Kaaniko ma te Atua

Ti Tauraoi n “Okiriko”

Ko a tia ni beku ngkoa ibukin Iehova? Ko iangoa okim nakoina, ma ko raraoma bwa tao e na butimwaeiko ke e na aki? Taiaoka ma wareka raoi te kaongora aei ma ane imwina naba. A boni katauraoaki raoi ibukim.

E TAKU temanna te aine are e a tia ni kerikaaki man ana beku ibukin te Atua, ao ni karaoi mwakuri aika bobuaka ma kaetieti ibukia Kristian, ake e kaikawaaki i nanona: “I tataro nakon Iehova bwa e na kabwarai au bure ibukini karawawataana ao ni kariaia bwa N na manga okiria.” Ko nanoangaa neiei? Ko iango ni kangai: ‘Tera ana iango te Atua ibukia ake a a tia ngkoa ni beku irouna? E ururingia? E kukurei bwa a na “manga okiria”?’ Ni kaekaan titiraki akanne, ti na neneri taeka ake e korei Ieremia. Akea te nanououa bwa e na rau nanom ni kaekaaia.—Wareka Ieremia 31:18-20, BK.

Iangoa aron tein ana taeka Ieremia. N 740 B.C.E., ae tatabebwi te ririki imwain ana tai Ieremia, ao e kariaia Iehova bwa e na taenikai irouia kaain Aturia te tautaeka n uea ni baronga ake tebwina mai meang ae Iteraera arana.a E kariaia tautoronakia ana aomata te Atua bwa katuuaaeaia ibukini karaoani mwakuri aika bure, ao a aki mutiakini kauring ake a okioki mairouia ana burabeti. (2 Uea 17:5-18) A bitaki aroaroia aomata ni karawawataaia man tautoronakia, ngke a a raurenako ma Atuaia ao n raroanako ma abaia? E mwanuokin aroaroia ni kabane Iehova? E na kukurei ni butimwaeia bwa a na okira abaia ao ni manga beku irouna?

“I a Manga Rairaki”

A uringaaba aomata ngke a taenikai ao a a kairaki iai bwa a na raraoma. E nora aia rairannano ni koaua Iehova. Iangoi ana taeka Iehova ibukin aroaroia ao aia namakin I-Iteraera ngke a tautoronaki. E arania I-Iteraera bwa Eberaim.

E taku Iehova: “I ongo tangin Eberaim.” (Kibuna 18) E ongo aia bwaebwaeti I-Iteraera ni mwini karaoan ae bure. E taku temanna te tia rabakau, te taeka ae ‘tangin Eberaim,’ e kona n nanonaki iai “te ruru.” Titeboo aroia ma te nati are te tia bure are e nanomaraki, ao n ioioa atuna ibukin nanokawakina ae korakora, ngke e iaiangoi kangaanga ake e kaaitarai ao e a rangi ni kan okira mwengana. (Ruka 15:11-17) Tera aia taeka aomata iai?

“Ko reireiai . . . n ai aron te kao te tei ae e tuai toka te amo i aona.” (Kibuna 18) A kakoauaa aomata bwa a bon tau ni katuuaaeaki. Ni koauana, a a tia n riki bwa kaanga te kao te teei ae tuai ni kataneiaaki raoi. E taekinaki n te boki teuana bwa e kona n nanonaki n te kabotau aei, bwa a a tia n riki bwa kaanga te kao te teei ae “e na aki notuaki ngke arona bwa e aki rawa n uota te amo.”

“Ko na kaokai, ao N na okiriko, ngkoe Iawe ae Atuau.” (Kibuna 18) A nanorinano aomata ao a wetea te Atua. A a tia ni bua ibukini karaoan ae bure, ma ngkai a bubutii buokaia bwa e na reke angaia n oki ao n akoaki.

“I a nanokawaki. I mama ma n aki rereke arou i bukin au bure.” (Kibuna 19) A nanokawaki aomata ibukin aia bure. A butimwaea bukinaia ao a kakoauaa bwa a bure. A namakina kamaamaeaia ao a iangoia bwa akea uaaia, ao a kaotia n ororeani babatia.—Ruka 15:18, 19, 21.

A bon raraoma I-Iteraera. A rangi n nanokawaki, ao a kaotii aia bure nakon te Atua ao a rairaki man aroia aika bubuaka. E na marau nanon te Atua n raraomaia? E na kariaia bwa a na manga okiria?

“I Bati n Akoia”

Iai ana iraorao ae okoro Iehova ma I-Iteraera. E taku: “Tamaia Iteraera ngai, ao bon Eberaim au karimoa.” (Ieremia 31:9, BK) E na kanga te tama ae tatangira n rawa ni butimwaea natina ae raraoma ni koaua? Nora aron Iehova ni kaota ana namakin te Tama nakoia ana aomata.

“Bon natiu ae tangiraki Eberaim? te tei ae e kukurei te aba i rouna? ba ngkana I taetae n ekia nako, ao I bati n ururingnga nako naba.” (Kibuna 20, BG) Ai karaunanora taeka akanne! N aron te karo ae matoatoa ana kairi ma n tatangira, e riai te Atua n taetae n “ekia nako” natina ni kaokiokan te kauring nakoia ibukini karaoan ae bure. Ngkana a imanono n rawa n ongo irouna, e a kariaia tautoronakia ao n tokina e a kanakoia man te mwenga. Ma e ngae ngke e riai ni katuuaaeaia, e bon aki mwaninga taekaia. E bon aki kona ni karaoa anne. E aki kona ni mwaninga taekaia natina, te tama ae tatangira. Ma tera aron Iehova ngke e noria natina bwa a raraoma ni koaua?

“Ma ngaia ae e aki rau nanou i bukina; N na bon nanoangaia.” (Kibuna 20, BG) E rangi n ingainga nanon Iehova n tangiriia natina. E ringaki nanona n raraomaia ni koaua, ao e korakora nanona n tangiriia bwa a na okiria. N aron te tama are n ana kaikonaki Iesu ibukin te nati are bakatae, e ingainga naba Iehova ni butimwaeia natina bwa a na manga beku irouna ao e ‘korakora nanoangaaia’ irouna.—Ruka 15:20.

“Ko na Kaokai, ao N na Okiriko” Iehova

Ti karekea te atatai ibukin ana mwamwannano ao ana nanoanga Iehova, man taeka aika n Ieremia 31:18-20. E aki kona te Atua ni mwaninga taekaia ake a beku ngkoa irouna. Ma tera ae na riki ngkana a kan okiria nakanne. E “kani kabara buure” te Atua. (Taian Areru 86:5, BG) E na aki tannako mairouia akana kawaria ma nanoia n raraoma ni koaua. (Taian Areru 51:17) E na boni kukurei ni butimwaeia bwa a na manga beku irouna.—Ruka 15:22-24.

E biririmoa n okira Iehova te aine are e taekinaki mai mwaina, ao e kawara aia ekaretia Ana Tia Kakoaua Iehova n ana tabo. N te moantai, e riai n tokanikai i aon ana iango aika kairua. E taku neiei: “I namakinna bwa ai bon akea bongau.” Ma a kaungaa neiei unimwaane n te ekaretia, ao ni buokia bwa e na manga oki marurungina n te onimaki. E taku neiei ma nanona ni kakaitau: “Ai kakukureira ngkai e kariaia Iehova bwa N na manga beku irouna!”

Ngkana ko a tia ngkoa ni beku iroun Iehova ao ko a manga kani beku riki irouna, ti kaungako bwa ko na kawara aia ekaretia Ana Tia Kakoaua Iehova n am tabo. Uringnga bwa e butimwaeia Iehova ma te mwamwannano ao te nanoanga akana raraoma ao ni weteia ni kangai, “Ko na kaokai, ao N na okiriko.”

[Kabwarabwara mai nano]