E Kakawaki Ataakini Kaekaan Titiraki Aikai?

“Ane kam na ataa te koaua, ao e na kainaomataingkami te koaua.” —IOANE 8:32.

IAI koaua n te Baibara ake a kona ni kainaomataira man taian reirei ibukin Iesu, aika kamangaongaoa ara iango ao ni burebureira. E kakawaki te bae ti kakoauaa ibukina? Eng, e kakawaki. E kakawaki nakon Iehova, Iesu, ao nakoira naba.

● Bukin tera bwa e kakawaki nakon Iehova? Ibukina bwa “te Atua bon te tangira.” (1 Ioane 4:8) E tangirira Iehova bwa ti na maiu ni kukurei n aki toki. E taku Iesu: “E rangi n tangiriia kaain te aonnaba te Atua, n te aro are e anga Natina ae te rikitemanna, bwa e aonga n . . . reke irouna te maiu are aki toki.” (Ioane 3:16) E anga Natina te Atua bwa te tia Kainaomataira man te bure ao ni kauka te kawai ibukira nakon te maiu are aki toki n te Bwaretaiti i aon te aba are Ana moani kantaninga. (Karikani Bwaai 1:28) E ingainga te Atua n anga te bwaintituaraoi ae te maiu are aki toki, nakoia ake a reiakina te koaua ibukin Natina ao ni maiuakinna.—I-Rom 6:23.

● Bukin tera bwa e kakawaki nakon Iesu? Ibukina bwa Iesu e tangiriia aomata. E kaotiotia te tangira ngke e kareana maiuna bwa e na mate ibukira. (Ioane 15:13) E ataia bwa bon tii ngaia te kawai ibukini karekean te maiu. (Ioane 14:6) Ti riai ni mimi ngkai e tangiriia aika bati Iesu bwa a na karekei kakabwaia man ana karea ni kaboomwi? Anne bukina are e mwiokoia taan rimwina, bwa a na angareirei nakoia aomata taekan nanon te Atua ao ana kantaninga ni katobibia te aonnaba.—Mataio 24:14; 28:19, 20.

● Bukin tera bwa e kakawaki nakoira? Karaua iangoi baika a rangi ni kakawaki iroum ibukini maurim ma am utu. E korakora tangiran te marurung ao mwengaraoim ma ake a tangiraki iroum? E a tia Iehova n anganiko ma ake ko tangiriia kantaningaan te maiu ae kororaoi ae akea tokina n te waaki ae boou i aon te aba, are akea iai te maraki ma te rawawata rinanon natina are Iesu. (Taian Areru 37:11, 29; Te Kaotioti 21:3, 4) E anaaki nanom n te kantaninga anne? Ngkana anne nanom, iai te bwai ae ko riai ni karaoia.

Manga nora riki te kibu n atun te reirei aei: “Ane kam na ataa te koaua, ao e na kainaomataingkami te koaua.” E kona ni kainaomataira te koaua ibukin Iesu ma mwiokoana ni kakororaoa ana kantaninga te Atua, man tautoronakira ae te kabanea ni buakaka n te bure ao te mate. Ma ngkana ko kani karekea te inaomata anne, ko kainnanoa “ataakin te koaua.” E aera bwa ko aki reiakina ae bati riki ibukin te koaua aei, ao arom ni kakabwaiaaki iai ma ake ko tangiriia? A kukurei Ana Tia Kakoaua Iehova ni buokiko.