Ko Ataia?

Tera nanon te taeka ae “iunaki” ni kamanenaana n te Baibara?

N tabetai, e kona te taeka aei n taekinaki iai te mwaane ae koromaangeaki. N taai ake a karakinaki n te Baibara, a koromaangeaki tabeman mwaane bwa katuuaaeaia ngkana a riki bwa taenikai ke n tautoronaki. A onimakinaki mwaane ake a a tia ni koromaangeaki bwa a na tararuaa te auti n aine ke aine aika bati ae ti temanna buuia ao ake i nanon ana auti te uea. N te katoto, a beku iunaki aika Ekai ao Tiaatikati bwa taan kawakinia buun Aatueruti ke Xerxes  I ae Ueani Botia ao buuna ni kewe.—Etita 2:3, 14 BG.

E ngae n anne, a aki bane ni koromaangeaki te koraki ake a atongaki n te Baibara bwa iunaki. A taku tabeman taan rabakau bwa e kona n raababanako riki nanon te taeka anne nakon te aomata ae iai mwiokoana n ana baareti te uea. E noraki n te taeka aei bwa e kaineti nakon Ebeta-mereka ae raoraon Ieremia, ao te Itiobia temanna are e aki kaotaki arana are e uarongorongo Biribo nakoina. E teretere raoi bwa e rangi n rietata nakoan Ebeta-mereka, bwa te tia uataeka nakon te Uea are Tetekia. (Ieremia 38:7, 8) Ao e kabwarabwaraaki te Itiobia bwa ana tia mwane te uea, are “e nako . . . bwa e na taromauri i Ierutarem.”—Mwakuri 8:27.