“I a Tia ni Kaotiota Aram”

“I a tia ni kaotiota aram nakoia aomata ake ko anganai mai buakoia kaain te aonnaba. . . . I a tia ni kaotiota aram nakoia ao N na boni manga kaotia.” —IOANE 17:6, 26.

Nanon Taeka Akanne: E kaotiota aran te Atua Iesu ni kamanenaana n ana mwakuri ni minita. Ngkana e wareware Iesu man te Baibara n aron ae e kakaraoia n angiin te tai, e boni mwanewea aran te Atua. (Ruka 4:16-21) E reireinia taan rimwina bwa a na tataro ni kangai: “Tamara, e bia katabuaki aram.”—Ruka 11:2.

Aroia Kristian Rimoa ni Kakororaoa ae Taekinaki: E taekinna te abotoro Betero nakoia mwaane aika ikawai riki i Ierutarem, bwa e a tia te Atua ni karekeia “te koraki ake a na uouota arana.” (Mwakuri 15:14) A tataekina te rongorongo ae raoiroi abotoro ao tabeman riki bwa, “ane taboa aran Iehova ao e na kamaiuaki.” (Mwakuri 2:21; I-Rom 10:13) A kamanena naba aran te Atua n aia koroboki. E taekinaki kabuekan aia koroboki Kristian irouia taani kakaaitara, n aia boki n tua I-Iutaia ae The Tosefta are e bobonga raoi tao n 300 C.E. ni kangai: “A aki kamanoaki mani kabuekaia bokin te Euangkerio ao bokin te minim [are aongkoa Kristian aika I-Iutaia]. Ma a kariaiakaki bwa a na kabuekaki n taabo ake a mena iai . . . ma booki riki tabeua ake iai Aran te Atua i nanoia.”

Antai Aika Iai Irouia te Kanikina Aei ni Boong Aikai? E taekinaki ae kangai ni moantaeka ake n te Revised Standard Version ibukin te Baibara are e kariaiakaki karaoana man te National Council of the Churches of Christ n te United States: “Imwain aia tai Kristian ao e a tia n toki n te Aro n Iutaia kamanenaan te ara ni koaua nakon teuare bon tii ngaia te Atua, bwa kaanga e riai ni kaokoroaki mairouia atua riki tabeman ao e bon aki eti aei irouia Kristian ni kabutaa te aonnaba.” Ai ngaia are e a oneaki mwin aran te Atua n te nakoa ae “TE UEA” iai. N taai aika tibwa nako, ao a tuangaki ebikobo iroun te Vatican ni kangai: “E na aki kamanenaaki ke n taekinaki te taeka ae tetragrammaton ae YHWHa n taian anene ke n taian tataro.”

Antai aika a kamanena ao ni kaotiota aran te Atua ni boong aikai? E mataku Sergey n te birim teuana ae kaotaki iai aran te Atua ae Iehova, ngke tao tebwi ma nimaua ana ririki i Kyrgyzstan. Ma imwin tebwi tabun te ririki, e aikoa ongongo aran te Atua. Rimwi riki ni menan teuaei n te United States, e a kawaraki irouia Ana Tia Kakoaua Iehova aika uoman ni mwengana, ao a kaota aran te Atua man te Baibara. E rangi ni kukurei Sergy ngke e a ataia ae iai te botaki teuana ae a kamanena te ara ae Iehova. E kakannongora bwa i aan te taeka ae “Jehovah God” n te Webster’s Third New International Dictionary, e a kabwarabwaraaki iai taekana bwa “te Atua ae moan te rietata ae ataaki, ao bon tii ngaia ae e taromauriaki irouia Ana Tia Kakoaua Iehova.”

[Kabwarabwara mai nano]