“Kam na Itangitangiri i Marenami”
“I anganingkami te tua ae boou, bwa kam na itangitangiri i marenami, n arou ae I tangiringkami, ao kam na itangitangiri naba. Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.”—IOANE 13:34, 35.
Nanon Taeka Akanne: E tuangia taan rimwina Kristo bwa a na itangitangiri i marenaia n arona n tangiriia naba. Tera aron Iesu n tangiriia? E tangiriia aomata nako n aki ongei aroaroia n riribai nakon te natannaomata, ao aine naba n ana bong. (Ioane 4:7-10) E kairaki Iesu n te tangira bwa e na anga ana tai, korakorana ao ana ibuobuoki n te aro are e kabebetei nanoia tabemwaang. (Mareko 6:30-34) N tokina, e a kaota ana tangira Kristo ae moan te korakora ngke e kangai: “Boni ngai te tia kawakintiibu ae raoiroi. E anga maiuna te tia kawakintiibu ae raoiroi ibukia tiibu.”—Ioane 10:11.
Aroia Kristian Rimoa ni Kakororaoa ae Taekinaki: N te moan tienture, a arania Kristian bwa ‘tariia’ ke ‘mwaaneia.’ (Biremon 1, 2) A bane ni butimwaeaki aomata man natannaomata nako n te ekaretia ni Kristian, bwa a kakoauaa ae “akea te kaokoro i marenan te I-Iutaia ma te I-Kuriiti, bwa tii temanna aia Uea ngaiia ni kabaneia.” (I-Rom 10:11, 12) Imwini Bentekota 33 C.E., ao taan rimwini Kristo ake i Ierutarem a “kabooinako abaia ma aia bwai ake irouia, ao n tibwatibwai mwaneia nakoia ni kabane n aron are e boni kainnanoia temanna ma temanna.” Tera bukina? Bwa a aonga ni kona n tiku i Ierutarem te koraki ake a a tibwa bwabetitoaki, ao n teimatoa ni “botumwaaka ni mutiakina aia angareirei abotoro.” (Mwakuri 2:41-45) Tera are e kairiia bwa a na karaoa aei? E tuai koro 200 te ririki imwini mateia abotoro ao e taekin aia taeka aomata tabeman Tertullian ibukia Kristian ni kangai: “Nora aroia n itangitangiri . . . ao tauraoin nanoia ni mate ibukia raoia.”
Antai Aika Iai Irouia te Kanikina Aei ni Boong Aikai? E taekinaki n te boki ae The History of the Decline and Fall of the Roman Empire (1837) bwa i nanon tienture aika bati ao te koraki ake a taku bwa Kristian ngaiia, “a korakora riki karawawataaia i bon irouia, nakon are a a tia ni karekea mairouia taani karitei [ake tiaki taan onimaki].” E noraki mwin te kakaae n taai aika tibwa nako n te U.S. bwa e korakora te reitaki i marenaia aomata aika taua te Aro, ake angiia mai buakoia a taku bwa Kristian ngaiia ma a kairiribai n aia reeti. N angiin te tai, akea reitakia taani kakaaei taromauri n te aba teuana ma kaain aia Aaro tabeman n te aba riki teuana, n te aro are a aikoa kona ni buokiia raoia n onimaki ke a bon rawa, ngkana a kainnanoa buokaia.
N 2004 imwin rokon angibuaka aika aua i aon Florida teuana imwin teuana i nanon uoua te namwakaina, ao a tuoaki bwaai n ibuobuoki iroun te tia babaire n te Komete n Tararua Ibukin te Kabuanibwai i aon Florida, bwa a riai ni kamanenaaki raoi. E taekinna bwa akea riki te botaki ae baireaki raoi n aroia Ana Tia Kakoaua Iehova, ao e anga nanona bwa e na karekei riki bwaai n ibuobuoki aika a kainnanoaki irouia taani Kakoaua. Ni moan 1997, ao e mwananga te tiim n ibuobuoki aika Ana Tia Kakoaua Iehova ma bwainnaoraki, amwarake ao kunnikai nakoia kaain te Democratic Republic of Congo, ibukini buokaia tariia ni Kristian ao tabemwaang riki ake a kainnanoa buokaia. A a tia naba taani Kakoaua tabeman i Eurobe, n anga taiani bwaintangira ae kaania te mirion te taraa n Amerika te kabanemwane iai.