“E na Tataekinaki te Rongorongo ae Raoiroi Aei ae Taekan te Tautaeka n Uea”
“E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.”—MATAIO 24:14.
Nanon Taeka Akanne: E korea rongorongon Iesu te tia korea te Euangkerio ae Ruka, bwa e “nako n tataekina te rongorongo ae raoiroi ae taekan ana tautaeka n uea te Atua, ni kaawa nako aika bubura ma aika uarereke.” (Ruka 8:1) E taekina ae kangai Iesu ibukina: “I riai naba n tataekina te rongorongo ae raoiroi ae taekan ana tautaeka n uea te Atua, . . . bwa ngaia aei bukini kanakoau.” (Ruka 4:43) E kanakoia taan rimwina Iesu bwa a na tataekina te rongorongo ae raoiroi ni kaawa aika bubura ma aika uarereke, ao imwina e tua ae kangai nakoia: “Kam na riki bwa taani kakoaua ibukiu . . . nako tabon aonnaba.”—Mwakuri 1:8; Ruka 10:1.
Aroia Kristian Rimoa ni Kakororaoa ae Taekinaki: A kamanenai raoi aia tai taan rimwin Iesu ni karaoa are e tuangia bwa a na karaoia. “A katoabong n angareirei ao n tataekina te rongorongo ae raoiroi ibukini Kristo Iesu n aki toki, n te tembora ao n te auti teuana ma teuana.” (Mwakuri 5:42) E aki kaonotaki karaoan te uarongorongo tii nakoia aomata tabeman ma e karaoaki irouia kaain te ekaretia ni kabane. E noria te tia korea rongorongon rimoa ae Neander bwa “Celsus are e moani korea te rongorongo ni kaitaraa te waaki ni Kristian, e kakanikoa te koaua ae taan tataekina te euangkerio aika ingainga nanoia bon aomata aika taani koroi buraeniman, taani karaotaamwaka, taani karaoi kunnikai mani buraeia maan, ao ai aomata aika rangi ni kabitaia n aki ataa te katei.” E korea ae kangai Jean Bernardi n ana boki ae The Early Centuries of the Church: “A riai [Kristian] n uarongorongo nakoia aomata nako n taabo ni kabane n aroni kawai aika abwabwaki, kaawa nako, ana tabo te botannaomata ao ni mwenga nako. E ngae ngkana a butimwaeaki ke a aki. . . . Ma a riai n uarongorongo nako tabon aonnaba.”
Antai Aika Iai Irouia te Kanikina Aei ni Boong Aikai? E korea ae kangai te mitinare ae David Watson man te Aro ae te Anglican: “Akea te nano ni kani beku ibukin te Atua ni boong aikai, ibukina bwa a kabwaka Aaro n iangoa te uarongorongo ao te angareirei bwa mwakuri aika rangi ni kakawaki.” E korei taekan aia mwakuri Aaro aika Evangelicals, Aaro ni Kaitibong ao tabeua riki José Luis Pérez i Guadalupe, n ana boki ae Why Are the Catholics Leaving? ao e ataia naba ae “a aki kawari auti nako.” E korea naba ae kangai ibukia Ana Tia Kakoaua Iehova: “A baireaki ao ni karaoaki raoi aia mwakuri n uarongorongo man te auti teuana ma teuana.”
E kakaongora ao e koaua ana taeka Jonathan Turley n te boki ae Cato Supreme Court Review, 2001-2002 ae kangai: “Ngkana iai ae e mwanewea Ana Tia Kakoaua Iehova, ao a a iangoia naba angiia aomata n te tai anne bwa taan uarongorongo aika a kakawari mwenga nako n taai aika aki angaraoi. A kawari auti nako Ana Tia Kakoaua Iehova ibukini karikirakean aia onimaki, ma tiaki ibukin anaakin nanoia aomata nakon aia koaua.”
[Bwaoki n teraniba 9]
Ko a Ataa te Kanikina?
Ngkana ko kabotoa am iango i aoni baika a maroroakinaki n te Baibara ni kaongora aikai teuana imwin teuana, antai ngkanne ae ko iangoia bwa iai irouia kanikinaeaia Kristian ni koaua? E ngae ngke iai nga ma nga botaki ao Aaro aika a taku bwa Kristian ngaiia, ma uringa ana taeka Iesu nakoia taan rimwina aikai: “A na aki bane n rin n te tautaeka n uea ae bwaini karawa akana kangai nakoiu, ‘Te Uea, te Uea,’ ma e na bon rin ane kakaraoa nanon Tamau are i karawa.” (Mataio 7:21) Ngkana ko kinaia raoi te koraki ake a kakaraoa nanon te Tama, bwa iai irouia kanikinaeaia Kristian ni koaua ao ko bobotaki ma ngaiia, ko a kona ni karekei kakabwaia n aki toki i aan Ana Tautaeka n Uea te Atua. Ti kaungako bwa ko na titirakinia Ana Tia Kakoaua Iehova ake a anganiko te maekatin aei, ibukin rongorongon riki Ana Tautaeka n Uea te Atua ao kakabwaia ake e na uotii.—Ruka 4:43.