E Boraoi Ma Te Rabakau N Aonnaba
“Tiaki I a tia ni koroi baika raraoi nako im Aika taekan reirei ma te ataibwai; Ba ko aonga n atai raoi taeka aika koaua, Ba ko aonga ni manga ua taeka aika koaua?” —TAEKA N RABAKAU 22:20, 21, BG.
E KANGA NI KAOKORO TE BAIBARA? A aki toki n taekinaki iango aika aki onimakinaki ao ni karuanikai ni bokin rimoa, ake a kaotaki raoi kairuaia n te rabakau n aonnaba ae ngkai. Ni boong aikai, a riai naba taani kororongorongo n rinanoi booki n reirei bwa a aonga ni boraoi ma kukune aika boou. Ma e taekinaki n te Baibara bwa te tia koreia bon te tia Karikiriki, ao “e teimatoa n aki toki” ana Taeka.—1 Betero 1:25.
TE KATOTO: A tuangaki tibun Iteraera n te Tua Rinanoni Mote, bwa a na keniken ao n tauna te bwai are e otinako mai nanoia “i tinanikun te maeka n rianna.” (Te Tua-Kaua 23:12, 13, BG) A riai naba n teboki baia n te ran, ngkana a ringa rabwatan te man ke te aomata ae mate. (Nakoaia Ibonga 11:27, 28; Warekaia Iteraera 19:14-16) N taai akekei, a kaokoroaki rebera ni karokoa tiani mwin te tutuo, ike a a kuneaki iai bwa e a aki ewewe aorakia.—Nakoaia Ibonga 13:1-8.
AIA KUKUNE TAANI KUAKUA N TAAI AIKAI: E kakawaki kamanenaan raoi te kainnakotinaniku, te tebobai ao kaokoroan ae aoraki, ibukini kateimatoaan totokoani butin te aoraki. Ngkana akea am kainnakotinaniku ke tao aanga riki tabeua ibukini kawakinan te itiaki i rarikim, e tua te U.S. Centers for Disease Control and Prevention (CDC) ibukin totokoani butin aoraki ni kangai: “Ko riai n nakotinaniku n te raroa ae kaania 30 te mita [ke 100 te buutii] mani nnen te ran ao n taunna.” E kabwarabwaraa te World Health Organization bwa a kona kaawa nako ni kakerikaaka te bekanako n aekana nako, nakon 36 te katebubua ngkana a kabonganaaki raoi kainnakotinaniku. A kunea taokita tao 200 te ririki n nako bwa ngkana a aki tebobai imwin ringakia maate, a bati aoraki ake a kona ni manga korakora riki aorakia. E katuruturua te CDC bwa te tebobai bon “tii ngaia te kawai ae rangi ni manena ibukin totokoan butinakon te aoraki.” Tera aroni kaokoroaia rebera ke te koraki ake iai aorakia aika ewewe? N taai aikai, ao e taekinaki n te maekatin ae te Saudi Medical Journal ae kangai: “Ni moan reken te aoraki ae ewewe, te anga ae te kabanea n tamaroa ibukin totokoana, boni kaokoroaia ao katukaia n te tabo teuana.”
TERA AM IANGO? Ko kantaningaia bwa iai bokin rimoa ae tabu, ae boraoi ma te rabakau n aonnaba n taai aikai? Ke e kaokoro te Baibara ma booki nako?
[Reirei ae kakawaki n iteraniba 6]
“A rangi n anainano warekan reirei ni kauring ibukin tuan te mauri n ana tai Mote.”—MANUAL OF TROPICAL MEDICINE, MAIROUIA DR. ALDO CASTELLANI AO DR. ALBERT J. CHALMERS