimaki ae korakora bwa te beku ibukin Iehova, e karika te maiu ae karawawata bwa e na rangi ni manena.

[Kabwarabwara ae nano]

[Taamnei n iteraniba 10]

E kamanena ana kaombiuta Jairo ae kammwakuraki n te mata ao ni kona n taetae ni kaeka ni bobotaki ao n tibwaa ana koaua

[Bwaoki n iteraniba 10]

Baika A Taekin Raoraon Jairo

E taekina ae kangai Rosa ae 63 ana ririki: “E rangi ni kukurei Jairo ao e korakora ingaingan nanona ni kani beku ibukin Iehova.”

E taku Antonio ae 32 ana ririki: “E rotaki nanou n taai nako ngkana I nora Jairo ni kaotiota ana onimaki.”

E taekina ae kangai Andre ae 67 ana ririki: “Titeboo bwa e ota riki Jairo nakoiu i aon ana reirei tabeua te Baibara.”