Buumwaane​—Karaoi Mwengami Bwa A na Mweraoi

TE AEKA ni mweraoi raa ae e riai ni karekea te mwaane ibukini buuna? A bati aomata ake a kaikawaaki bwa a na kakoauaa ae taben te buu te mwaane ae kakawaki boni buokan ana utu bwa a na mweraoi n te mwane. Ma e ngae n anne, a teimatoa n namakina te aki mweraoi ao te maaku naba tabeman buuaine ake a maiu ni kaubwai. N te katoto, e taekina buuna Nei Rosa ae kaain Tibein ni kangai: “Bon te aomata ae taatangiraki irouia aomata ake tiaki kaain ara utu, ma ni mwengana bon te buu te mwaane ae aki akoi.” E taku Nei Joy ae kaain Nigeria: “Ngkana I aki boraoi n iango ma kaainnabau, ao e bae ni kangai, ‘Ko riai ni karaoi bwaai ni kabane ake I tangiri ibukina bwa buum ngai.’”

E na kangaa te mwaane ni kona ni kakororaoa tabena ma te tangira ngkai te buu te mwaane ngaia? Tera ae kainnanoaki ibukin te buu te mwaane bwa e na karaoa mwengana ae mweraoi, ae ‘te tabo ni motirawa’ ibukini buuna?—Ruta 1:9, BG.

TE BWAI AE TAEKINAKI N TE BAIBARA IBUKIN ANA KAIRIRI TE BUU TE MWAANE

E ngae ngke titeboo aron te buu te mwaane ao te buu te aine i matan te Atua, ma e taekinaki n te Baibara bwa a kakaokoro mwiokoaia n te utu. E taekinaki n I-Rom 7:2 bwa e mena te buu te aine i aan “ana tua buuna.” N aron ae e rineaki temanna mani botaki aika bati bwa e na mataniwi, e mwiokoaki naba te buu te mwaane iroun te Atua bwa atuni buuna. (1 I-Korinto 11:3) A riai buumwaane ni kairiri n aia utu.

Ngkai buumwaane ngkami, kam na kangaa ni karaoa mwiokoami ni kairiri mairoun te Atua? E taekinaki n te Baibara ni kangai: “Teimatoa n tangiriia buumi, n aron naba te Kristo ngkai e tangira te ekaretia.” (I-Ebeto 5:25) Eng, e ngae ngke e aki roko n te iein Iesu Kristo, ma e kona ni buokiko ana katoto bwa ko na riki bwa te buu te mwaane ae raoiroi. Ti na noria bwa n te aro raa.

TE KATOTO NI MAIUN​—IESU AE KORORAOI IBUKIA BUUMWAANE

E ukera raun nanoia aomata Iesu ao e buokiia. E berita ni kangai Iesu nakoia aomata nako ake a korakai ao n rawawata n oin aia kangaanga: “Nakomai nakoiu, . . . ao N na motiki rawami.” (Mataio 11:28, 29) E aki toki ni kabebetei marakia ao ni buokiia bwa a na kaaniaki ma Iehova. Maroaka ae a bati ake a katikaki ni kaaniaki nakon Iesu ao a kakoauaa bwa e na kabebeteia!

Aroia buumwaane ni kakairi iroun Iesu. Kakaaei aanga ibukini buokaia buumi n aia mwakuri. Titeboo aia namakin buuaine tabeman ma Rosa are e bwaebwaeti ni kangai: “I riki bwa ana toro kaainnabau.” Ni kaitaraan anne, e taku te mwaane ae Kweku are e kakukurei tekatekana n taanga: “I aki toki n tuanga buu ana mwakuri ae I kona ni buokia iai. Ibukina bwa I tangiria, I katoatai ni biririmoa ni buokia n tabena tabeua i nanon te mwenga.”

E akoi Iesu ao e nanoanga. E rinanon te aoraki ae kakaiaki n te maan ae 12 te ririki, te aine ae maiu ni kainnano. Ngke e ongo taekani mwaakan Iesu ae kamimi ao “e tataku i nanona: ‘Ngkana I bon ringa ana kauaatao, ao I a marurung naba.’” E boni koaua neiei. E kaania Iesu ma n ringa buruburun ana kauaatao ao e a toki naba ngkekei aorakina. E ngae ngke a bae n iangoia taani mataku tabeman bwa e karaoa te katei ae aki riai te aine aei, ma e bon noria Iesu bwa e rangi ni kainnanoa buokana.a E taetae ma te akoi nakoina ni kangai: “Natiu, . . . ko na marurung man aorakim ae kakaiaki.” E aki tii ribaa kamaamaean ke kabuakakaan neiei Iesu, ma e boni kakoauaa ae e bon aoraki. N te aro anne, e kaotia iai bwa bon te aomata ae nanoanga ngaia.—Mareko 5:25-34.

Aroia buumwaane ni kakairi iroun Iesu. Ngkana e aki marurung buum, kaotia ae ko tabeakinna riki ao bwaina te taotaonakinnano. Kataia n iangoi bwaai n aron are e iangoi ao n oota n aroarona iai. N te katoto, e taku Ricardo: “Ngkana I noria bwa e rangi ni kakai un buu, I kakorakoraai ni kakaaea angau n aki taekin taeka aika e na rotakibuaka iai.”

E mamaroro Iesu ma taan rimwina. E mamaroroakini baika a bati Iesu ma raoraona n akea te imamaakin. E taku: “I kaotiotii nakoimi bwaai ni kabane ake I ongo mairoun Tamau.” (Ioane 15:15) E boni koaua bwa n taai tabetai e tangiria Iesu bwa e na tiku n tii ngaia n iango ao n tataro. Ma e aki toki ni kaotiotii ana namakin nakoia taan rimwina. N te tairiki are imwaini kamateana ni bukinana bwa te tia karaoa ae buakaka, e bon tuangiia bwa e “rangi n rawawata [nanona].” (Mataio 26:38) E ngae naba ngkana a karaoi mwakuri ake e na rawawata iai Iesu, ma e aki roko n te katoka te mamaroro ma raoraona.—Mataio 26:40, 41.

Aroia buumwaane ni kakairi iroun Iesu. Taekin nakoia buumi baike ko iangoi ao am namakin. E kona te buu te aine ni ngurengure ibukini buuna bwa e taraa n akea ana kangaanga ni mamaroro i mataia aomata, ma e rangi ni kabuingoingo n te mwenga. N te itera are teuana, iangoa aron Nei Ana ibukini buuna ngke e taekin ana iango ke ana namakin nakoina. E taku: “I namakinna ae e rangi n tangirai ao I a kaaniaki nakoina.”

Rarawa ni kainabwabu ngkana ko katuuaaea buum. E taku temanna te aine: “E aki kona ni kataetaeai i nanon tabebong kaainnabau ngkana e un irou. E iangoia bwa N na namakinna ae I bure ao n taboribaaki.” Ma e kataia Edwin ni kakairi n ana katoto Iesu. E taku teuaei: “I aki waekoa ni kabooa ana taeka ngkekei naba ngkana I un, ma I kakaaea te tai ae angaraoi ni maroro ibukini kanakoraoan te kangaanga.”

E nori bitaki irouni kainnabana Nei Joy are e taekinaki mai moa, man te tai are e moana iai reiakinan te Baibara teuaei ma Ana Tia Kakoaua Iehova. E taku neiei: “E a bitaki ao e kakorakoraa n riki bwa te buu te mwaane ae rangi n tatangira n aron Iesu.” A kakabwaiaaki naba mirion ma mirion taanga n te kaetieti man te Baibara. Ko kan riki naba n ai aroia? Ko kona ni butiia temanna Ana Tia Kakoaua Iehova bwa ko na reirei ma ngaia n te Baibara n akea boona.