“Tarataraa Tamaroan Iehova”

E kona n rangi ni korakora rotakira ngkana a riki aaro ni karawawata nakoira. A taonakinako ara iango, a kakerikaaki korakorara ao a rotaki naba ara iango ibukin te maiu. E korakora naba rotakin aia Uea tibun Iteraera rimoa ae Tawita ni kangaanga aika bati. Tera arona ni kaaitarai? E kaekaa Tawita n ana areru ae ringa te nano aei: “I wetea Iehova ni bwanau; I butia Iehova ni bwanau. I nurakina tangu i matana; I kaota rawawatau i matana. Ngke e nimamate tamneiu i nanou, ao Ko ata kawaiu.” Eng, e tataro ma te nanorinano Tawita nakon te Atua ibukini buokana.​—Taian Areru 142:1-3, BG.

E anene ni kangai Tawita n ana areru riki teuana: “Teuana te bwai ae I butia Iehova, ao boni ngaia ae N na ukoukoria; Ba N na maeka i nanoni maneaban Iehova n uaa tokin au bongi ni maiu, Ba N na tarataraa tamaroan Iehova, Ma n ukeuke i nanoni maneabana.” (Taian Areru 27:4, BG) Tiaki kaain te baronga ae tibun Rewi Tawita, ma iangoia bwa e tei i tinanikun oon te tembora ae tabu n uakaan ma nibwan raoi te tabo n taromauri ae koaua. E onrake nanon Tawita n te kakaitau anne n te aro are e a kani kabanea nikirani maiuna ikanne ao n “tarataraa tamaroan Iehova.”

E irekereke te taeka ae “tamaroan” ma te bwai ae riki ke te aroaro ae “kariaiakani ke kakukureian te iango, te nano ke te namakin.” E taratarai n taai nako ana babaire te Atua ibukin te taromauri Tawita ma te kakaitau. Ti kona n titirakinira ni kangai: ‘Titeboo au namakin ma Tawita?’

‘UKERI’ ANA BABAIRE TE ATUA

N ara bong aikai, e a aki boto ana babaire Iehova ibukini kawarana n te bwai ae kona n noraki. N oneani mwin anne, e irekereke ma ana tembora n taamnei te Atua ae kakannato are te babaire ae tabu ibukin te taromauri ae koaua.a Ngkana ti ‘ukera’ te babaire aei, ti a kona naba n “tarataraa tamaroan Iehova.”

Iangoa baon te karea ni kabuekaki ae karaoaki man te buraati ae tei i nanoaani mataroan te umwanrianna ae tabu. (Te Otinako 38:1, 2; 40:6) E tei te baonikarea ibukini kukurein te Atua ni butimwaea maiun Iesu n aomata bwa te karea. (Ebera 10:5-10) Iangoia bwa tera nanon anne ibukira! E korea ae kangai te abotoro Bauro: “Ngke ti kairiribai ngkoa nakon te Atua, ao ti raoiakinaki ma ngaia rinanoni maten Natina.” (I-Rom 5:10) Ti kona ni karekea akoara ao onimakinara ngkai ti a riki bwa raoraon te Atua mani kaotiotan onimakinan raraan Iesu ae kawawaeaki. Ibukin anne, ti a namakina iai ‘kaanin ara iraorao ma Iehova.’​—Taian Areru 25:14, NW.

Kioina ngkai a ‘kamaunaaki ara bure,’ ti a namakinna iai bwa a a roko “taai ni kakamaiu mai matan Iehova.” (Mwakuri 3:19) Titeboo arora ma te tia bure ae uringaaba ibukin ana mwakuri rimoa ao e a karaoi bitaki aika korakora ngkai e kakantaningaa kamateana. N noran aei, e a kairaki te tia moti ae akoi bwa e na kamaunai ana bure te aomata anne ae nanona bwa e kamaiua man tuuaana ae te kamateaki. Ai boni bebetera ao ai kimwareireira te tia bure anne! N aron te tia moti anne, e taraiia aomata aika raraoma Iehova ao e akoia ma ni kamaiuia man te rekenikai ae te mate.

KIMWAREIREI N TE TAROMAURI AE KOAUA

Aikai bwaai ake e nori Tawita mai buakoni baike a kakaraoaki n te taromauri ae koaua n ana auti Iehova: Bobotakia raoia ake tibun Iteraera aika mwaitikurikuri, te wareware i mataia aomata ma kabwarabwaraan te Tua, kabuekani baika boiarara ao karaoan te beku ae tabu irouia ibonga ma tibun Rewi. (Te Otinako 30:34-38; Warekaia Iteraera 3:5-8; Te Tua-Kaua 31:9-12) Iai tabeua baika kakaraoaki n te taromauri ae koaua irouia tibun Iteraera rimoa aika kakaraoaki naba ni boong aikai.

“Ai raoiroi ra ao ai rerei ra Maekaia taari n te tabo ae ti teuana ni kabo nanoia!” n ara bong aikai, n aron are karaoaki naba rimoa. (Taian Areru 133:1, BG) E a korakora rikirakeni mwaitiia ‘tarira n te onimaki’ ni katobibia te aonnaba. (1 Betero 2:17) E warekaki ao ni kabwarabwaraaki Ana Taeka te Atua n ara bobotaki. E a tia Iehova ni katauraoi kaetieti aika rangi ni bati ibukin te kairiri rinanon ana botaki. Iai naba amwarake n taamnei aika mwaitikurikuri ake a katauraoaki ake a a tia ni boreetiaki aika ti a kona ni kamanenai n ara ukeuke n reirei i bon iroura ao ara taromauri n utu. E taekina ae kangai temanna kaain te Rabwata n Tautaeka: “I namakinna n angiin te tai bwa I kaubwai n te aro n taamnei ao e rau nanou ibukina bwa I kananoa au iango i aon Ana Taeka Iehova, I iaiangoa nanona ao n ukoukora te atatai ao otau iai.” Eng, ‘e kona ni kukurei nanora n te atatai.’​—Taeka N Rabakau 2:10, BG.

A katoabong ni waerake nakon Iehova tataro aika kakukurei mairouia ana toro ni boong aikai. Titeboo aeka n tataro akanne ma karea aika rangi ni boiarara iroun Iehova. (Taian Areru 141:2) Ai kukureira ngaira n ataakin ae e rangi ni kimwareirei Iehova ae te Atua ngkana ti tataro nakoina ma te nanorinano!

E tataro Mote ni kangai: “E na mena ana akoi Iehova ae Atuara i aora: Ao Ko na kamatoa aia makuri baira i aora.” (Taian Areru 90:17, BG) E kakabwaiaa ara mwakuri ni minita Iehova ngkai ti waakinna ma te ingaingannano. (Taeka N Rabakau 10:22) Ti bae n tia ni buokiia tabeman bwa a na reiakina te koaua. Tao ti a tia naba n nanomwaaka n ara mwakuri ni minita i nanon ririki aika bati n aki ongea te aki bwerengaki, aorakira, rawawatara ke bwainikirinara. (1 I-Tetaronike 2:2) E ngae n anne, tiaki ti a bon tia n nora “tamaroan Iehova” ao n ataia bwa e korakora kimwareirein Tamara are i karawa n ara kakorakora?

E anene ni kangai Tawita: “Bon Iehova tibangau ae au bwai ma au mangko: Ko kamatoa tibangau. A reke tian abau i rou n taabo aika raraoi.” (Taian Areru 16:5, 6, BG) E rangi ni kakaitau Tawita ibukin ‘tibwangana’ ae ana iraorao ma Iehova ae butimwaeaki ao mwiokoana ae te beku ibukina. N aron Tawita, ti kona naba n aitara ma kangaanga, ma bon iai kakabwaiaara aika rangi ni bati n te aro n taamnei! Mangaia are ti bia teimatoa ni kukurei n te taromauri ae koaua ao n ‘ukera’ ana tembora n taamnei Iehova n taai nako.